محبت کی سب سے مشکل گھڑی شاید وہ ہوتی ہے جب انسان کو معلوم ہو جائے کہ جسے وہ اپنی زندگی میں دیکھنا چاہتا تھا، وہ اب کسی اور کی زندگی کا حصہ بن چکا ہے۔ پھر دل کے سامنے ایک عجیب سا سوال کھڑا ہو جاتا ہے؛ اُسے اپنا کہوں تو اُس کے حق پر ڈاکا پڑتا ہے، اور اُسے کسی اور کا مان لوں تو دل اپنے ہی ہاتھوں سے ٹوٹ جاتا ہے۔ تم کسی اور کے ساتھ خوش ہو، یہ سوچ کر دل دکھتا ضرور ہے، مگر تمہاری خوشی چھین لینے کا حوصلہ بھی نہیں۔ شاید محبت کی یہی سب سے بے رحم حقیقت ہے کہ کبھی کبھی انسان جسے سب سے زیادہ چاہتا ہے، اُسی کے لیے خود پیچھے ہٹنا پڑتا ہے۔ میں چاہتا تو تمہیں برا کہہ دیتا، تم سے شکوے کرتا، تمہیں قصوروار ٹھہراتا، مگر محبت نے مجھے یہ بھی نہیں سکھایا۔ اس نے تو صرف یہ سکھایا کہ جس شخص کو کبھی دل سے مانگا ہو، اُس کی خوشی اپنی خواہش سے بڑی سمجھنی پڑتی ہے۔ تمہیں یاد ہے، کبھی میں تمہاری ایک مسکراہٹ کے لیے بے چین ہوا کرتا تھا؟ آج بھی ہوں۔ فرق صرف اتنا ہے کہ اب وہ مسکراہٹ میری وجہ سے نہیں آتی۔ اور شاید یہی بات سب سے زیادہ تکلیف دیتی ہے۔ کبھی کبھی دل چاہتا ہے کہ تمہیں بتاؤں، تمہیں کھونا میرے لیے کتنا آسان نہیں تھا۔ تم سے دور ہونا صرف ایک شخص سے دور ہونا نہیں تھا، یہ اُن تمام خوابوں سے بچھڑنا تھا جو میں نے تمہارے ساتھ دیکھے تھے۔ وہ گھر، وہ شامیں، وہ بے مقصد باتیں، وہ چھوٹی چھوٹی خوشیاں… سب کچھ ایک ہی لمحے میں کسی اور زندگی کا حصہ بن گیا۔ مگر میں نے تمہیں روکنے کے بجائے خاموش رہنا سیکھ لیا۔ کیونکہ اگر تم کسی اور کے ساتھ خوش ہو تو میں اپنی محبت کو تمہاری سزا نہیں بنا سکتا۔ ہاں، کبھی کبھی دل اب بھی ضد کرتا ہے۔ کبھی تمہارا نام سن کر وقت چند لمحوں کے لیے رک جاتا ہے۔ کبھی خیال آتا ہے کہ اگر حالات ذرا مختلف ہوتے، اگر وقت نے ہمارا ساتھ دیا ہوتا، اگر ہم دونوں نے اُس وقت ایک دوسرے کو تھوڑا اور سمجھا ہوتا… تو شاید آج کہانی کچھ اور ہوتی۔ مگر زندگی “اگر” سے نہیں چلتی۔ جو ہو گیا، وہ ہو گیا۔ اب تم کسی اور کی ہو، اور شاید مجھے یہ حقیقت قبول کرنے میں ابھی بہت وقت لگے گا۔ مگر میں تمہارے لیے آج بھی وہی دعا کرتا ہوں جو کبھی تمہارے ہاتھ تھام کر کیا کرتا تھا؛ تم جہاں رہو، خوش رہو۔ تمہیں وہ محبت ملے جس کی تم مستحق ہو۔ اور اگر کبھی میری یاد تمہارے دل میں دستک دے تو اسے یہ سمجھ کر نظر انداز مت کرنا کہ کوئی تمہیں بھول گیا ہے… بلکہ یہ سمجھ لینا کہ کہیں ایک شخص آج بھی تمہیں یاد کرکے خاموش ہو جاتا ہے۔ کیونکہ بعض محبتیں حاصل کرنے کے لیے نہیں ہوتیں۔ کچھ محبتیں انسان کے حصے میں صرف اس لیے آتی ہیں کہ اُسے معلوم ہو سکے، کسی کو دل سے چاہنا کیا ہوتا ہے… اور پھر اُسی شخص کو کسی اور کے ساتھ خوش دیکھ کر خاموشی سے دعا دینا کتنا مشکل ہوتا ہے۔🤍 #foryou #foryoupage - @bilal_warraichh