စစ်ကိုင်းတိုင်းအတွင်း မူးမြစ်ရေလျှံမှုကြောင့် ခင်ဦး၊ ရွှေဘိုနှင့် ဝက်လက်မြို့နယ်များရှိ ကျေးရွာပေါင်း ၄၀ ကျော် ရေဘေးဒဏ် စိုးရိမ်ဖွယ် ကြုံတွေ့နေရပြီး အရေးပေါ် အကူအညီများ လိုအပ်နေ ရန်ကုန်၊ ဩဂုတ် ၉ စစ်ကိုင်းတိုင်းအတွင်း မူးမြစ်ရေ မြင့်တက်လာမှုနှင့် မိုးသည်းထန်စွာ ဆက်တိုက် ရွာသွန်းမှုတို့ကြောင့် ခင်ဦး၊ ရွှေဘိုနှင့် ဝက်လက်မြို့နယ်များအတွင်းရှိ ကျေးရွာပေါင်း ၄၀ ကျော်တွင် ရေကြီးရေလျှံမှုများ ဆိုးရွားစွာ ဖြစ်ပေါ်လျက်ရှိပြီး အရေးပေါ် အကူအညီများ လိုပ်နေကြောင်း တော်လှန်ရေး အင်အားစုများ ထုတ်ပြန်ချက်နှင့် ရေဘေးကယ်ဆယ်ရေး လုပ်ဆောင်နေသူများ ပြောကြားချက်အရ သိရသည်။ ခင်ဦးမြို့နယ် တစ်ခုလုံးတွင် ယမန်နေ့ ညမှစ၍ မိုးသည်းထန်စွာ ဆက်တိုက် ရွာသွန်းခဲ့သဖြင့် မြို့နယ်အနောက်ခြမ်းရှိ မူးတိမ်ချောင်း ရေကျိုးကျကာ စပါးပျိုးခင်း၊ စိုက်ခင်းများနှင့် သီးနှံယာခင်းများအတွင်း သို့ ရေများ စီးဝင်လျက်ရှိသည်။ မူးမြစ်နှင့် DY-1 မူးဘောင်အတွင်းရှိ ရေဘေးသင့်ကျေးရွာများ၌ ယမန်နေ့ မွန်းလွဲပိုင်းက ရေ ၂ လက်မခန့် ပြန်ကျသွားခဲ့သော်လည်း ဆက်လက် မိုးရွာသွန်းနေမှုကြောင့် ရေမျက်နှာပြင် ပြန်လည် မြင့်တက်လာနေသည်။ လက်ရှိတွင် ခင်ဦးမြို့နယ် အနောက်တောင်ခြမ်းနှင့် အနောက်မြောက်ခြမ်းရှိ ကျေးရွာ ၁၉ ရွာ ရေဝင်ရောက်လျက်ရှိပြီး ဒေသခံ ထောင်ပေါင်းများစွာမှာ ဘေးလွတ်ရာသို့ တိမ်းရှောင်နေရသည်မှာ ၃ ရက်မြောက် ရှိပြီဖြစ်သည်။ လမ်းပန်းဆက်သွယ်ရေး အခက်အခဲများကြောင့် သက်ကြီးရွယ်အိုများ၊ အမျိုးသမီးများနှင့် ကလေးသူငယ်များမှာ နေထိုင်ရေး အခက်အခဲနှင့် ကြုံတွေ့နေရသည့်အပြင် ဖျားနာမှုများလည်း စတင်ဖြစ်ပွားနေသဖြင့် အစားအစာနှင့် ဆေးဝါး ထောက်ပံ့မှုများ အရေးပေါ် လိုအပ်လျက်ရှိသည်။ ရေဘေးသင့် ကျေးရွာ ၁၉ ရွာဖြစ်သည့် တာတိုင်ကျေးရွာ၊ ဇီးတောကျေးရွာ၊ လက်ပံကွက်ကျေးရွာ ၊ သက်ပေးကျေးရွာ၊ မူးသာကျေးရွာ၊ ရွာသစ်ကျေးရွာ၊ သက်သာပန်းတောင်း (ကားဆိပ်) ကျေးရွာ၊ အင်တိုင်း (တောင်/မြောက်) ကျေးရွာ၊ သရက်ပင်စုကျေးရွာ၊ ရွာသစ်ကုန်းကျေးရွာ၊ အင်းပတ်ကျေးရွာ၊ အောင်ချမ်းသာကျေးရွာ၊ မကျီးအုပ်ကျေးရွာ၊ ယာတော်ကျေးရွာ၊ မြင်းဒေါင်းကျေးရွာ၊ ကျွန်းတောလေး (ဥယျာဉ်) ကျေးရွာ၊ ကျွန်းတောကြီးကျေးရွာ၊ သာဝတ္ထိကျေးရွာနှင့် မုံလှကျေးရွာ တို့မှ ထောင်နှင့်ချီသော ပြည်သူများ တိမ်းရှောင်နေရကြောင်း သိရသည်။ ထို့ပြင် ရွှေဘိုခရိုင်၊ ရွှေဘိုမြို့နယ် အနောက်ခြမ်းနှင့် အနောက်တောင်ခြမ်း မူးမြစ်ကမ်းအနီးရှိ ကျေးရွာ ၁၇ ရွာတွင် မူးမြစ်ရေလျှံမှုကြောင့် ရေဘေးအန္တရာယ်နှင့် ရင်ဆိုင်နေရသည်။ ထိုအနက် ကျေးရွာ ၁၁ ရွာမှာ စိုးရိမ်ရေမှတ်သို့ ရောက်ရှိနေကြောင်း သိရသည်။ ပြည်သူများ ဘေးလွတ်ရာသို့ ရွှေ့ပြောင်းနိုင်ရေးအတွက် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ရွှေဘိုမြို့နယ် ပြည်သူ့ကာကွယ်ရေးအဖွဲ့ (ပကဖ) မှ အရေးပေါ် ကူညီဆောင်ရွက်ပေးလျက်ရှိသည်။ မိဘပြည်သူများအနေဖြင့် ရေဘေးသတိထားကြရန်၊ ကျန်းမာရေးနှင့် အဆိပ်ရှိသတ္တဝါများ၏ အန္တရာယ်ကို အထူးဂရုပြု နေထိုင်ကြရန် နှိုးဆော်ထားသည်။ လက်ရှိအချိန်တွင် ရေဘေးသင့် ကျေးရွာ ၁၇ ရွာ ဖြစ်သော ညောင်ပင်သာ၊ ကန်သာကုန်း၊ ကြောင်ရှာတော၊ ရေကြည်ဝ၊ ထူးကြီး၊ တည်ပင်၊ သန်းတော၊ သပုရာခြံ၊ မအူပင်၊ ရုံးတော၊ ညောင်ကိုင်း၊ ညောင်ပင်လှ၊ သောင်ထွဋ်ကိုင်း၊ ကူတိုးဆိပ်၊ ရေတော်မူ နှင့် ဝန်းစည်ရွာတို့မှ ထောင်နှင့်ချီသော ပြည်သူများ တိမ်းရှောင်နေရပြီး စားနပ်ရိက္ခာများလည်း အရေးပေါ်လိုအပ်လျက်ရှိကြောင်း သိရသည်။ အလားတူ ဝက်လက်မြို့နယ် အနောက်ခြမ်း မူးမြစ်အနီးရှိ ကျေးရွာ ၁၇ ရွာတွင် ရေလွှမ်းမိုးမှုများ စတင်ဖြစ်ပေါ်နေပြီး အချို့ကျေးရွာများမှာ ဆိုးဆိုးရွားရွား ထိခိုက်ခံစားနေရသည်။ ရေလွှမ်းမိုးမှုမှာ ဆက်လက် မြင့်တက်နေဆဲ ဖြစ်သည်။ ရေဘေးအတွင်း ပိတ်မိနေသော ပြည်သူများကို ဒေသခံ တပ်ရင်းများက တိုက်နယ်၊ မြို့နယ်နှင့် ရပ်ကျေး အဖွဲ့အစည်းများနှင့် ပူးပေါင်း၍ ကူညီကယ်ဆယ်ရေးလုပ်ငန်းများ ဆက်တိုက် ဆောင်ရွက်ပေးလျက်ရှိသည်။ လက်ရှိတွင် အရေးပေါ် ကယ်ဆယ်ရေးအတွက် စက်လှေ၊ အသက်ကယ်အင်္ကျီများ အပြင် ပြည်သူများအတွက် ရိက္ခာ၊ မိုးကာနှင့် ဆေးဝါးများ အရေးပေါ် လိုအပ်လျက်ရှိသည်။ ရေဘေးသင့် ကျေးရွာ ၁၇ ရွာ ဖြစ်သည့် သမန်သာကျေးရွာ၊ တည်တောကျေးရွာ၊ ဥယျာဉ်သာကျေးရွာ၊ မူးကြိုးကျေးရွာ၊ ဆွယ်ကွေ့ကျေးရွာ၊ မူးကမ်းလေးကျေးရွာ၊ သမ္မာရိုးကျေးရွာ၊ ကိုင်းရွာ၊ ရွှေအိုးရရွာ၊ နဘဲလှရွာ၊ သရက်ချိုရွာ၊ ကျောက်ကုန်းရွာ၊ မြင်းသည်ရွာ၊ ဥယျာဉ်သာရွာ (မြောက်ကွေ့)၊ မင်းကန်ကျေးရွာ၊ ရွှေပန်းကုံးကျေးရွာနှင့် ဘိုတဲကျေးရွာ တို့မှ ထောင်နှင့်ချီသော ပြည်သူများ တိမ်းရှောင်နေရသည်။ "အခုက စားနပ်ရိက္ခာတွေ အရေးပေါ်လိုအပ်နေတယ်။ ရှောင်နေရတဲ့ထဲမှာ စစ်ဘေးတိမ်းရှောင်နေရတဲ့ရွာတွေလည်း ပါပါတယ်။ ရေက မနေ့က အနည်းငယ် ပြန်ကျပေမယ့် မိုးက ညတည်းက အဆက်မပြတ်ကိုရွာနေတော့ ရေကပြန်တက်လာတာ တချို့က မပြောင်းကျဘူး။ ပိတ်မိနေတဲ့ သူတွေကိုလည်း ကယ်ဆယ်ရေး လုပ်ဆောင်နေရတယ်" ဟု ရေဘေးကယ်ဆယ်ရေး လုပ်ဆောင်နေသူတစ်ဦးက ပြောဆိုသည်။@ZayarTBZ 11 News - @zayartbz7news