အိမ်ခြံမြေတိုက်ခန်းဝယ်ယူထားသူများ စက်တင်ဘာလမှစတင်၍ ဝင်ငွေရလမ်း စိစစ်ခြင်းနှင့်အခွန်ကင်းရှင်းကြောင်း တင်ပြနိုင်မှသာလျှင် ပိုင်ဆိုင်မှုအမည်ပြောင်းပေးမည်ဟု စစ်တပ်က ကြေညာ 🟥 ကျပ်သိန်း ၁၀၀ ကျော်သော အမြတ်ငွေများ၏ ၁၀ ရာခိုင်နှုန်းကို အခွန်ပေးရမည်ဟုအမိန့်ထုတ် ရန်ကုန်၊ ဩဂုတ် ၂၂ အိမ်၊ ခြံ၊ မြေ၊ အဆောက်အအုံနှင့် တိုက်ခန်းများ ဝယ်ယူထားသူများအနေဖြင့် စက်တင်ဘာလ ၁ ရက်နေ့မှစတင်၍ ဝယ်ယူရန် အသုံးပြုသည့်ငွေကြေး၏ ဝင်ငွေရလမ်း စိစစ်ခံယူပြီး ဝင်ငွေခွန် စည်းကြပ်ပြီးစီးကြောင်း အထောက်အထား တင်ပြနိုင်မှသာ ပိုင်ဆိုင်မှုအမည်ပြောင်း မှတ်ပုံတင်ပေးမည့် လုပ်ငန်းစဉ်ကို စတင်ဆောင်ရွက်သွားမည်ဖြစ်ကြောင်း စစ်တပ်လက်အောက်ခံ ပြည်တွင်းအခွန်များဦးစီးဌာနက အသိပေးထားသည်။ အလားတူ အိမ်ခြံမြေ၊ တိုက်ခန်းများ ရောင်းချသူများအနေဖြင့်လည်း ရောင်းချခြင်းမှ မြတ်စွန်းငွေ ပေါ်ပေါက်ခြင်း ရှိ၊ မရှိ စိစစ်ခံယူပြီး အဆိုပါမြတ်စွန်းငွေအပေါ် အခွန်ကင်းရှင်းကြောင်း ထောက်ခံချက် ရယူထားမှသာ အမည်ပြောင်းမှတ်ပုံတင်ခြင်းကို ဆက်လက်ဆောင်ရွက်ပေးမည်ဖြစ်ကြောင်း သိရသည်။ အဆိုပါ သတ်မှတ်ချက်သည် အိမ်၊ ခြံ၊ မြေ၊ အဆောက်အအုံနှင့် တိုက်ခန်းများ ဝယ်ယူရောင်းချပြီး စာချုပ်စာတမ်းမှတ်ပုံတင်ရုံးတွင် စာချုပ်ချုပ်ဆိုခြင်း၊ မြို့ပြနှင့်အိမ်ရာဖွံ့ဖြိုးရေးဦးစီးဌာနတွင် အမည်ပြောင်းလျှောက်ထားခြင်း သို့မဟုတ် ရန်ကုန်မြို့တော်စည်ပင်သာယာရေးကော်မတီတွင် ပိုင်ဆိုင်မှုအမည်ပြောင်း လျှောက်ထားခြင်းများ ပြုလုပ်သည့်အခါ အကျုံးဝင်မည်ဖြစ်သည်။ ဝယ်ယူသူများအနေဖြင့် သက်ဆိုင်ရာ မြို့နယ်အခွန်ဦးစီးဌာနမှူးရုံးတွင် ဝယ်ယူရန် အသုံးပြုသည့်ငွေကြေး၏ ဝင်ငွေရလမ်းကို စိစစ်ခံယူရမည်ဖြစ်ပြီး ဝင်ငွေခွန် စည်းကြပ်ပြီးစီးကြောင်း အထောက်အထားများကို တင်ပြရမည်ဖြစ်သည်။ ရောင်းချသူများကလည်း အဆိုပါ အိမ်၊ ခြံ၊ မြေ၊ အဆောက်အအုံ သို့မဟုတ် တိုက်ခန်းကို ရောင်းချခြင်းကြောင့် အခြေပစ္စည်းမှ မြတ်စွန်းငွေ ရရှိခြင်း ရှိ၊ မရှိ စိစစ်ခံယူရမည်ဖြစ်ပြီး မြတ်စွန်းငွေ ပေါ်ပေါက်ပါက ကျသင့်အခွန်ကို ပေးဆောင်ပြီး အခွန်ကင်းရှင်းကြောင်း ထောက်ခံချက် ရယူထားရန် လိုအပ်မည်ဖြစ်သည်။ ပြည်တွင်းအခွန်များဦးစီးဌာန၏ သတ်မှတ်ချက်အရ အခြေပစ္စည်းဆိုသည်မှာ မြေ၊ အဆောက်အအုံနှင့် ယင်းတို့၏ အခန်းများအပြင် ယာဉ်၊ လုပ်ငန်းဆိုင်ရာ မတည်ပစ္စည်း၊ အစုရှယ်ယာ၊ ကတိခံဝန်ချုပ်၊ ငွေချေးသက်သေခံလက်မှတ်များနှင့် အလားတူ စာချုပ်စာတမ်းများကို ဆိုလိုသည်။ အခြေပစ္စည်းမှ မြတ်စွန်းငွေဆိုသည်မှာ အဆိုပါပစ္စည်းကို