@brothe467: په نوي ډیلي کې د افغانستان سفارت خبر ورکړی، چې په تېرو پنځو کلونو کې هلته د لومړي ځل لپاره د افغان حکومت په لاس د هېواد د فتحې او خپلواکۍ کلیزه ولمانځل شوه. په همدې مناسبت جوړو شويو مراسمو کې د هند ګڼ شمېر ځايي چارواکو، په هند کې میشت افغانانو او نورو خلکو ګډون کړی و. دې مراسمو ته افغان شارژدافیر مولوي نوراحمد نور ویلي، د افغانستان او هند ترمنځ د سیاسي باور، اقتصادي همکاریو او دوامدار تعامل پیاوړتیا د دواړو هېوادونو په ګټه ده. نوموړي زياته کړې، چې د کابل او نوي ډیلي اړیکو په وروستیو کلونو کې د متقابل درناوي، سیاسي تعامل او ګډو ګټو پر بنسټ د پام وړ پرمختګ کړی دی. نوراحمد نور د دواړو هېوادونو ګډ فرهنګي میراث ته په اشارې ویلي، د افغان پوهانو، شاعرانو او صوفيانو اغېز د ډیلي او لاهور په څېر ښارونو کې تر اوسه لیدل کېږي. هغه همدا راز د ۲۰۲۱ کال د اګست ۱۵مه د افغانستان په معاصر تاریخ کې د یوه نوي فصل د پیلېدو په توګه یاده کړې ده. د افغانستان شارژدافیر ټینګار کړی چې د کابل او نوي ډیلي ترمنځ د سیاسي او اقتصادي اړیکو پراختیا او دوامدار تعامل کولی شي د دواړو هېوادونو ګډو ګټو ته لا ډېرې زمینه برابره کړي. #هندوکش‌غږ