@qazaq.today: 2026–2027 оқу жылынан бастап Қазақстан мектептерінің білім беру бағдарламасына бірқатар өзгеріс енгізіледі. Бұл туралы Оқу-ағарту министрі Жұлдыз Сүлейменова Үкімет отырысында мәлімдеді. Жаңа оқу жылында 5–7-сыныптарға «Конституция негіздері» пәні енгізіледі. Ал 8–11-сынып оқушылары «Заң және тәртіп» міндетті курсын оқиды. 5–11-сыныптарда «Жеке қауіпсіздік» курсы да міндетті болады. Бұған дейін таңдау пәні ретінде оқытылған «Құқық негіздері» енді барлық оқушы үшін міндетті пәнге айналады. Бастауыш сыныптардағы бағалау жүйесіне де өзгеріс енгізіледі. БЖБ мен ТЖБ алынып тасталып, оның орнына күнделікті қалыптастырушы бағалаудың рөлі күшейтіледі. Оқушының білімін тексеру тәсілін мұғалім өзі таңдай алады. Аралық бақылау диктант, мазмұндама, шығарма, жоба, ауызша немесе практикалық жұмыс түрінде өткізілуі мүмкін. Жаңа талаптар 2026–2027 оқу жылынан бастап қолданысқа енгізіледі.
