ቀን 6 ሳላወራሽ .... (ፉአድ ሙና) . አበባየሆሽ ለምለም፣ አድርሰናል እንደመባል ‘ሚቀፍ የለም። ሆ ብዬ መጣሁ ሆ ብዬ .... ፍቅሬ ካለሽ ብዬ፣ ሆ ብዬ መጣሁ ሆ ብዬ!! በእንቁጣጣሹ ጭፈራው ሲደምቅ፣ ሰማይ ሳትጠራ፣ ሆ ብሎ መምጣት አሰብኩኝና፣ ስስ ልቤ ፈራ። ፈሪ ነኝ እኮ .... ፈሪ ነኝ በጣም ያንቺ ፍቅር ነው፣ ስሱ ብልቴ፣ ላግባሽ ለማለት እንደምን ልድፈር፣ አልቆመም ቤቴ። በእኩለ ለሊት ገና ሳልጨርስ፣ እንጨት ሰበራ፣ አይመጥንሽም ነይ ግቢ መባል፣ ቤት ሳይሰራ። ፍቅርሽ ተራራው እያሳነሰው፣ በእጄ ያለን ሁሉ፣ ብትገዝፊብኝ .... ወላዋይ ብለሽ፣ አማሽኝ አሉ። ቆራጥ ነበርኩኝ .... ፍቅርሽ ነው እንጂ ያስደፋኝ አንገት፣ ነበርኩኝ ዋና፣ እጄን የማልሰጥ የማልሰፈር፣ በቆንጆ ቁና። ግን ተበለጥኩኝ .... አልገባሁሽም ታየ እንደሽንፈት፣ ስስት ፍቅሬ፣ አነስኩሽና ሌላ ሰው መርጠሽ፣ ቃል ሰጠሽ ማሬ። ቀልዴን ነው በይኝ!! አበባየሆሽ ለምለም፣ አድርሰናል እንደመባል፣ ‘ሚቀፍ የለም። ቀልድሽን ነው አውቅሻለሁ፣ አትጨክኚም በመውደዴ፣ ከቶ አልችልም አንቺን ማጣት፣ ለአፍታ ለአንዴ። ቀልድሽን ነው!! አሁን አሁን አይኔ ሲራብ፣ ፊትሽን ለምዶ፣ ፅልመት ሞላኝ ድምፅሽ ሲጎ‘ል፣ ከጆሮዬ ተዋህዶ። አዲስ አመት ሳላወራሽ ሳንተያይ፣ አበሰሩ፣ ያላንቺ ሳቅ መድመቅ ሽተው፣ ችቦ አበሩ። ኪሳራ!! እኔ ጋር ግን የፅልመት ጎርፍ፣ ይታየኛል ተጥለቅልቆ፣ ያላንቺ ድምፅ ያለሳቅሽ፣ ምሎልኛል ላይሄድ ለቅቆ። ልሰምጥ ነው!! ሲያዩኝ ብመስል፣ ያካበበኝ ድሎት ሞልቶ፣ ትንኝ ታክል፣ ልቤ አያውቅም ደስታ አይቶ፣ ራሪልኝ፣ ውስጤ አይንደድ አንቺን አጥቶ። ናፍቀሽኛል .... ደሙን ትቶ፣ ልቤ እንባ እስኪዘራ፣ አይኖቼ ላይ በስምሽ ቅርፅ፣ የደም መስመር እስኪሰራ። ንፍቅፍቅ ብለሽኛል። አበባየሆሽ ለምለም፣ አድርሰናል እንደመባል፣ ‘ሚቀፍ የለም። ናፍቀሽኛል!!! 20 ቀን እኮ ብዙ ነው!!! ያ ረብ ኢኒ ፈቂር!!! - @fuadmuna9