Qalbiga daallan mararka qaar ma ooyo, mana qayliyo, ee wuu aamusa. Aamusnaantiisana waxaa ku qarsoon xanuun aan erayo lagu sheegi karin. Waxaa jira waqtiyo uu qofku dadka dhex joogo, haddana uu dareemo inuu kaligiis yahay. Wuu qosli karaa, wuu hadli karaa, dadka wuxuu tusin karaa inuu fiican yahay, laakiin gudaha qalbigiisa waxaa ka socda dagaal aan cidina arki karin. Mararka qaar waxa ugu xanuunka badan ma aha in qof kaa tago, balse waa inaad xasuusato sidii uu kuu ahaa markii uu kula joogay. Xusuus kasta waxay noqotaa dhaawac cusub, meel kasta oo aad tagtana waxaad ka dareemaysaa maqnaanshihiisa. Waxaad isku daydaa inaad iska ilowdo, laakiin qalbigu ma illoobo qof uu si dhab ah u jeclaaday. Waxaa jira habeenno aad sariirta jiifsato adigoo daallan, laakiin hurdadu kuu imaan weydo. Maskaxdaadu waxay dib u soo celisaa wax kasta oo dhacay, hadalladii, ballamihii, qosolkii iyo maalmaha aad moodaysay inay weligood sii jiri doonaan. Waxaad is weydiisaa: “Maxaa is beddelay? Maxaan qalbigayga ugu aaminay qof aan maanta iga fogaan kara?” Su’aalahaas jawaabtooda mararka qaar lama helo. Qofka ugu aamusan mararka qaar waa kan ugu xanuunka badan. Ma doonayo inuu dadka u sheego waxa qalbigiisa ku jira, sababtoo ah wuxuu ka baqayaa in aan la fahmin. Sidaas darteed wuxuu doortaa aamusnaan, isagoo ilmada qarinaya iyo murugadiisana qalbiga ku aasaya. Laakiin qalbi daallan wuxuu mudan yahay nasasho. Qof walba oo kaa tagay ma ahayn qofka aad nolosha oo dhan u baahnayd. Mararka qaar Alle wuxuu kaa fogeeyaa qof aad u malaynaysay inuu yahay farxaddaada, si uu kuu tuso in farxadda dhabta ahi aysan ku xirnayn qof kale. Haddii maanta qalbigaagu daallan yahay, ha isku canaanan inaad weli xasuusato. Ha isku qasbin inaad si degdeg ah u illowdo. Xanuunku waqti ayuu qaataa, qalbiguna wuxuu u baahan yahay waqti uu ku bogsado. Maalin ayaa iman doonta oo aad xusuusta maanta ku ooyaysid aad berri si deggan u xasuusan doonto. Waxaa laga yaabaa inaad maanta dareemayso Alone 💔, laakiin kalinimada maanta ma go’aamiso noloshaada oo dhan. Qalbiga dhaawacmay wuu bogsan karaa, ilmada maanta daadanaysana berri waxay noqon kartaa xusuus kuu sheegaysa inaad ka xoog badnayd intaad moodaysay.💔 - @zeynababdiali