#foryoupage #प्रिय नेपाली दाजुभाइहरू, एकपटक त्यो नेपाली चेलीको जीवनलाई नजिकबाट हेरेर सोच त— ऊ विदेश घुम्न गएकी होइन। ऊ रहरले नेपाल छोडेकी होइन। ऊ आफ्नी आमाको काख छोड्न चाहन्थी होइन। बुबाको हात छोडेर टाढा जान उसको मन थियो होइन। तर पैसाको आवश्यकता र परिवारको भविष्यका लागि उसले आफ्नो खुसीभन्दा जिम्मेवारी ठूलो ठानी। आफ्नो घर छोडी, आफ्नो गाउँ छोडी, आफ्नो देश छोडी, आमा–बुबा छोडी, र कतिपयले त आफ्ना साना छोराछोरीसमेत घरमै छोडेर परदेशको बाटो समात्छन्। कल्पना गर त— एउटी आमाले आफ्नो सानो छोराछोरीलाई छातीमा टाँसेर, “छिट्टै फर्किन्छु है” भनेर आँसु लुकाउँदै विमानस्थलबाट हिँड्दा उसको मन कति टुक्रिएको होला? छोराछोरी बिरामी हुँदा उनी नजिक हुन सक्दिनन्। बच्चाको जन्मदिन आउँदा उनी अंगालो हाल्न सक्दिनन्। आमा–बुबा बिरामी पर्दा हात समाउन सक्दिनन्। चाडपर्व आउँदा घरको आँगन सम्झेर परदेशको कोठामा एक्लै बस्नुपर्छ। तर किन? त्यही छोराछोरीको भविष्य राम्रो होस् भनेर। त्यही आमा–बुबाले सुख पाऊन् भनेर। त्यही घरको चुलो निभ्न नदिन भनेर। अनि हामी के गर्छौं? उसले कुनै बंगाली, पाकिस्तानी वा अरू देशको मानिससँग कुरा गरेको देख्यौँ भने तुरुन्तै चरित्रको फैसला गर्छौँ। “बंगालीकी श्रीमती!” “त्योसँग लागेकी!” “नेपाली केटी बिग्रिएछ!” लाज लाग्दैन? तिमीले उसको कोठाको एक्लोपन देखेका छौ? उसले राति बच्चाको फोटो हेरेर मन थामेको देखेका छौ? आमाको फोन आउँदा आवाज लुकाएर रोएको सुनेका छौ? काममा थाकेर फर्किएपछि पनि घरमा पैसा पठाउनुपर्ने उसको बाध्यता बुझेका छौ? बुझेका छैनौँ भने—चुप लाग। कसैसँग बोलेको भरमा एउटी महिलाको चरित्र नाप्ने अधिकार तिमीलाई छैन। विदेशमा काम गर्ने मान्छेले त्यहाँका मानिससँग बोल्छ, काम गर्छ, सहयोग लिन्छ। त्यसलाई प्रेम, सम्बन्ध वा चरित्रसँग जोडेर गाली गर्नु केवल अज्ञानता हो। अझ दुःखद कुरा— आज “बंगालीकी श्रीमती” भनेर गाली गर्ने कतिपय मानिस भोलि त्यही केटीसँग विवाह गर्ने सपना देखिरहेका हुन्छन्। यदि तिमी उसलाई विवाह गर्न चाहन्छौ भने पनि पहिले उसको मान्छेपना बुझ। उसले कति गुमाएर आज यहाँसम्म आइपुगेकी छे, त्यो बुझ। उसले देश छोड्दा केवल एउटा टिकट काटेकी होइन— उसले आफ्नो बाल्यकालको आँगन छोडेकी हो। आमा–बुबाको साथ छोडेकी हो। छोराछोरीको बालापन छोडेकी हो। आफ्ना धेरै खुसीहरू छोडेकी हो। उसले बोकेको सुटकेसमा कपडामात्र थिएनन्— घरको ऋण थियो, छोराछोरीको सपना थियो, आमा–बुबाको औषधि थियो, र परिवारको भविष्यको आशा थियो। त्यसैले अर्को पटक कुनै नेपाली चेलीलाई विदेशमा कसैसँग बोलेको देख्यौ भने तुरुन्तै गाली नगर। पहिले सोच— सायद ऊ तिम्रो कल्पनाभन्दा धेरै ठूलो युद्ध लडिरहेकी छे। उसको जीवन बुझ्न सक्दैनौ भने कम्तीमा उसको सम्मान गर। किनकि परदेशमा पसिना बगाउने नेपाली महिला कमजोर होइनन्। उनीहरू आफ्नो परिवारका लागि आफूलाई पछाडि राखेर बाँचेका संघर्षका पात्रहरू हुन्। गाली गरेर पुरुषत्व देखिँदैन। एउटी संघर्षरत महिलाको पीडा बुझ्न सक्नु नै असली मानवता हो। र याद राख— परदेशमा एक्ली देखिएकी नेपाली चेली कमजोर छैन। ऊ हजारौँ किलोमिटर टाढा बसेर आफ्नो घरको भविष्य बनाइरहेकी एउटी साहसी आमा, छोरी, बहिनी र दिदी हुन सक्छे। उसको कथा नसुनी उसको चरित्रको फैसला नगर। किनकि तिमीले देखेको उसको एउटा क्षणले उसको पूरै जीवनको सत्य बताउँदैन। - @samir123768