သောတာပန်မှာ ကာမဂုဏ်အာရုံတွေကို သာယာတပ်စွဲတဲ့ ကာမရာဂ-ဆိုတာလဲ ရှိပါသေးတယ်ဗျာ၊ ဗျာပါဒ-ဒေါသဆိုတာလဲ ရှိပါသေးတယ်၊ မောဟတို့၊ မာနတို့ ဆိုတာတွေလဲ ရှိပါသေးတယ်၊ ဒါပေမယ်လို့ သူတစ်ပါး၏ အသက်ကို သတ်နိုင်လောက်အောင်တော့ အကုသိုလ်က ပြင်းပြင်း ထန်ထန် ထက်ထက်သန်သန် မဖြစ်တော့ဘူး၊ လောဘ ဒေါသတွေမဖြစ်ပေါ်လာပေမယ်လို့ သူတစ်ပါးကို သတ်နိုင်လောက်အောင်တော့ မပြင်းထန်တော့ဘူး၊ အကုသိုလ် ဒီဂရီဟာ လျော့သွားပြီ၊ အဲဒါ ဘာကြောင့်တုန်းလို့ဆိုရင် သတိက ကောင်းနေလို့၊ သတိက နောက်ကလိုက်ပြီး ထိန်းနေလို့ပါဘဲ၊ ဒီလိုဖြစ်ပုံကို တရား အားထုတ်ထားတဲ့ ပုဂ္ဂိုလ်တွေဟာ ကိုယ်တိုင်ပဲတွေ့ရပါတယ် ၊ အားမထုတ်ရသေးတဲ့ပုဂ္ဂိုလ်တွေကတော့ ဒါကိုမှန်းဆပြီး ကြည့်ကြပေါလေ၊ မှန်းဆပြီး ကြည့်ကြပေါ့လေ၊ မယုံမကြည်တော့ မရှိကြနဲ့၊ ဟုတ်ကောင်း ပါရဲ့လားလို့ ဒီလိုတော့ ယုံကြည်ထားမှ ဖြစ်မှာ၊ ဘာကြောင့်လဲဆိုရင် “သောတာပန်ဟာ အပါယ်ကျရောက်စေတတ်တဲ့ အကုသိုလ်ကို မပြုတော့ဘူး၊ သူတစ်ပါး အသက်ကိုလဲ မသတ်တော့ဘူး” ဆိုတာကို မြတ်စွာဘုရားကိုက ဟောထားတာ၊ ဘုန်းကြီးတို့လဲ တရားအားထုတ် ကြည့်ထားလို့ “အဲဒီအတိုင်း မှန်ကန်တယ်”ဆိုတာကို သိတန်သလောက် သိရပါတယ်၊ ဒါကြောင့် ကိုယ်တိုင်တွေ့သိချင်ရင် တရားကို တကယ်တမ်း အားထုတ်ကြည့်ပါ၊ ပိုင်ပိုင် နိုင်နိုင် အားထုတ်မိတဲ့ အခါမှာ ဒီသဘောကို ကိုယ်တိုင်ပဲ တွေ့ရပါလိမ့်မယ်၊ ဘယ်လို သဘောလဲဆိုရင် သတိအစောင့်အရှောက်ကလေးတွေက နောက်က ထက်ကြပ်လိုက်နေတဲ့သဘောပါပဲ၊ လိုက်လာပုံကတော့လိုချင်စရာ နှစ်သက်တပ်မက်စရာ အာရုံနဲ့တွေ့ရင် နှစ်သက်တပ်မက်တဲ့ လောဘဟာ ရုတ်တရက်ဆိုတော့ ဖြစ်ပေါ်လာတတ်သေးတာပဲ။ စိတ်ဆိုး စရာနဲ့တွေ့ရင် ဒေါသလဲ ဖြစ်ပေါ် လာတတ်သေးတာပဲ၊ စိတ်ဆိုးစရာနဲ့ တွေ့ရင် ဒေါသဟာလဲဖြစ်ပေါ် လာတတ်သေးတာပါပဲ၊ လုံးလုံးကင်းတာမှ မဟုတ်သေးဘဲဟာကိုး၊ ဖြစ်တော့ ဖြစ်သေးတာပါပဲ၊ ဒါပေမယ့် အဲလောဘ၊ ဒေါသတွေဟာ တော်တော်ပြင်းထန်လာပြီဆိုမှဖြင့်အစောင့် အရှောက် သတိကလေးက နောက်ကလိုက်ပြီး၊ အဲဒီလိုသတိကလိုက်ပြီး အုပ်လိုက်တော့ လောဘ၊ ဒေါသတွေဟာ အရှိန်လျော့ပြီး ပျော့ကျသွားတယ်၊ သာမန်ပုထုဇဉ် ပုဂ္ဂိုလ်များမှာလို ပြင်းပြင်းထန်ထန် မဖြစ်ရတော့ဘူး၊ ဒါကြောင့် လောဘ၊ ဒေါသတွေဟာ မကင်းသေးလို့ဖြစ်ပေမယ့် သူတစ်ပါးအသက်ကို သတ်နိုင်လောက်အောင်တော့ မဖြစ်ဘူး၊ သူတစ်ပါးဥစ္စာကို ခိုးနိုင် လောက်အောင်လဲ မဖြစ်ဘူး၊ သူတစ်ပါး အကျိုးမဲ့ လိမ်နိုင်လောက်အောင်လဲ မဖြစ်ဘူး၊ ဒါကြောင့် “သောတာပန်ဟာ အပါယ်ကျစေတတ်တဲ့ အကုသိုလ်ကို မပြုဘူး၊ အပါယ်လေးပါးလဲ မကျနိုင်ဘူး” မြတ်စွာဘုရားက ဟောထားတာတဲ့။ မဟာစည်ဆရာတော်ကြီးပြောပြသော အရိယာတို့သဘော စာအုပ်မှ ထုတ်နှုတ်၍ ဓမ္မဒါနပြုပါသည်။ Vibijja Mdy - @myint.tar2