@dhammathutalan: ========={ 🙏 }======= အပ္ပမာဒေါ အမတံ ပဒံ၊ ပမာဒေါ မစ္စုနော ပဒံ။ အပ်ပမတ်တာ န မီယန်တိ ၊ ယေ ပမတ်တာ ယထာ မတာ။ မသေရခြင်း၏ အကြောင်းခံတရားကား မမေ့ခြင်းတည်း။ သေရခြင်း၏ အကြောင်းခံတရားသည်ကား မေ့မေ့နေခြင်းတည်း။ အကြင်သူတို့သည် မမေ့။ ထိုသူတို့ကား သေသော်မှလည်း သေကြရမည်မဟုတ်ကြပါကုန်။ အကြင်သူတို့သည်ကား မေ့နေကြပါကုန်၏။ ထိုသူတို့အဖို့ကား မသေသော်မှ သေသည်နှင့် ဘာမျှမခြားနားကြလေကုန်။ ∗ ∗ ∗ ဘုရားရှင် ရွှေလက်ထက်တော်က … ၊ ကောသမ္ဗီပြည်ဝယ် ဘုရင် ဥတေနမင်းစော စိုးစံ၍ နေချေရာ ၎င်းဝယ် သာမာဝတီ၊ မာဂဏ္ဍီစသည့် မိဖုရားများ အများအပြား ရှိချေ၏။ ထိုတွင် သာမာဝတီကား ဘုရင်ကိုယ်တိုင် အလိုတော်ကျ၍ သိမ်း ပိုက်ခံထားရသော ဘုရင်ချစ် မိဖုရားတစ်ပါးတည်း။ မာဂဏ္ဍီကား ဦးရီးတော်စူဠမာဂဏ္ဍီဆက်သသဖြင့် ဘုရင် လက်ခံထားရသော ဦးရီးတော်ကြိုက် ဘုရင်ပိုက် မိဖုရားတစ်ပါး တည်း။ ဤသို့လျှင် အခြေခံကွဲ မိဖုရားတွဲဖြစ်နေကြပါ၏။ တစ်ဖန်လည်း...၊ မာဂဏ္ဍီကား သူမအား မိဘနှစ်ပါးတို့က ဘုရားသို့ ပေးစားချေရာ ဘုရား ရှင်ကား ပေးတိုင်းမစားသည့်အပြင် သူမကို ပိုးလောက်တို့ မှီခိုရာအိမ်ကြီးအဖြစ် မသတီစရာ, စက်ဆုပ်ရွံရှာဖွယ်ရာအဖြစ် အပြစ်ပြကာ မှိုချိုးမျှစ်ချိုး ချိုးဖဲ့ နှိပ်နယ်တော်မူလိုက်ရာမှ ဘုရားရှင်အား ရန်ငြိုးထားလျက်က ကလဲ့စားချေရန် စောင့်ဆိုင်းနေသူတစ်ဦးတည်း။ သာမာဝတီမှာမူကား ကျွန်မခုဇ္ဇုတ္တရာ (ခါးကုန်းမ ဥတ္တရာ)၏ တရား နာကြားမိချေရာ ဘုရားရှင်အား မမြင်ဘူးပါဘဲလျက်က ကြည်ညိုသဒ္ဓါပွား ဖူးမြော်ခွင့်ရရန် စောင့်စားနေလေသူတစ်ဦးတည်း။ ဤသို့လည်း ၎င်းတို့နှစ်ဦးကား ကွဲပြားခြားနားကြပါသေး၏။ တစ်နေ့ …၊ ထိုတစ်နေ့ကား ၎င်းမိဖုရားနှစ်ပါး မိမိတို့ စိတ်ဖဝါးထား တာစူထားရာဘက်များဆီသို့ ဘဝခရီးသွား တာထွက်သောနေ့တည်း။ သာမာဝတီသည် … (က) မာဂဏ္ဍီ မကြိုက်သော ဘုရားရှင်အား ဖူးမြော် ဦးခိုက်မှု လှူဒါန်းမှုကတစ်မှု၊ ( ခ ) မာဂဏ္ဍီ အလွန်ကြိုက်လှသော ဥတေနမင်းစောက သာမာဝတီအား အရေးပေးခံရမှု ချီးမြှောက်မှုကတစ်မှု၊ ထိုနှစ်မှုကို တစ်ပေါင်းတည်းကျခံစေသောအားဖြင့် ယင်း သာမာဝတီနှင့်တကွ နောက်လိုက်အပေါင်းပါမိဖုရား (၇ဝဝ)တို့အား ဥတေန၏မျက်ကွယ်ဝယ် မီးလောင်တိုက်သွင်း၍ အဆုံး စီရင်လိုက်ချေသည်။ တစ်ဖန် ဥတေနမင်း ပြန်လည်ရောက်ရှိလာသောအခါ မာဂဏ္ဍီနှင့် နောက်လိုက်အပေါင်းပါ ဆွေမျိုးအားလုံးတို့အား လည်း ၎င်းကြိုက်မိဖုရားများကို မီးစာကျွေးလိုက်ပါသည်ကို