🇰🇿 50 000 ГЕКТАР ЖЕР: ҚАЗАҚСТАН БҰДАН НЕ ҰТАДЫ? Өзбекстан тарапы Қазақстанда мал өсіріп, бордақылау үшін кемінде 50 мың гектар аумақ қарастыруды ұсынды. Жоспар бойынша мал Қазақстанда өсіріліп, бордақыланып, 400 келіден асқаннан кейін Өзбекстанға экспортталуы мүмкін. Бірден айтайын: 50 мың гектар жер әлі берілген жоқ. Бұл — ұсыныс. Мен шетелдік инвестицияға қарсы емеспін. Инвестиция келсін. Бірақ бізге қандай инвестиция керек деген сұрақ бар. Жаңа технология, машина жасау, заманауи құрал-жабдық, терең өңдеу, бізде жоқ өндіріс келсе — әрине, қолдау керек. Ал мал бағу мен мал семірту — қазақтың ата-бабасынан келе жатқан кәсібі. Сондықтан менде қарапайым сұрақ бар: Бізге мал бағуды үйрететін инвестор керек пе, әлде сол малдан дайын өнім шығаратын технология әкелетін инвестор керек пе? Керісінше елестетіп көрейік. Өзбекстан мақта, тоқыма өндірісінде тарихи тәжірибесі бар ел. Біз барып: «50 мың гектар жер беріңіздер, мақтаны сіздердің жерлеріңізде өсіріп, кейін Қазақстанға алып кетейік» десек, өзбек ағайындар да: «Мұны өзіміз істей аламыз ғой» деп сұрақ қоймас па еді? Оның үстіне өзіміздің шаруалар жер мәселесін көтеріп жүр. Тағы бір маңызды мәселе — экспорттағы теңдік. Егер ертең қазақстандық шаруаға квота немесе экспорттық шектеу болып, ал инвестициялық жобаға басқа мүмкіндік берілсе, бір нарықта жұмыс істеп отырған кәсіпкерлерге жағдай тең бола ма? Менің позициям қарапайым: Инвестиция келсін. Бірақ мүмкіндік бәріне тең болсын. Жерде де. Экспортта да. Мемлекеттік қолдауда да. Ең бастысы, инвестиция Қазақстанда технология, өңдеу, жұмыс орны және жоғары қосылған құн қалдыруы керек. Мәселе инвестордың қай елден келгенінде емес. Мәселе — сол инвестиция Қазақстанға және қазақстандық шаруаға нақты не қалдырады? Сіз қалай ойлайсыз: 50 мың гектарды осындай жобаға берген дұрыс па, әлде алдымен өз шаруаларымызға мүмкіндік беру керек пе? 👇 Пікіріңізді жазыңыз. #қазақжері - @molodoi_gissaravodd