@abdinaasir_cadaala21: Xil waa laguu dhici karaa, laakiin haybadiisii laguuma yeeli karo Wuxuu diiday in lala tartamo. Qaar xil iyo xoolo ayuu ku aamusiyey, halka kuwii diidayna uu albaabbada tartanka ka xiray, shahaadadii musharraxnimadana u diiday. Arrintani kuma koobna Guddoomiyaha Golaha Shacabka ee muddo-xileedkiisu dhammaaday, ee waxay u noqotay dhaqan siyaasadeed uu kula macaamilo xil kasta oo loollan dhab ahi ka dhalan karo. Haddaba, su’aashu waxay tahay: muxuu Xasan Sheekh uga cabsanayaa tartan furan? jawaabtu waa mid cad, waa kalsooni-darro labo dhinac ah. Marka koowaad, ma laha sumcad iyo haybad siyaasadeed uu si dabiici ah taageero ugu kasbi karo qofka uu doonayo. Wuxuu ogyahay in qofka uu dhisayo uu magaciisa ugu dhimanayo. Marka labaad, ma doonayo qof leh karti, sumcad iyo madax-bannaani u xilka loo tartamayo ku hanan karo. Wuxuu doonayaa qof isaga ku tiirsan, waayo qof isku kalsoon, han leh, go’aan madax-bannaanna qaadan kara si fudud uma maamuli karo. Xilku waa mansab; xilkasnimaduse waa karti iyo dhaqan la kasbado. Qof xil waa loo magacaabi karaa, doorasho waa loogu xoogi karaa, kursina waa lagu fariisin karaa; laakiin kursigu qofka ma siin karo waxa aanu lahayn. Soomaalidu waxay tiraahdaa: “Dhar magaalo xirashadiis, dhal magaalo laguma noqdo.” Sidaas oo kale, xil la qabto kuma siin karo dhaqan, hido iyo haybad dowladnimo oo aanad hore u soo kasban. Dalkeenna dagaalladii sokeeye ma dumin dowladdii oo keliya; waxay sidoo kale burburiyeen dhaqankii, hiddihii, anshaxii iyo akhlaaqdii dowladnimo. Waxaa dumay hannaankii ay jiilashii waayo-aragga ahaa aqoontooda, xirfaddooda iyo waayo-aragnimadooda dowladnimo ku dhaxalsiin lahaayeen jiilasha ka dambeeya. Sidaas darteed, dowlad-dhiska Soomaaliya waa laba jid oo is barbar socda: dhismaha hay’adaha dowladeed iyo dhismaha dhaqanka, hidaha, anshaxa iyo akhlaaqda dowladnimada. Midkood kan kale la’aantiis ma hanaqaadi karo. Halkii uu labadaba dhisi lahaa ayuu Xasan Sheekh si isku mid ah labadaba u burburiyey. Illeen ruuxu wax aanu haysan ma bixiyo. Xil kasta oo lagu magacaabo ama laguu xoogo kuma siin karo waayo-aragnimo aadan lahayn, kugumana abuuri karo garasho siyaasadeed, dulqaad hoggaamineed iyo haybad aadan hore u soo kasban. Farqi ayaa u dhexeeya qof haybaddiisa la yimaada xilka iyo qof xilka ka raadiya haybad. Kan hore aqoontiisa, waayo-aragnimadiisa iyo miisaankiisa ayuu hay’adda ku dhisaa; kan dambena xilka ayuu ka amaahdaa miisaan aanu lahayn, sidaas darteedna wuxuu ku sii tiirsanaadaa awooddii kursiga keentay.

Abdinaasir Cadaala

Open In TikTok:

Region: SO

Monday 10 August 2026 16:02:35 GMT