@mohamedalmustafa16: اول حاجة بتخطر في باله: "الناس حتقول شنو؟" لو لبسته لبسة جديدة "يمكن ما تعجبهم." ولو حصل نقاش وسكت يمكن الناس تفهمو غلط، ولو اتكلم بخاف من النقد. شوية شوية، بلقى روحو عايش حياة مكتوبة بأقلام الناس الغريب في الموضوع، إنو الناس البتشيل همهم شديد، غالبًا ما بيكونوا شايلين همك أصلًا. كل زول عندو هموم، وعندو مشاغلو، ويمكن الزول القاعد تنتظر منو كلمة مدح، يكون ناسيك من أول ما فارقتو. الحياة ياصحبي أقصر من إنك تقضيها بتشرح نفسك لكل واحد، وأقصر من إنك تبرر كل قرار أخدتو، أو كل خطوة مشيتها. في النهاية، مهما عملت، حتلقى زول يشوفك صاح، وزول يشوفك غلط. ولو بقيت تجري ورا رضا الجميع، حتتعب... لأنك بتجري في طريق ما عندو نهاية. في ناس حياتهم كلها وقفت عشان كلمة قالها واحد ما بعرفهم كويس. وفي ناس ضيعوا فرص، وكتموا أحلام، وسكتوا عن حقهم، بس خوفًا من كلام البشر. وبعد سنين، عرفوا إنو الكلام الخلفى منو انتهى في يومو... لكن العمر الضاع ما رجع.💔😪 اتذكر دايمًا إنو الناس بتحكم من الظاهر. يشوفوا دقيقة من حياتك، ويحكموا على سنين. يسمعوا كلمة، وينسوا ألف موقف كويس. ولو حاولت تصلح صورتك عند كل زول، حتلقى نفسك كل يوم لابس وش جديد، لحدي ما تنسى وشك الحقيقي. في مرات بتكون قاعد مع ناس، يضحكوا ليك، ويشجعوك، لكن أول ما تقوم من قدامهم، الكلام يتغير. ومرات تلقى زول ماف بينك وبينو معرفة كبيرة، لكن بدعي ليك من قلبو. عشان كدا، ما تربط قيمتك برأي الناس، لأن القلوب ما كلها واحدة، والنوايا ما كلها صافية. اعمل الخير لأنك مؤمن بيهو، ما عشان الناس تشوفك. ساعد الزول المحتاج حتى لو ما شكرك. اعتذر لو غلطت، لكن ما تعتذر عن كل خطوة عشان ترضي الناس. ولو عندك حلم، امشى وراهو، حتى لو ما لقيت تصفيق في البداية. التصفيق الحقيقي بيجي بعد التعب، وما كل نجاح بيبدأ بإعجاب الناس.❤️🩹 ريح قلبك من الحمل التقيل. ما كل كلمة تستاهل ترد عليها، وما كل نقد يستحق توقف عندو. في كلام لو سكت عنو، بموت براهو. وفي ناس أحسن رد ليهم إنك تواصل طريقك وكأنهم ما قالوا حاجة. خلي بالك من حاجة مهمة... العمر ما بوقف . كل يوم بيعدي، بياخد معاه فرصة، وذكرى، وجزء من حياتك. فلو ضيعت يومك كله في التفكير: "فلان قال شنو؟ وعلان فهمني كيف؟" إنت في الحقيقة بتدي الناس زمن من عمرك مجانًا. وفي آخر المشوار، لا حتلقى الناس شايلين معاك تعبك، ولا حتلقى زول يعيش مكانك الأيام الضاعت. البفضل ليك هو ضمير مرتاح، وقلب خفيف، وسيرة طيبة بين الناس.🤍 #فى_الختام ... عيش ببساطة، وأعمل الخير، واحترم الجميع، لكن ما تخلي رضا الناس يبقى هو البوصلة البتحدد اتجاهك...❤️🩹.🫶 #خواطر_لها_معنى #💔🥀🚶♂️ #creatorsearchinsights
![﷼[خواطر وحكم]﷼](/img/avatar/7163211592191591429.jpeg){kind=small}
