@kemyk66: زمان، ولحد فترة مش بعيدة، أنا ما كنتش بحب شخصية أنغام أوي. والأغرب إني لو سألت نفسي ليه، غالبًا ما كانش عندي إجابة محددة ، كنت بحب صوتها جدًا، وبسمع أغانيها، وعارف إنها فنانة راقية ومحترمة وذوقي في اختيار الأغاني... بس كنت شايفاها ناشفة ، مقفولة، مش طبيعية وعشرية زي فنانات تانية. وبعدين كبرت شوية... وبدأت أكتشف إن يمكن المشكلة ما كانتش في أنغام ، يمكن أنا اللي كنت بقراها غلط ، مع الوقت بدأت أشوف أنغام بشكل مختلف جدًا. بقيت أحس إن الست دي حساسة أكتر بكتير من الصورة اللي بتطلعها، بس حوالين الحساسية دي فيه طبقات دفاع تخليك أصلًا ما توصلش لها بسهولة. مش عارف ده خوف من فقد السيطرة، ولا من الاستغلال، ولا مجرد نتيجة سنين اتعلمت فيها إن كل كلمة ممكن تتحسب عليها... بس اللي واضح لي إن أنغام نادرًا ما بتدي حد رفاهية يشوفها وهي واقعة. لأن لما ترجع تبص على تاريخ أنغام، تلاقيها عدت بأزمات كتير جدا: أبوها، غنوة أختها الله يرحمها، والد ابنها، أحمد عز،أصالة، أحمد إبراهيم، وحتى شيرين... وفي كل مرة تقريبا كان سهل جدا يتكتب دور لها في الحكاية: وأنا مش فاكر إنها قضت عمرها تجري ورا كل رواية علشان تقول استنوا وتدافع عن نفسها. كأنها مع الوقت استسلمت لفكرة إنها هتبقى الوحشة في رواية حد... ومش كل رواية تستاهل تدخل تصلحها. آخر مرة فعلا حسيت الدرع ده بيخف كانت وهي بتتكلم عن شيرين. لما قالت إنها بتحبها وإنها وحشتها «شيرين أختي الصغيرة اللي بتفهم كلامي صح»، وإن ناس بتنقل لها الكلام غلط... الجملة دي صعبت عليا أنغام بشكل غريب. لأن لأول مرة تقريبا ما مسمعهاش كغنانة بترد على أزمة، انا سمعت واحدة بتقول ببساطة أنا تعبت من كلام مقولتوش وتصرفات معملتهاش و اتفهم علي اني قولت او عملت كدا. وعشان كده لما أنغام عيطت امبارح في جدة، المشهد وقفني. مش عشان مطربة عيطت من تصفيق جمهورها، بتحصل. بس أنا فجأة شوفت الست اللي كنت زمان بقول عليها باردة. وما لقيتش برود خالص. لقيت واحدة يمكن فهمت بدري جدا إن كل كلمة ليها ثمن، وإن كل لحظة ضعف ممكن تتاخد وتتحكي بطريقة تانية. فبقت تقول أقل. وتشرح أقل. وتسيب الناس تفهم اللي هي عايزاه. ويمكن أنغام ما بطلتش تتكلم لأنها ما عندهاش حاجة تقولها، يمكن هي بس بطلت تشرح نفسها لما اكتشفت إن كل واحد في الآخر هيفهم النسخة اللي عايز يشوفها. @anghamofficial #انغام #بعدك_وجع #انغام_عشق_لاينتهي #viralvideo #parati

Kim0 😉

Open In TikTok:

Region: EG

Sunday 16 August 2026 13:47:45 GMT