ပြစ်ဒဏ်ပေးသောအားဖြင့် … မာဂဏ္ဍီမှအပ ကျန်နောက်လိုက်အပေါင်းပါ ဆွေမျိုးအားလုံးတို့ကို ကိုယ်တို့ကိုကား မြေကျင်းထဲဝယ် မြှုပ်၊ လည်ပင်းနှင့် ဦးခေါင်းများကိုသာ မြေပေါ်ဝယ် ဖော်ထုတ်ထားလျက်က အလွန် အသွားထက်လှသော သံထွန်သွားတပ် ထွန်များဖြင့် မညီမညာသော ကုန်းကမူများကို တိုက်ဆွဲ ဆွဲချလေသည်ပမာ, မြေမြုပ်ကျောက်ခဲတုံးများကို နှဲ့ချွတ် တိုက်ချွတ်ပေးနေသည့်ပမာ မသေမချင်း ထွန်ယက်သတ်ဖြတ်ခြင်းကို ခံယူကြရပါ ကုန်၏။ တစ်ဖန် မာဂဏ္ဍီကိုကား မိမိ၏ရမ္မက် လက်သပ်မွေး အရေးပေးထားမိမှု၊ တစ်ဖက်သားသို့ မိမိနှင့်တန်းတူမထား ကိုယ်ချင်းစာ တရားခေါင်းပါးမှု ထိုနှစ်မှုတို့ကို တစ်ပေါင်းတည်းကျခံစေသောအားဖြင့် … အသားစားကျူး ဆာလောင်မှုဘီလူးပူးနေသူ၏ သားတစ်ကိုလည်း ကြော်လှော်၊ ဒယ်အိုးပေါ်မှာပင် ကော်စားနေပါသည့် ပမာ, ကိုယ့်အသားကိုပင် သတ်ဖြတ် ကိုယ်ကိုယ်တိုင်ပင်လျှင် ဖိုခွင်နားသို့ကပ်ကာ စားသောက်နေပါသည့်ပမာ... အများတို့မြင်ကွင်း နန်းရှေ့မြေသလင်းဝယ် ဆီချက် ဒယ်အိုးကြီး တည်လျက်က၊ မိမိ၏ပေါင်သား စသည်များကို မိမိပင် ဓားဖြင့်လှီးဖြတ်၊ လှီးဖြတ်ပြီး ကြော်လှော်ကာ စားသောက်ပြရင်း သေခင်းထဲသို့ ချဉ်းနင်းဝင်ရောက်စေပါသည်။ ထိုသာမာဝတီတို့အုပ်စု၊ ထိုမာဂဏ္ဍီတို့အုပ်စု၊ ထိုအုပ်စုနှစ်ခုတို့၏ သေလမ်းခရီးသွားကား မတူညီကြချေ။ (က) သာမာဝတီအုပ်စုကား ဘဝဝဋ်ကြွေး ပေးဆပ်သွားခြင်းနှင့် အ ဟောင်းကြွေး ပေးဆပ်သွားကြခြင်းတည်း။ ( ခ ) မာဂဏ္ဍီအုပ်စုကား ကာမဝဋ်ကြွေး ကိုယ်ဖြင့် စတေးရပြီး အသစ်ကြွေး ယူငင်သွားကြခြင်းပင်တည်း။ ထိုအုပ်စုနှစ်ခုတို့၏ စိတ်နေ ဖဝါးထား ဦးတည်ပုံအရာများလည်း မတူညီကြချေ။ “ညီမတော်တို့ … ငါတို့တစ်တွေ… သည်လိုမီးလောင်တိုက်သွင်းလျက်က အသက် ရန် အနာခံကြရခြင်းမှာ ညီမတော်မာဂဏ္ဍီ၏ အပြစ်လုံးဝ မပါပါ။ စင်စစ် ငါတို့၏ နောက်ခံဘဝဝဋ်ကြွေးကြောင့်သာ ဖြစ်ကြရပါသည်။ သို့ကြောင့် ညီမတော် မာဂဏ္ဍီဆီသို့လည်း စိတ်မစေစား၊ မိမိ၏ ခန္ဓာ ကိုယ်ကို မီးဝါးမျိုနေပါသည်ကိုလည်း အလကား မထားဘဲ မီးနှင့် ခန္ဓာအကြား ဈာန်စိတ်၊ ဉာဏ်စိတ်သွင်း မြှုပ်နှံထားလျက်က အသက်အသေခံကြပါကုန်စို့” ဤကား သာမာဝတီ၏ စိတ်သွားလမ်းကား။ “ရက်စက်ကြပါလေရဲ့ အာဏာပါးကွက်သားတို့ရယ်... ငါသည် မင်းမိဖုရားဆိုသည်ကို ဒင်းတို့အသိပင် ဖြစ်ကြလျက်က ငါ့အား ဓားမိုး၊ တုတ်ထမ်း၊ အကြမ်းအရမ်းဖြင့် ခိုင်းစေနေကြ၏။ ဒင်းတို့လည်း တစ်နေ့ သို့မဟုတ် တစ်နေ့ ငါ့လက်တွင်း သက်ဆင်းကြရလေသောအခါ ငါကဲ့သို့လျှင် ခံကြစေရမည်” ဆက်ရန်>>>