@punsara_quotes: දන්නේ නෑ මේ කතාව කොහෙන් පටන් ගන්නද, කොහෙන් ඉවර කරන්නද කියලා. සමහර කතා තියෙනවා, ඒවට ලස්සන අවසානයක් ලියන්න බැහැ. ඒ කතා ලියවෙන්නේ හිතේ තියෙන දේවල්වලින්ම විතරයි. මේකත් ඒ වගේ කතාවක්. මේ සිංදුව ඇහෙන හැම වෙලාවකම මගේ පපුව ඇතුළෙන් හරි අමුතු වේදනාවක් එනවා. සිංදුවේ කියන කතාව මගේ කතාවට ගැළපෙන්නේ නැති බව මම දන්නවා. ඒත් ඒකේ එක එක වචන අතරින් මට ඇහෙන්නේ ඔයාගේ නම විතරයි. මට පේන්නේ ඔයාගේ මූණ විතරයි. මට මතක් වෙන්නේ ඔයාට ආදරේ කරන මගේ මේ හිත විතරයි. ඔයා ඒ ආදරය දන්නවා. මම ඔයාට කොච්චර ආදරෙයිද කියලත් ඔයා දන්නවා. ඒත් සමහර හැඟීම් දෙන්නම දැනගෙන හිටියත්, ඒවාට අපි කැමති විදිහේ අවසානයක් ලැබෙන්නේ නැහැ. ඔයා මට කිසිම වැරැද්දක් කරලා නැහැ. ඒක තමයි මට මේ හැමදේම තවත් අමාරු කරන්නේ. ඔයා මගෙන් ඈත් වුණේ නෙමෙයි. ඔයා මට හැමදේම පැහැදිලිව කියලා දුන්නා. ඔයාට මගේ වෙන්න බැරි හේතුව මට තේරුම් ගන්න පුළුවන් විදිහට කිව්වා. ඒ හේතුව මට රිදුණත්, ඒක අසාධාරණ දෙයක් නෙමෙයි. ඔයාගේ දෙමව්පියන් වෙනුවෙන් තියෙන ආදරය, ඔවුන්ගේ විශ්වාසය, ඔයාගේ ජීවිතය ගැන ඔයාට තියෙන වගකීම… ඒ හැමදේම මට තේරෙනවා. ඒ නිසා ඔයාට මගේ පෙම්වතිය වෙන්න බැරි වුණා කියලා මම කවදාවත් ඔයාට දොස් කියන්නේ නැහැ. මොකද මට තේරෙනවා, සමහර වෙලාවට ආදරේ තිබුණත් ජීවිතේ තෝරගන්න වෙන දේවල් තියෙනවා කියලා. ඇත්තටම මගේ හිතේ තිබුණු තවත් එක ආසාවක් තිබුණා. ඒ තමයි ඔයාගේ ජීවිතේ පළමු පෙම්වතා වෙන්න. ඔයාගේ හිතට පළමුවෙන්ම ආදරේ කියන හැඟීම හඳුන්වා දෙන කෙනා වෙන්න. මීට කලින් කිසිම කොල්ලෙක් එක්ක ආදර සම්බන්ධයක් තිබුණේ නැති, මට දැනුණු විදිහට හරිම අහිංසක, චාම් ගතිගුණ තියෙන, මේ ලෝකේ මම දැකපු ලස්සනම ගැහැනු ළමයා වෙච්ච ඔයා… මගේ ජීවිතේ මම මෙච්චර ආඩම්බරයෙන් බලපු කෙනෙක් තවත් නැහැ. ඔයාගේ ඒ අහිංසකකමට, ඒ චාම්කමට, ඔයාගේ හිතේ තියෙන ඒ ලස්සනට මම ආදරේ කළා. ඒ නිසාම මට හිතුණා, කවදාහරි ඔයාගේ ජීවිතේ මගේ නමත් ලස්සන මතකයක් විදිහට තියෙයි නම් කොච්චර ලස්සන වෙයිද කියලා. සමහර වෙලාවට මම මගෙන්ම අහනවා, “ඇයි මෙච්චර ආදරේ කළේ?” කියලා. ඒකට මටවත් උත්තරයක් නැහැ. ඔයා මගේ වෙයි කියලා මම දන්න පොරොන්දුවක් තිබුණේ නැහැ. ඒත් මගේ හිතට ඔයා ගැන දැනුණු ආදරය නවත්තගන්නත් මට බැරි වුණා. ඔයා මගේ ආදරය දැනගෙනත්, මගේ හිතේ තියෙන දේ තේරුම්ගෙනත්, ඔයාට පුළුවන් සීමාවන් ඇතුළේ ඉන්නවා කියලා මම දන්නවා. ඒක මට රිදුණත්, ඒකට ඔයාට දොස් කියන්න මට බැහැ. මම කරපු කැපකිරීම් ගැන ඔයා දන්නවා. මම නොකියා ඉවසපු