Qusar Rayon Mərkəzi Xəstəxanasında vətəndaşların tibbi xidmət almaq üçün pul ödəməyə məcbur edildiyi ilə bağlı ciddi iddialar səslənir. Söhbət ultrasəs müayinəsindən – USM xidmətindən gedir. İddialara görə, xəstəxananın USM həkimi Tehran Zərbəliyev müayinəyə gələn pasiyentlərdən 20 manat ödəniş tələb edir. Məsələnin daha ciddi tərəfi isə budur ki, ultrasəs müayinəsi icbari tibbi sığortanın Xidmətlər Zərfi çərçivəsində göstərilən xidmətlərə daxildir və müvafiq tibbi göstəriş olduqda pasiyent üçün ödənişsiz həyata keçirilməlidir. Buna baxmayaraq, iddialara əsasən, bəzi pasiyentlərdən USM müayinəsinə görə 20 manat alınır. Hətta bildirilir ki, 10 manat ödəyən vətəndaşdan belə əlavə 10 manat tələb olunur. Əgər bu iddialar təsdiqini taparsa, ortada sadəcə etik problem deyil, vətəndaşın sığorta çərçivəsində əldə etməli olduğu tibbi xidmətə görə ondan qanunsuz ödəniş tələb edilməsi məsələsi dayanır. Daha bir sual isə xəstəxana rəhbərliyinə ünvanlanır. İddialara görə, pasiyentlər Tehran Zərbəliyevin bu əməlləri barədə dəfələrlə Qusar Rayon Mərkəzi Xəstəxanasının direktoru İmran Qurbanova şikayət ediblər. Lakin buna baxmayaraq, nəticə dəyişməyib və həkimin fəaliyyətinə münasibətdə hər hansı ciddi tədbir görülməyib. Belə olan halda sual yaranır: Xəstəxana rəhbərliyi bu iddialardan xəbərdardırsa, niyə araşdırma aparılmır? Əgər rəhbərliyə rəsmi və şifahi şikayətlər daxil olubsa, onların hər biri araşdırılmalı, pasiyentlərdən pul tələb edilib-edilmədiyi müəyyənləşdirilməli və nəticəsi ictimaiyyətə açıqlanmalıdır. Əks halda, vətəndaşlarda haqlı olaraq “şikayət etsək də, heç nə dəyişməyəcək” düşüncəsi formalaşa bilər. Tibbi sığorta sisteminin əsas məqsədlərindən biri vətəndaşın tibbi xidmətə çıxışını asanlaşdırmaq və müəyyən edilmiş xidmətləri əlavə ödəniş olmadan əldə etməsini təmin etməkdir. Xəstəxanada bunun əksi baş verirsə, məsələ yalnız bir həkimin davranışı kimi qiymətləndirilə bilməz. 20 manat böyük məbləğ kimi görünməyə bilər. Amma hər gün onlarla pasiyentin müayinəyə gəldiyi tibb müəssisəsində bu ödənişlərin sistemli şəkildə alındığı təsdiqlənərsə, söhbət artıq kifayət qədər ciddi məbləğdən və daha ciddi idarəetmə problemindən gedir. İndi əsas məsələ aidiyyəti qurumların bu iddialara münasibət bildirməsidir. Qusar Rayon Mərkəzi Xəstəxanasının rəhbərliyi Tehran Zərbəliyev tərəfindən pasiyentlərdən 20 manat alındığı barədə iddiaları təsdiqləyir, yoxsa təkzib edir? Xəstəxananın direktoru İmran Qurbanova bu barədə neçə dəfə şikayət daxil olub və həmin şikayətlər üzrə hansı tədbirlər görülüb? Ən əsası isə: İcbari tibbi sığorta çərçivəsində ödənişsiz göstərilməli olan USM müayinəsinə görə vətəndaşlardan pul tələb edilibsə, həmin vəsaitlər hara və hansı əsasla ödənilib? Bu suallar cavabsız qaldıqca, məsələ ilə bağlı şübhələr də aradan qalxmayacaq. Qeyd: Tehran Zərbəliyevin və Qusar Rayon Mərkəzi Xəstəxanasının mövqeyini dərc etməyə hazırıq. İddiaların həqiqiliyinin müəyyənləşdirilməsi üçün aidiyyəti qurumların araşdırma aparması vacibdir. - @x_xeber