“ሴት በማጀት” ዘመን ሲያበቃ.. {ኖህ ዳንኤል} መቼስ ሰሞኑን አየሩን ሁሉ የቃቄ ውርድዎት ሴቶች ልጆች ተቆጣጥረውታል አይደል? (ቃቄ ውርድዎትን ለማታውቁ ከዛሬ 188 አመታት በፊት የነበረች የጉራጌ የሴቶች መብት ተሟጋች ነበረች) አስቡት እሷ ያኔ ለሴቶች በምትሟገትበት በዚያው ዘመን አፍሪካን ተዉትና አሜሪካ የሚኖሩ ሴቶች እንኳን በአስገራሚው የ English Common Law ስር ይተዳደሩ ነበር። ለምሳሌ በዚያን ግዜ አሜሪካ ውስጥ ሴት ልጅ የወረሰችውም ሆነ ሰርታ ያገኘችው ንብረት ባል ካገባች በኋላ የባሏ ይሆን ነበር። ደሞዟ ራሱ የባሏ ነበር። 🙂 ምን እሱ ብቻ አስገራሚው ህግ እንዲህም ይል ነበር.... “ባልና ሚስት አንድ አካል ናቸው ያም አንድ አካል ባል ነው" 🤣 በዚህ ህግ መሰረት የሴቷ ህልውና ራሱ በባሏ ውስጥ ይዋጣል ማለት ነው። ከዚህ በተጨማሪም ሴት ምንም አይነት ውል መዋዋል አትችልም፣ መምረጥ መመረጥም አትችልም። እሱ ብቻ ሳይሆን ባል ሚስቱን ለማረም በሚል ምክኒያት እንደፈለገ እንዲደበድባት ሁሉ በህግ ተፈቅዶለት ነበር። ይህ ሁሉ እንግዲህ የቃቄ ውርድዎት የእድሜ እኩዮቿን ሰብስባ ጉራጌ ውስጥ ከፍተኛ አቢዮት ባስነሳችበት በዚያን ወቅት አሜሪካ ውስጥ ይፈፀም የነበረ ግፍ ነው! እናማ የቃቄ ውርድዎት ልጆች ሰሞኑን ሚዲያውን ሲያንቀጠቅጡት እኔም ትንሽ ወደኋላ ተመልሼ አንዳንድ ነገር ገረፍ ገረፍ እያደረኩ ነበር። ብራዘር ራስህን upgrade ካላደረግክ እንደድሮ “ሴት በማጀት፣ ወንድ በችሎት” እያልክ አብረህ የምታኖራት ሴት ዘንድሮ የለችም። እንደሌኒን ሃውልት አንድ ቦታ አትተከል። ተንቀሳቀስ። ስዊዘርላንድ እስከ 1971 ድረስ ለሴቶች ድምፅ የመስጠት መብትን አልፈቀደችም ነበር። እንደውም ወንዶች ፖለቲከኞች ፓርላማ ውስጥ በግልፅ “ሴቶች ድምፅ ከሰጡ ቤታችን ምግብ አይሰራም” የሚል ስጋት ያቀርቡ ነበር። (መቼስ የሆዳችን ነገር አይሆንልንም) 😀 የስዊዝ ሴቶች ታዲያ ይህንን የወንዶች ስጋት ከሰሙ በኋላ በጣም ተበሳጭተው አንድ ነገር አደረጉ.... ፓርላማ ስብሰባ በነበረበት በአንዱ ቀን ፓርላማው ፊት ለፊት ትላልቅ ድስቶችና ምጣዶችን ይዘው በመውጣት ወንዶቹ የምግብ አሰራር አዘገጃጀት መመሪያ (Recipe Books) እንዲያነቡ በሃይለኛ ድምፅ መጮህ ጀመሩ። 