"መሓዙት ሃብታም ብዙሓት—ድኻ ግና ሓዉ'ኳ ይጠልሞ" ከምዝበሃል፡ ዓለም ከለኻን ከለካን እያ። እንተልዩካ ሰባት ባዕሎም ደልዮም ፈትሾም ይረኽቡኻ፤ እንተዘይብልካ ግና እቶም ኣለዉኒ እትብሎም እኳ ይኸድዑኻ። ስለዚ ጁባኻ ገንዘብ፡ ርእስኻ ድማ ፍልጠት ኣይግደሎ! ብባህሪኦም ሰባት ብጥቕሚ እዮም ናብ ሰብ ዝጽግዑ። እተን ናብ ሰብ ዝጽግዑለን ምኽንያታት ድማ እቲ ሰብ ትሕዝቶ ዘለዎ ወይ ፍልጠት ዝመልኦ ምስ ዝኸውን እዩ። ነቲ ፈላጥ ብፍልጠቱ ክጥቀምሉ፡ ነቲ በዓል ገንዘብ ከኣ ብገንዘቡ ክጥቀምሉ ስለዝሓስቡ ክጽግዑ ግድን ይኾኖም። ኣስተውዒልኩም'ዶ ሓደ ሃብታም ክመውት ከሎን ሓደ ድኻ ክመውት ከሎን ዘሎ ሸበድበድ፧ ሳጹን ሃብታም ብዓጀብቲ ኣዕለቕሊቑ ዘይከኣል ኮይንዎም እምበር "ኣብ ክንዳኻ ክንመውት" ክብሉ ቅሩብ እዩ ዝተርፎም። ሳጹን ድኻ እንተሪኢኹማ ድማ ዘርኢ ዝወሓዶ ሓረስታይ ይመስል ርሕቕ ርሕቕ ኢሎም ዝዓጀቡ ኣዝዮም ውሑዳት እዮም። ከምኡ'ውን በዓል ዝና እንተሞተ ኣጀብቱ ወደር ኣልቦ እዮም። ንሰብ ብመጠን ስርሑን ግብሩን ዝግባእ ክብሪ ምሃብ ጸገም የብሉን—ኣብኡ ተቓውሞ የብለይን። እቲ ሰብ መዓስ ኣብ ዙርያኻ ከም ዝዓስል ምርዳእ ግን ኣገዳሲ እዩ። ስለዚ እዩ ከኣ ንሰብ "ነዓ ሰዓበና" ኢልና ክንኲሕኲሖ ዘይኮና፤ እቲ ንነፍስና ዘድልያ ህንጸት ኢና ክንሃንጽ ዝግብኣና። ብድሕሪኡ ከይሓተትናዮም፡ እቶም ዝደለናዮም ኮኑ ዘይደለናዮም ዙርያና ክመልእዎ እዮም። ርኢኻ፦ ምሕዝነት ሰባት ኣብ ጁባኻን ኣብ ርእስኻን ዝተሓጽረ እዩ። ኣብቲ ንዓኻ ምምሳልን ኣብ ነፍስኻ ምእማን ዝብል ከይዲ እንተርዒምካ ግና ምህላውን ዘይምህላውን ናይ ሰባት ቀዳማይ ጉዳይካ ኣይኮነን። ቀዳምነት ንስኻ እኻ! ነዚ እዩ ኸኣ መሓዛ ነፍሱ ክትኮውን ዝገበኣካ። ኣብቲ ነፍስኻ ምኽባርን ቀዳምነት ምሃብን፡ ኣብኡ ምዕዋትን ምቕሳን ኣሎ እሞ እቲ ንዓኻ ዘቕስን ምረጽ። ከለኻ ንምንባር ኣስተማቕሮ—ከለካ ገዛእ-ርእስኻ ኣቐድም። እቲ ኣገዳሲ ሰባት ምህላዎም ዘይኮነ ንስኻ ምህላውካ እዩ ንዓኻ ዝጠቅም! - @kidanzelalem