@cawabemedia_: Mkuu wa Wilaya ya Ubungo, Albert Msando, ametoa agizo kwa mabasi yote yanayofanya safari kutoka Dar es Salaam kuanzia katika Stendi ya Mabasi Magufuli, akisisitiza kuwa mabasi yatakayokiuka utaratibu huo hayataruhusiwa kuendelea na safari. Msando ametoa kauli hiyo Agosti 17, 2026, baada ya kutembelea na kukagua hali ya vituo visivyo rasmi vya mabasi katika maeneo ya Shekilango (Urafiki) na Manzese. Amesema hatua hiyo ni sehemu ya maandalizi ya utekelezaji wa agizo la Mkuu wa Mkoa wa Dar es Salaam linalotaka mabasi yote yanayofanya safari kutoka jijini humo kupakia na kushusha abiria katika Stendi ya Mabasi Magufuli. Kwa mujibu wa Msando, Serikali itaweka vituo maalumu vya ukaguzi (Check Point) katika maeneo mbalimbali, ikiwemo Barabara ya Morogoro, Sam Nujoma kuelekea Mwenge pamoja na maeneo mengine. Amesema vituo hivyo vitatumika kubaini mabasi yanayokiuka utaratibu, kuyazuia na kuchukua hatua dhidi ya waendeshaji watakaokaidi agizo hilo. Zoezi la utekelezaji wa agizo hilo linatarajiwa kuanza rasmi kesho, Agosti 18, 2026, huku mamlaka zikisisitiza kuwa mabasi yote yanapaswa kuzingatia utaratibu mpya. Hatua hiyo inalenga kuondoa vituo visivyo rasmi vya mabasi, kurahisisha usimamizi wa usafirishaji na kuhakikisha shughuli za kupakia na kushusha abiria Dar es Salaam zinafanyika kwa utaratibu unaotakiwa.

cawabemedia

Open In TikTok:

Region: TZ

Tuesday 18 August 2026 07:02:14 GMT