ရုပ်ရှင်တစ်ကားမှာ ငိုဟစ် ပေါက်ကွဲ ဇာတ်နာပြမှ သနားစဖွယ်ဖြစ်နေမှ actingကောင်းသူရယ်လို့ ကြည့်ရှုသူ ပရိသတ်တွေက သတ်မှတ်ခဲ့ကြတဲ့ ကာလဟာ အချိန်အတိုင်းတစ်ခုအထိ ရှိခဲ့ပါတယ်။ ဒီလိုအလှုပ်ဇာတ်ရုပ်တွေ ရိုက်ပြနိုင်မှ ဒါအကယ်ဒမီဇာတ်လို့ ယူဆကြသလို သရုပ်ဆောင် အများစုကလည်း ဒီလုပ်ကွက်တွေများမှသာ လက်ခံရိုက်ကူးကြပြီး အငြိမ်ဇာတ်ရုပ်မျိုးတွေဆို သိပ်မရိုက်ချင်ကြတဲ့ ကာလတစ်ခုရှိခဲ့တယ်။ အဲ့ဒီလို လွဲမှားတဲ့ အယူအဆတွေကို တဖန်ပြန်လည် ရိုက်ချိုးနိုင်ခဲ့ပြီး အငြိမ်ဇာတ်ရုပ်တွေဟာလည်း ပညာပြတက်ရင် ပြတက်သလို ပရိသတ်ရင်ကို ထိမှန်စေနိုင်တာပဲလို့ သက်သေထူနိုင်ခဲ့တာကတော့ "ချစ်လှစွာသော အမုန်း" ရုပ်ရှင်ကားမှ သက်မွန်မြင့်ရဲ့ သရုပ်ဆောင်ချက်များပဲ ဖြစ်ပါတယ်။ ဒီဝတ္ထုဖတ်ပြီးချိန်မှာ ဇာတ်ကောင်အမျိုးသမီး နှစ်ယောက်လုံးအပေါ် ဂရုဏာသက်မိပေမယ့် အမုန်းဇာတ်ကောင်ကတော့ လုပ်ပြရင်လုပ်ပြနိုင်သလို အကယ်ဒမီမှန်းလို့ရမယ့် ဇာတ်ရုပ်လို့ ထင်ခဲ့ပြီး မိုးစက်မေဇာတ်ရုပ်ကိုတော့ သိပ်လုပ်ပြနိုင်ခွင့် မရနိုင်ဘူးလို့ ထင်မြင်ခဲ့မိပါတယ်။ ဒီလိုနဲ့ ရုပ်ရှင်ရုံတင်ပြသချိန်မှာတော့ ကျွန်တော့်ရဲ့ အကြိုထင်မြင်ယူဆချက်တွေဟာ တက်တက်စင်အောင် လွဲခဲ့ရပြီး ရုပ်ရှင်ရုံထဲက ပြန်အထွက်မှာ ရင်ထဲစွဲကျန်ခဲ့ရတာကတော့ မိုးစက်မေဆိုတဲ့ ဇာတ်ကောင်ပဲ ဖြစ်သွားခဲ့ရပါတယ်။ ထိုသို့သော ခံစားချက်မျိုး ဖြစ်သွားနိုင်အောင် စွမ်းဆောင်ခဲ့ကတော့ သက်မွန်မြင့်ရဲ့ ဒီဇာတ်ကောင်အပေါ် စီးမျောနိုင်စွမ်းနဲ့ ပီပြင်လှတဲ့ သရုပ်ဆောင်စွမ်းရည်တွေကြောင့်ပါပဲ။ အငြိမ်ဇာတ်ရုပ်မို့ မထင်ပေါ်နိုင်ဘူးလို့ ထင်ခဲ့တဲ့ အယူအဆအမှားတွေကို သက်မွန်မြင့်က သူ့ရဲ့ ပညာသားပါလှတဲ့ Silent Actingတွေနဲ့ သက်သေပြနိုင်ခဲ့တယ်။ မိုးစက်မေဇာတ်ကောင်ဟာ ရုပ်ရှင်ထဲမှာ ပေါက်ပေါက်ကွဲကွဲတွေ အော်ဟစ်ငိုပြရတာတွေ မလုပ်ပြရဘူး၊ စိတ်ထဲရှိတိုင်းလည်း ထုတ်ဖော်ပြောခွင့်မရဘူး။ ထိုရုပ်ရှင်ထဲမှာ ပရိသတ်ရင်ကို အထိမှန်နိုင်ဆုံး သရုပ်ဆောင်ချက်ကတော့ မိုးတွေသည်းနေတဲ့ညမှာ ကိုယ်တိတ်တခိုးချစ်ရသူက ကိုယ်ညီမလေးလို ခင်တွယ်ရသူ ကောင်မလေးကို ပွေ့ဖက်နှစ်သိမ့်ပေးနေတဲ့ မြင်ကွင်းကို တံခါးဝအကွယ်လေးကနေ မြင်တွေ့ရချိန် ဖြစ်သွားရတဲ့ သူ့ရဲ့ခံစားချက် အဆင့်ဆင့်ကို ပြသချိန် စက္ကန့်ပိုင်းလေးအတွင်းမှာ တဆင့်ချင်းပီပြင်စွာ ပြသသွားတဲ့ ဇာတ်ဝင်ခန်းပါပဲ။ နောက်ဆုံး ကောင်မလေးက ကြွေနေတဲ့ စံပယ်ပန်းတွေက လှပေမယ့် ဘုရားတင်ဖို့အတွက်တော့ မသင့်တော်ဘူးလေလို့ ‌ပြောလိုက်ချိန် စကားတွေ အများကြီးမပြောတော့ပဲ အမုန်းရယ်ဟု လှမ်းခေါ် ပွေ့ဖက်ငိုရှိုက်လိုက်ဟန်ကတော့ ပရိသတ်ရဲ့ ရင်ကို အဆုံးထိမှန်စေခဲ့တဲ့ ဇာတ်ဝင်ခန်းပါပဲ။ ထိုရုပ်ရှင်ရုံတင်အပြီးမှာတော့ သက်မွန်မြင့်ရဲ့ သရုပ်ဆောင်စွမ်းရည်တွေကို အရင်ထက်ပိုပြီး ပရိသတ်က ချီးမွမ်းလာကြသလို ဝေဖန်ရေးပရိသတ်တွေကြားတွေမှာလည်း ဒီလို Silent Actingမျိုးကမှ တကယ့်သဘာဝကျတဲ့ ဆရာကျတဲ့ သရုပ်ဆောက်ချက်ဟု ဝေဖန်သံတွေညံခဲ့သလို အငြိမ်ဇာတ်ရုပ်နဲ့ အလှုပ်ဇာတ်ရုပ်ကြား ငြင်းခုံမှုတွေ ပွဲတွေ အတော်ဆူစေခဲ့တာလည်း ဖြစ်ပါတယ်။ ဒါတင်မကပဲ နောက်ထပ်ပွဲဆူစေခဲ့တာကတော့ ဒီရုပ်ရှင်ဟာ အကယ်ဒမီကာလနီးကပ်လာချိန် ဘယ်သူကဇာတ်ဆောင် ဘယ်သူကဇာတ်ပို့ဆိုပြီး ငြင်းခုံမှုတွေလည်း ဆူညံခဲ့စေပြန်ပါတယ်။ အမုန်းဇာတ်ကောင်က အလှုပ်ဖြစ်လို့ သူကမှ ဇာတ်ဆောင်စစ်စစ်လို့ ယူဆသူတွေရှိသလို မိုးစက်မေဟာလည်း အမုန်းနဲ့အပြိုင် silent actingတွေနဲ့ ပညာပြရတဲ့ ဇာတ်ရုပ်မို့ ဇာတ်ပို့မဟုတ်ပဲ ဇာတ်ဆောင်သာဖြစ်ကြောင်း ပြန်ချေပကြပါတယ်။ တဖက်မှာလည်း မင်းသမီးနှစ်ယောက်လုံးက သရုပ်ဆောင်ကောင်းနေတာမို့ နှစ်ယောက်လုံး ဆုမနစ်နာရအောင် တစ်ယောက်ကို ဇာတ်ပို့ တစ်ယောက်ကို ဇာတ်ဆောင်အတွက် တင်စေချင်ကြသူတွေလည်း ရှိခဲ့ပါတယ်။ သို့ပေမယ့် သက်မွန်မြင့်ကတော့ ပြတ်ပြတ်သားသားပါပဲ ဇာတ်ပို့ဇာတ်ရံအလွှာတွေအပေါ် လေးစားမှုရယ် သူ့ရဲ့ဇာတ်ကောင်ဟာ ဇာတ်ဆောင်စစ်စစ်ပဲဆိုတဲ့ တရားမျှတမှုရယ်ကို ပြသတဲ့အနေနဲ့ ဇာတ်ဆောင်ဆုကိုပဲ တင်ပြီး ယှဉ်ပြိုင်ခဲ့ပါတယ်။ ထိုပြတ်သားတဲ့ ရဲရင့်မှု ဇာတ်ကောင်အပေါ်သစ္စာရှိမှုတွေကြောင့် ထိုနှစ်ရဲ့ အမျိုးသမီးဇာတ်ဆာင်ဆုကို မဲအရေအတွက် အပြတ်အသတ်နဲ့ကို အနိုင်ရယူနိုင်ခဲ့တာပါ။ သက်မွန်မြင့်ရဲ့ ထိုရဲရင့်မှုဟာ ဇာတ်ပို့ဇာတ်ရံတွေအတွက် တရားမျှတမှု ပေးနိုင်ခဲ့သလို အယူအဆအဟောင်းတစ်ခုဖြစ်တဲ့ အလှုပ်မှဇာတ်ဆောင် အငြိမ်ဆိုဇာတ်ပို့ဆိုတဲ့ အရာကြီးကိုလည်း ပြောင်းပြန်လှန်ပစ်နိုင်ခဲ့ပြီး မြန်မာ့ရုပ်ရှင်လောကမှာ Silent Actingဆိုတာတွေကို တန်ဖိုးထား ချီးကျူးကြတဲ့ တစ်ခေတ်ကို ပြန်လည်ဆန်းသစ်စေခဲ့တာလည်း ဖြစ်ပါတယ်။ #foryou #fyp #foryoupage #ThetMon Myint #tiktokviral crd - @thangsiann12