😀 በዚያን ግዜ ስሎጋኖቻቸው ላይ ፅፈዋቸው ከወጡ መፈክሮች አንዱ እንዲህ የሚል ነበር... “የምግብ አሰራር የማያውቅ ወንድ ሐገር መምራት አይችልም” ሃሃሃሃ እህታለም አንቺ ዛሬ ዩኒቨርስቲ እንድትሄጂ ሴት አያቶችሽ ያልሰሩት ነገር የለም። ለምሳሌ በ1913 የእንግሊዝ ሴቶች መንግስት ትኩረት እንዲሰጣቸው ለማድረግ በወቅቱ ይሰራጭ የነበረውን የንጉሥ ጆርጅ አምስተኛ ምስል ያለበትን የነሀስ ሳንቲም (Pennies) በሙሉ ከገበያው ሰብስበው ልዩ የብረት ማህተም በመቅረጽ በንጉሡ ፊት ላይ «Votes for Women» የሚል ፅሁፍ እያተሙ መልሰው ወደ ገበያ ለቀቁት 😀 መንግስት ሳንቲሞቹን በሙሉ ሰብስቦ ለማስወገድ ኢኮኖሚያዊ አቅም ስለሌለው ዝም ብሎ በነዚያው ሳንቲሞች ለመገበያየት ተገደደ። በሴቶች የመብት እንቅስቃሴ ውስጥ አቢዮተኛ ሴቶች መብታቸውን ለማስከበር ያልሰሩት ስራ የለም ስልሽ! አሜሪካ ውስጥ "አስቀያሚ ስለሆናችሁ ነው ፌሚኒስት የሆናችሁት" ሲሏቸው የተዋቡ ሴቶችን ከፊት አሰልፈው ሰልፍ ሲወጡ፣ የዊኒስተን ቸርችልን ስብሰባ ደውልና ድመቶች ይዘው ገብተው ሲረብሹ፣ ምን ያልሰሩት አለ? ፈረንሳይ ውስጥ በ1925 ሴቶች መመረጥ አይችሉም ሲባል ምርጫ አጭበርብረው ለ30 ሰከንድ ሴት ከንቲባ ሁሉ አስመርጠዋል 😀 ከሁሉም ግን የገረሙኝ 1909 የነበሩ የእንግሊዝ ሴቶች ናቸው። ነገሩ እንዲህ ነው.... ሴቶቹ በእንግሊዝ የፖስታ ህግ መሰረት “ማንኛውንም ህጋዊ ነገር በፖስታ መልእክት መላክ ይቻላል” የሚል የህግ ክፍተት መኖሩን ደረሱበት። እንግሊዝ ውስጥ ደግሞ ህግ ህግ ነው ይተገበራል! ይህንን የተረዱት ኤልሲ ማቲዎስ እና ቪክቶሪያ ራይን የተባሉ ሁለት አማፂ ሴቶች ራሳቸውን እንደ «ሰውኛ ፖስታ» (Human letters) በማስመዝገብና ፖስታው የሚደርስበትን አድራሻ ደግሞ የጠቅላይ ሚኒስትሩ ቢሮ አድርገው በማስመዝገብ በፖስታ ሰራተኛ ታጅበው እስከ ጠቅላይ ሚኒስትሩ ደጃፍ ድረስ ተላኩ። 😀በዚህ የተነሳ የጠቅላይ ሚኒስትሩ ጥበቃዎች "ደብዳቤውን አንቀበልም" ብለው ለማባረር ትልቅ ውዝግብ ውስጥ ገብተው እንደነበር ታሪክ ይናገራል 😀 ለማንኛውም ሴቶች ሳትሽኮረመሙ የሚሰማችሁን ተናገሩ! ጠይቁ! ጩሁ! ናንሲ አስቶር የተባለች የመጀመሪያዋ በብሪታንያ የፓርላማ ሴት አባል እንዲህ ትላለች.... “እኔ ሁልጊዜም የምናገረው ዝም ብዬ ብቀመጥ ወንዶቹ እኔን ወክለው የተሳሳተ ነገር ይናገራሉ ብዬ ስለምሰጋ ነው።” ትላለች 😀 አይ እኛ! 🙂 - @sr36377378