දේවල්, ඔයාට කරදරයක් වෙයි කියලා නවත්තපු දේවල්, ඔයා සතුටින් ඉන්නවා දැකලා මම මගේ දුක හංගපු දවස්… ඒ හැමදේම ඔයා නොදන්න දෙයක් නෙමෙයි. ඒත් මම ඒවා කළේ ඔයාට ණයක් තියන්න නෙමෙයි. මගේ ආදරය ඔයාට බරක් කරන්නත් නෙමෙයි. මට පුළුවන් විදිහට ඔයා වෙනුවෙන් ඉන්න හිතුණා. ඒකයි කළේ. සමහර වෙලාවට හිතෙනවා, මිනිහෙක්ට තවත් කෙනෙක් වෙනුවෙන් මෙච්චර කැප වෙන්න පුළුවන්ද කියලා. තමන්ගේ හිත රිදෙන බව දැන දැනත්, තමන්ට ඕන දේ පැත්තකට දාලා, ඒ කෙනා සතුටින් ඉන්නවා නම් ඒ ඇති කියලා හිතන්න පුළුවන්ද කියලා. මම ඒකෙන් ලොකු කෙනෙක් වෙන්න හදන්නේ නැහැ. මම කළේ ආදරේ නිසා. ඔයාට මගේ වෙන්න බැරි වුණත්, ඔයා වෙනුවෙන් මගේ හිතේ තිබුණු ආදරය අඩු කරගන්න මට බැරි නිසා. ඒත් සමහර රෑවල් තියෙනවා… හිත ඇතුළේ තියෙන මේ හැමදේම දරාගන්න බැරි තරමට බර වෙන. කිසිම දෙයක් නොහිතා, කිසිම දෙයක් නොදැන, මේ වේදනාවෙන් ටිකකට හරි මිදිලා නිහඬව ඉන්න තිබුණා නම් කියලා හිතෙන තරමට හිත හෙම්බත් වෙන වෙලාවල් තියෙනවා. ඒ වෙලාවට කඳුළු එන්නේ ඇයි කියලවත්, පපුව මෙච්චර රිදෙන්නේ ඇයි කියලවත් මට තේරෙන්නේ නැහැ. ඒත් ටික වෙලාවකට පස්සේ ආයෙත් ඔයා මතක් වෙනවා. එතකොට මට තේරෙනවා… මේ හැම වේදනාවක්ම ආදරේ කරපු හිතක ඉතුරු වෙලා තියෙන දේවල් කියලා. ඔයාට මගේ ආදරය තේරෙන්න කියලා මම කවදාවත් බලෙන් ඉල්ලන්නේ නැහැ. මගේ වටිනාකම ඔයාට ඔප්පු කරන්නත් මට ඕනෙ නැහැ. මොකද ආදරයක් කියන්නේ කෙනෙක්ව තමන්ගේ කරගන්න කරන තරඟයක් නෙමෙයි කියලා මම ඔයාගෙන්ම ඉගෙන ගත්තා. ඔයා මගේ ආදරය දන්නවා. ඒක මට ඇති. මගේ හිතේ තියෙන දේ ඔයාට නොදැනෙන එක ගැන දුක් වෙනවාට වඩා, ඒක දැනගෙනත් ඔයාට ගන්න බැරි තීරණයක් තියෙන බව පිළිගන්න මම උත්සාහ කරනවා. ඇත්තටම මට තිබුණු එකම ආසාව ඔයා මගේ පෙම්වතිය වෙන එක විතරක් නෙමෙයි. ඔයා ජීවිතේ දිනනවා බලන එක. ඔයාගේ හීන එකින් එක සැබෑ වෙනවා බලන එක. ඔයාගේ මූණේ තියෙන ඒ හිනාව කිසිම දවසක නැති නොවෙනවා බලන එක. ඔයා මගේ ළඟින් හිටියත්, මගෙන් ඈතක හිටියත්, ඒ සතුට ඔයාට තියෙනවා නම් මම ඒකට සතුටු වෙනවා. මට ඔයාගේ අත අල්ලගෙන හැම පාරකම යන්න බැරි වුණත්, ඔයා යන පාර හරි කියලා දැනගෙන සැනසෙන්න මට පුළුවන්. කවදාහරි අපි දෙන්නට එකට යන්න පුළුවන් පාරක් ලැබුණොත්, ඒ දවස මගේ ජීවිතේ ලස්සනම දවසක් වෙයි. ඒත් එහෙම දවසක් නොලැබුණත් මම ඔයාට වෛර කරන්නේ නැහැ. ඔයාගේ හිතට සාධාරණයි කියලා හිතෙන තීරණය මොකක් වුණත් මම ඒක තේරුම් ගන්න උත්සාහ කරනවා.

𝑃𝑢𝑛𝑠𝑎𝑟𝑎! 🌙.

Open In TikTok:

Region: LK

Thursday 13 August 2026 02:32:15 GMT