بـ أليوم ألثاني و تحديداً ألساعة بـ 10:17 دقيقة ألصبح .. چنت غاطة بـ ألنوم و تعبانة مِن سهر ألبارحة و ألتفكير و فجأة حسيت على إيد تهزني بـ قوة . فتحت عيوني بـ ثگل لگيت مـودة واگفة فوگ راسي وجهها مگطوع منة ألدم و گالتلي بـ صوت مستعجل و خافت : مـودة - : مُـناجاة گومي بساع ، گومي .. نـور أجتنا و گاعدة بـ ألهول تبچي تگول خلي نروح لـ بيت سـجى بلكي مسويلها فاتحة بيناتهم نعزي أمها و نواسيها و نرجع . فزيت مِن مكاني بدون ما أحچي أي كلمة .. عقلي چان مشوش بس گلبي مگبوض . طلعت هدومي ، لبست دشداشة سودة و لفيت حجاب أسود على راس ، و لبست عبايتي . غسلت وجهي بـ مي بارد بـ سرعة حتى أصحصح ، رشيت رشة عطر خفيفة و طلعت لـ ألهول لگيت نـور گاعدة تمسح بـ دموعها . طلعنا أحنا ألثلاثة ( أني و مـودة و نـور ) نمشي بـ ألشارع و خطوتنا ثگيلة ، ألطريق ألي چنا نمشي بي أيام ألمدرسة و أحنا نضحك هسة نمشي بي و أحنا رايحين لـ بيت وحدة ميتة بـ أبشع طريقة . وصلنا لـ باب بيتهم .. ألبيت چان صنطة ، هدوء يخوف لا أكو چادر ، لا أكو قرايــة و لا حتى صوت بچي يطلع مِن ورة ألحياطين . كأنما بيت مهجور . نـور قدمت إيدها ترجف و دگت ألباب دگتين خفيفات . وگفنت ننتظر .. ثواني و نفتح ألباب و طلع ( أحـمد ) .. أخو سـجى ! أول ما شافنا ملامحة أنگلبت و عيونة جدحت نار .. چان لابس دشداشة ، و وجهه بي قساوة و جمود يرعب ، ما بي ذرة حزن على أختة ألي ماتت ألبارحة . نـور رادت تحچي ، بلعت ريگها و گالت بـ صوت يرجف : نـور - : خويا أحـمد عظم ألله أجركم .. أحنا صديقاتـ.. قبل لا تكمل ألكلمة قاطعها أحـمد بـ صوت خشن و حاد مثل ألسيف و عينة تخزرنا مِن فوگ لـ جوة : أحـمد - : أجرمن ؟! و صديقات منو ؟ تقدم خطوة لـ گدام و گال بـ نبرة كُلها حقد و قسوة : أحـمد - : أسمعن ولچن .. أحنا ما عدنا فاتحة ، و لا عدنا بنية ماتت و مِن ألأساس ما عدنا بنية أسمها ( سـجى ) ! ألي تجيب طاريها أو توگف بـ بابنا أكسر رجليها .. يلة توكلن مِن هنا لا أبتلي بيچن ! حچاها بـ عصبية و رگع ألباب بـ وجوهنا بـ كُل قوتة طگة ألباب فززت گلوبنا و خلتنا نرجع خطوة لـ ورة مِن ألصدمة . وگفنا بـ مكاننا متسمرين .. نـور خلت إيدها على حلگها و گامت تشهگ بـ ألبچي بـ صوت عالي بـ نص ألشارع . مـودة سحبتنا مِن إيدينا بـ سرعة ، و عيونها مدمعة و تگول : مـودة - : أمشن .. أمشن نرجع ! شترتجن مِن ناس كتلوا بتهم بـ إيدهم و ذبوها بـ ألتراب بـ أنصاص ألليالي ؟ مشينا بـ ألشارع راجعين لـ ألبيت .. و أني أباوع لـ بابهم ألي أبتعد عن عيني . صدگ أللي گال ألموت مو بس طلعة ألروح ألموت مِن أهلك يمسحون أسمك مِن ألدنيا و كأنما ما بيوم تنفست هواها . سـجى أنمسحت ماكو فاتحة ، ماكو بـچي و ماكو حتى أسم .. أنتهت قصتها بـ رگعة باب ! #قصتي #قصص #خواطر - @a_.3rq