የዑመር ኢብኑል ኸጧብ🤎 አገልጋይ የነበረው አስለም እንዲህ ሲል ይተርካል: በአንድ ሌሊት ከዑመር ኢብኑ አል-ኸጣብ🤎 ጋር የሕዝባቸውን ሁኔታ ለመቃኘት ከመዲና ወጥተን ጋር ወደ ሐረቱ-ዋቂም ወደተባለ ስፍራ አመራን። ሱራር በተባለ ቦታ ስንደርስ በሩቅ እሳት ታየን። ዑመርም «አስለም ሆይ! ብርዱና ሌሊቱ ያስቆማቸው መንገደኞች ይታዩኛል፤ ወደ እነሱ እንሂድ» አሉኝ። በፍጥነት ስንቀርብ አንዲትን እናት ከሕፃናት ልጆቿ ጋር አገኘን፤ እሳቱ ላይ ድስት ተጥዷል፣ ልጆቿም ያለቅሳሉ። ዑመርም🤎 «አሠላሙ ዐለይኩም ያ አሥሐበድ-ደውእ (የብርሃኑ ባለቤቶች)» አሉ — «የእሳቱ ባለቤቶች» ማለትን ጠልተው ነው። እሷም «ወዐለይኩም አሠላም» አለች። ዑመር🤎 «ወደ እናንተ ልቅረብ (ልጠጋ)?» ሲሉ ጠየቁ። ሴቲቱም «በበጎ ከሆነ ቅረብ፣ ካልሆነ ግን ተወን» አለች። ቀረብ ብለውም «ምን አጋጠማችሁ?» አሏት። እሷም «ሌሊቱና ብርዱ ጉዟችንን አሰናከለን» አለች። ዑመር «እነዚህ ሕፃናት ለምን ያለቅሳሉ?» አሏት። «በረሃብ ምክንያት ነው» አለች። «በዚህ ድስት ውስጥ ያለው ምንድን ነው?» ሲሉ ጠየቋት። «ልጆቹ እስኪተኙ እያፈላሁ የማታልልበት ውኃ ነው፤ አላህ በእኛና በዑመር መካከል ይፍረድ!» አለች። ዑመርም «አላህ ይዘንልሽ! ዑመር የእናንተን ሁኔታ እንዴት ሊያውቅ ይችላል?» አሏት። እሷም «የእኛን ጉዳይ ተረክቦ ከዚያ በእኛ ይዘናጋል?» ብላ መለሰች። በንግግሯ የደነገጡት ዑመር 🤎 «ተከተለኝ እንሂድ!» አሉኝ። በፍጥነት ወደ ዱቄት ማከማቻ ቤት (ዳሩድ-ደቂቅ) ሄድን። አንድ የዱቄት ከረጢትና የስጋ ስብ አውጥተው «በጀርባዬ ላይ ጫንልኝ» አሉኝ። እኔም «እኔ ልሸከምልዎ?» ብላቸው «በቂያማ ቀን ወንጀሌን ትሸከምልኛለህ?» አሉኝ በቁጣ። በጀርባቸው ላይ ጫንኩላቸውና በፍጥነት ወደ እናትየው ተመለስን። ዑመር🤎 የዱቄቱንና የሥቡን ጥቂት ክፍል ድስቱ ውስጥ አድርገው «እኔ አማስልልሻለሁ፤ አንቺ ዱቄቱን ነስንሺልኝ» አሏት። ከድስቱም ሥር እሳቱን እየነፉ ያቀጣጥሉ ጀመር፤ ከዚያም ድስቱን አወረዱት። ቀጥሎም፡ «የሚበሉበት እቃ አምጪልኝ» አሏት፤ ሰፊ እቃ (ሳህን) አቀበለቻችውና ምግቡን አደረጉላት። ከዚያም ለሴቲቱ፡ «አንቺ መግቢያቸው፤ እኔ ደግሞ አቀዝቅዝላቸዋለሁ» አሏት። እስኪጠግቡ ድረስ ማብላታቸውን አላቆሙም፤ የቀረውንም ምግብ እሷ ዘንድ ትተውላት ተነሱ፤ እኔም አብሬ ተነሣሁ። ሴቲቱም፡ «አላህ መልካም ምንዳህን ይክፈልህ! ከምእመናን መሪ (ከዑመር) ይልቅ ለዚህ ሥልጣን የተገባኸው አንተ ነበርክ» አለች። እርሳቸውም፡ «ወደ ምእመናን መሪ ዘንድ በመጣሽ ጊዜ መልካም ነገርን ተናገሪ፤ አላህ ካለ እዚያ ታገኚኛለሽ» አሏት። ከዚያም ከእሷ ዘወር ብለው ፈቀቅ አሉና በርከክ ብለው ተቀመጡ። እኔም፡ «ከዚህ ሌላ የምናከናውነው ጉዳይ አለንኮ» አልኳቸው፤ እርሳቸው ግን ምንም አልመለሱልኝም። ህፃናቱ ሲጫወቱና ሲስቁ፣ ከዚያም ተኝተው እስኪረጉ ድረስ ይመለከቷቸው ነበር። ከዚያም፡ «አስለም ሆይ! ረሀብ አሳድሯቸውና አስለቅሷቸው ነበር፤ ስለዚህ ያየሁትን ደስታና እርጋታ ሳላይ መመለስ አልፈለግኩም ነበር» አሉኝ።» ይለናል አስለም። በንጋታው እናትየው ወደ መዲና ሄዳ የዑመርን ማረፊያ ጠይቃ ገባች። ያ ማታ የረዳት ሰው አሚሩል ሙእሚኒን ተብሎ ከሶሐቦች መካከል ተቀምጦ ባየች ጊዜ ዑመር መሆኑን አውቃ ስጋት ያዛት። ዑመርም 🤎 «አንቺ እናት ሆይ! ምንም ስጋት አይግባሽ፤ በደልሽን ከአንቺ ልገዛሽ እንጂ ሌላ አይደለም፣ በስንት ልግዛሽ?» አሏት። በአርባ ድርሃም ከተስማሙ በኋላ ለፀሐፊያቸው «በርግጥም ዑመር ከዚች እናት በደሏን በአርባ ድርሃም ገዝቷል» ብለው እንዲጽፍ አዘዙ። ዐሊይንና ዑሥማንን (ረ.ዐ) ምስክር አድርገው ደብዳቤውን ለሶሐቦች በመስጠት « በሞትኩ ጊዜ ይህን ደብዳቤ ከከፈኔ መካከል አድርጋችሁ ቅበሩኝ፤ አላህን በእሱ እንድገናኘው» አሉ። - @abdulfetahou1