Wat as daar een ding in jou lewe is wat jy nie bereid is om vir Yeshua neer te lê nie? Jy kan bid, vas, die Woord ken en ander bedien, en tog aan iets vashou wat jou hart van Yeshua af wegtrek. In Markus 10:21 kyk Yeshua na die ryk jong man, kry hom lief en sê: “Een ding kom jy kort...” Yeshua het presies geraak aan dit wat op die troon van hierdie man se hart gesit het. Die probleem was nie net dat hy baie besittings gehad het nie. Sy besittings het hom gehad. Toe Yeshua hom vra om dit neer te lê en Hom te volg, het hy bedroef weggeloop. Nie omdat Yeshua hom nie liefgehad het nie, maar omdat hy nie bereid was om dit wat hom vasgehou het, oor te gee nie. En dit laat my vandag vra: Wat is jóú een ding? Dalk is dit 'n geheime sonde, 'n verslawing, 'n verhouding, geld, beheer of mense se goedkeuring. Dalk is dit iets wat niemand anders sien nie, maar jy weet presies wat Abba Vader jou vra om neer te lê. Want Abba Vader soek nie net wat jy vir Hom doen nie. Hy soek jou hele hart. Moenie vandag bedroef wegloop nie. Bring dit in die lig. Bely dit. Los dit. En volg Hom. ❤️ As dit vandag jou besluit is, skryf “ABBA, U KRY MY HELE HART!” En as hierdie boodskap jou aan iemand laat dink wat sukkel om iets neer te lê, stuur dit vir hulle. Dalk moet hulle vandag hoor: Dit is tyd om los te laat. - @roelfcraigstaanop