मलेसियामा न्यूनतम तलब पुनरावलोकन हुँदै, श्रमिकको आम्दानी बढ्ने अपेक्षा क्वालालम्पुर । मलेसिया सरकारले देशमा कार्यरत श्रमिकहरूको न्यूनतम मासिक पारिश्रमिक पुनरावलोकन गर्ने प्रक्रिया अघि बढाएको छ। हाल लागू रहेको १,७०० रिङ्गिट न्यूनतम तलबलाई वर्तमान आर्थिक अवस्था र जीवनयापनको बढ्दो खर्चसँग मेल खाने गरी परिमार्जन गर्ने विषयमा सरकारले अध्ययन थालेको हो। मानव संसाधन मन्त्री दातुक सेरी आर. रामननका अनुसार राष्ट्रिय ज्याला नीतिलाई समयसापेक्ष बनाउन आवश्यक आर्थिक तथा श्रम बजारसम्बन्धी सूचकहरूको अध्ययन भइरहेको छ। राष्ट्रिय ज्याला परामर्श परिषद् ऐन २०११ अन्तर्गत निश्चित अवधिमा न्यूनतम पारिश्रमिक पुनरावलोकन गर्नुपर्ने कानुनी व्यवस्थाअनुसार प्रक्रिया अघि बढाइएको बताइएको छ। पुनरावलोकनका क्रममा महँगी, उपभोक्ता मूल्य सूचकांक (CPI), देशको आर्थिक अवस्था, श्रम उत्पादकत्व तथा श्रमिकको जीवनयापन खर्चलाई प्रमुख आधार बनाइनेछ। पछिल्लो समय दैनिक उपभोग्य वस्तु, आवास, यातायात तथा अन्य आवश्यक खर्च बढिरहेका कारण न्यूनतम पारिश्रमिकलाई पुनः मूल्याङ्कन गर्नुपर्ने आवश्यकता देखिएको हो। यसअघि बैंक नेगारा मलेसियासम्बन्धी अध्ययनहरूले पनि राजधानी क्वालालम्पुरजस्ता महँगा सहरमा मर्यादित जीवनयापनका लागि हालको न्यूनतम तलबभन्दा बढी आम्दानी आवश्यक पर्ने देखाएका छन्। त्यसैले आगामी पुनरावलोकनपछि न्यूनतम तलबमा थप वृद्धि हुन सक्ने अपेक्षा गरिएको छ। तर नयाँ न्यूनतम तलब कति तोकिने भन्ने निर्णय भने अध्ययन र सम्बन्धित परामर्श प्रक्रियापछि मात्र स्पष्ट हुनेछ। सरकारले विभिन्न आर्थिक तथा सामाजिक पक्षको मूल्याङ्कन गरेर अन्तिम निर्णय गर्ने बताइएको छ। मलेसियामा न्यूनतम पारिश्रमिकसम्बन्धी व्यवस्था स्वदेशी तथा कानुनी रूपमा कार्यरत विदेशी श्रमिकमा समेत लागू हुने भएकाले तलब वृद्धि भएमा ठूलो संख्यामा नेपालीसहित अन्य विदेशी श्रमिकलाई पनि प्रत्यक्ष लाभ पुग्न सक्नेछ। 👉 अकहिले नै १,९०० रिङ्गिट नयाँ न्यूनतम तलब तोकिएको भने होइन; यो पुनरावलोकनपछि हुने सम्भावित वृद्धिबारेको चर्चा हो। अन्तिम निर्णय सरकारको आधिकारिक घोषणापछि मात्र निश्चित हुनेछ। #Malaysia #MinimumWage #ForeignWorkers #NepaliInMalaysia #malaysianews - @ramnarayanmehtaa