ရောင်းချခြင်း၊ လဲလှယ်ခြင်း သို့မဟုတ် လွှဲပြောင်းခြင်းပြုလုပ်ရာမှ ရရှိသည့် မြတ်စွန်းငွေကို ဆိုလိုသည်။ အမွေဆက်ခံခြင်း၊ အဖိုးစားနားမပါဘဲ မေတ္တာဖြင့် ပေးကမ်းခြင်းနှင့် လှူဒါန်းခြင်းတို့ကိုမူ အဆိုပါ လွှဲပြောင်းမှုတွင် ထည့်သွင်းတွက်ချက်မည်မဟုတ်ကြောင်း သိရသည်။ တစ်နှစ်အတွင်း အခြေပစ္စည်းတစ်ခု သို့မဟုတ် တစ်ခုထက်ပို၍ ရောင်းချခြင်း၊ လဲလှယ်ခြင်း သို့မဟုတ် အခြားနည်းလမ်းဖြင့် လွှဲပြောင်းခြင်းပြုလုပ်ရာတွင် အဆိုပါအခြေပစ္စည်းများ၏ တန်ဖိုးစုစုပေါင်းသည် ကျပ်သိန်း ၁၀၀ ထက်ကျော်လွန်ပြီး မြတ်စွန်းငွေပါ ပေါ်ပေါက်ပါက ရောင်းချခြင်း၊ လဲလှယ်ခြင်း သို့မဟုတ် လွှဲပြောင်းခြင်း ပြုလုပ်သည့်နေ့မှ ရက်ပေါင်း ၃၀ အတွင်း သက်ဆိုင်ရာအခွန်ရုံးတွင် ဝင်ငွေကြေညာလွှာ တင်သွင်းပြီး ကျသင့်သည့်အခွန်ကို ပေးဆောင်ရမည်ဖြစ်သည်။ အခွန်တွက်ချက်ရာတွင် အိမ်၊ ခြံ၊ မြေ၊ အဆောက်အအုံနှင့် အခန်းများအတွက် သက်ဆိုင်ရာ ကာလတန်ဖိုး စိစစ်သတ်မှတ်ရေးအဖွဲ့က သတ်မှတ်ပေးသည့် တန်ဖိုးကို အခြေခံမည်ဖြစ်သည်။ ရန်ကုန်မြို့တော်စည်ပင်သာယာရေးနယ်နိမိတ်အတွင်းရှိ အိမ်ခြံမြေများအတွက် ရန်ကုန်တိုင်းဒေသကြီး ကာလတန်ဖိုး စိစစ်သတ်မှတ်ရေးအဖွဲ့က တန်ဖိုးသတ်မှတ်ပေးမည်ဖြစ်ပြီး စည်ပင်သာယာရေးနယ်နိမိတ်ပြင်ပရှိ အိမ်ခြံမြေများအတွက် သက်ဆိုင်ရာ မြို့နယ်ကာလတန်ဖိုး စိစစ်သတ်မှတ်ရေးအဖွဲ့က တန်ဖိုးသတ်မှတ်ပေးမည်ဖြစ်သည်။ ယင်းသတ်မှတ်အရောင်းတန်ဖိုးမှ မူလဝယ်ယူခဲ့သည့် တန်ဖိုးကို နုတ်ပယ်မည်ဖြစ်သကဲ့သို့ အဆိုပါအခြေပစ္စည်းကို ရောင်းချရန်၊ လဲလှယ်ရန် သို့မဟုတ် လွှဲပြောင်းရန်အတွက် အသုံးပြုခဲ့သည့် သာမန်ကုန်ကျစရိတ်များကိုလည်း နုတ်ပယ်ပေးမည်ဖြစ်သည်။ ယင်းကုန်ကျစရိတ်များတွင် အိမ်အဆောက်အအုံများ ဆေးသုတ်ပြုပြင်ခြင်းစရိတ်၊ ရောင်းချရာတွင် ပေးရသည့် ပွဲခစသည့် ကုန်ကျစရိတ်များ ပါဝင်နိုင်သည်။ အဆိုပါ နုတ်ပယ်မှုများပြုလုပ်ပြီးနောက် မြတ်စွန်းငွေ ပေါ်ပေါက်ပါက ယင်းမြတ်စွန်းငွေအပေါ် ၁၀ ရာခိုင်နှုန်း ဝင်ငွေခွန် ပေးဆောင်ရမည်ဖြစ်ကြောင်း ပြည်တွင်းအခွန်များဦးစီးဌာနက သတ်မှတ်ထားသည်။ "အိမ်ခြံမြေ အရောင်းအဝယ်နဲ့ အိမ်ခြံမြေထဲ စီးဝင်နေတဲ့ ငွေတွေကို တားဆီးဖို့ ကြိုးစားတဲ့သဘောလို့ မြင်ပါတယ်။ ဒါပေမယ့် အောက်ခြေယန္တရားက ငွေပေးပြီး ညှိလို့ရနေသမျှကာလပတ်လုံးကတော့ လုပ်စားဂွင်ကြီးတွေဖြစ်လာဦးမှာပဲ။ အထက်က စည်းမျဉ်းစည်းကမ်းတင်းကျပ်လေ အောက်ခြေမှာ လာဘ်ပေးလာဘ်ယူဂွင်ကြီးက ပိုကြီးလာလေလေပါပဲ" ဟု ရန်ကုန်အခြေစိုက် စိုင်းဝမ့်မောင် အိမ်ခြံမြေအကျိုး - @zayartbz7news