@musabko4: ما كنت زول عادي ولا حاجة بتتكرر… إنت كنت فنجان قهوة، وسكّرة بتجي في وقتها… 🖤 بتذكر يوم قلت لي: «عيونك والفنجان والسكر… الزول البشرب من ديل، ذنبو شنو لو سكر؟» أنا وقتها خبّيت وشي بين يديّ من الخجل، وحاولت أغيّر الكلام وأمشي بي الموضوع بعيد… لكن تنهيدتك جات فجأة، وباغتتني، ورميت يا بنفسج على قلبي كلمة، ما خلتو زي الأول… خلّيتو يصحى من حاجة كان فاكرها ماتت. وقلت لي: «أما بعد… يا أنا، بتعرفي الطريق ليك كان طويل كيف؟ المسافة بيني وبينك كانت كفاية تخلي الزول ينسى، لكن أنا ما كان عندي زاد غير صورة، ورسالة محتفظ بيها في دفتر. إنتِ كنتِ هناك… وأنا هنا، ساكت، من غير قلب صاحي، ولا نبضة عندها معنى، ولا روح عارفة تمشي وين. الغريبة إنو كل الحاجات ألفتك قبلي… حتى البنفسج، اللون البحبّو، هاجر ليك وبقى ساكن في تفاصيلك. وقتها حكيتِ لي إنك بتحبي الأسود، وإنك بتستعملي القلب الأسود لما تعبّري عن الحب والامتنان… وإنك بتحبي تتوسدي البنفسج، اللون البعتبروا أنا آخر حتة أمان في الدنيا دي. ومن اللحظة دي قلت ليك: أنا كمان حبيت الأسود… وبقيت أستخدم القلب الأسود عشان أعبّر عن الحب، لأنو بقى إنتِ. وبقيت أتمنى كتفك يكون مكاني، لمن تتوسدي البنفسج البحبّو. قام البنفسج غار يا أنا… زعل، وأعلن حدادو، ولبس الأسود… وبعد شوية لقى نفسو هو ذاتو وقع في حب الأسود. وانتهى الخصام… والحبيبين اتلاقوا بعد ما كان بينهم شرخ.» ومن يومها، كل ما أتذكر كلامك، بقيت أحط جنب فنجان القهوة الأسود وردة بنفسجية… يمكن عشان أقول للونين: خلاص، ما دايرين حرب تاني. 🖤💜 ما دايرة الخصام يرجع، ولا دايرة المسافة تنسّيك تزود السكر في الفنجان، عشان تكمل الجملة البحب أسمعها منك… وأرد عليك أنا وأقول: ما كنت زول عادي… كنت فنجان وسكّرة، دفا في زمن البرد، وحاجة حلوة جاتني من غير ميعاد. والبنفسج يا عزيزي، من غير سوادك بخسر جزء من حكايته… والأسود من غير بنفسجو ببقى لون ساكت، ما عندو روح. خليك بخير… فعيونك السوداء ما كانت خدعة، لكن يوم البنفسج غازلها، الحاجات الكانت مخبّية جواها كلها ظهرت. ويا عزيزي… العطشانين عندنا ما بنوعدهم بمويه ساكت، لكن بنقول ليهم: في عيونك نهر… والزول البلقى نفسو غرقان فيهو، ما بفتش لي نجاة. 🖤💜