أنا مَاريا .. عُمري ١٩ سَنة ، مِن مُحافظة السُليمانية أنولدت بين عائلة مسيحية گُرديه وهنا تبدأ قُصتي .. مِن چنت بعُمر ألـ ٥ سَنوات ، أُمي وأخوي الأكبر مني أتوفوا لٰكن سبب وفاتهُم ما چنت أعُرفه ، بابا چان دوم يعاملني أسوء المُعاملة وكُلشيء ما موفرلي ويلومني عَلىٰ سبب وفاة أُمي وأخوية ويحملني الذَنب وأنا مالي علاقة بـ أي شيء ، صرت بعُمر ألـ ٨ سنين وبليلة من الليالي بابا گال ألي ::: أني راح أروح لصديقي الفجر أرجع أبقي وحدچ چنت خايفة أبقىٰ وَحدي لٰكن قررت أروح لبيت جيرانّا ، خالة أرجوان ألي هيَ سابقًا چانت صَديقة أُمي ، تحبني كُلش وتعاملني أحسن مُعاملة ما چان عندها أطفال و زَوجها متوفي وتعتبرني بنتها رحت يَمها وسوتلي أكل ومشطتلي شَعري وأنتظرنا للفَجر وماكو بابا ما أله أي أثر ! فُص ملح وذاب نَعست ونمت بدون ما أحس عَلىٰ نفسي وگعدت ثاني يوم وخالة أرجوان گالتلي – : خلي نروح نشوف أبوچ رجع ؟ ورحنا والبيت فارغ ! ما موجود بابا ! خالة خلتني أبقىٰ يمها وصار أسبوع وبابا مارجع عُرفت بابا أتخلىٰ عَني وعافني ، خالة ماقصرت ويايَ بشيء وكُبرت يمها وچانت معاملتني أحلىٰ مُعاملة فَد يوم مِن الأيام قررت أسألها مَـاريا ::: خالة ، أُمي وأخوية شلون أتوفوا ؟ أرجوان ::: أهخخ يا حَبيبتي ماريد أسولفلچ مَـاريا ::: ليش ؟ أرجوان ::: باعي حياتي ، أُمچ چانت مستشيعه وبعدها أخوچ درىٰ وأُمچ قنعته وأستشيع وياها طَبعًا أُمچ من أعز صديقاتي المُهم ، قبل وفاتها الله يرحمها أجتني وگالتلي يمكن أبو يعقوب درىٰ بينا مستشيعين وأبوچ چان مُتشدد وقاسي كُلش ومِن بعدها أُمچ وأخوچ راحوا ويَ أبوچ وأُمچ خلتچ يمني وأبوچ گال صار حادث بَس أكو هواي أشياء غامضة ومحد يعرفها ، يجوز بمرور الوقت تعرفيها أنتِ مَـاريا ::: مثل شنو يَعني ؟ أرجوان ::: مادري يا مَاريا مادري ، أني هَم مثلچ أُمي متوفية ، وأبوية زوجني لشخص گردي وأجيت هنا ودوم أتمنى أرجع لبغداد بَس أحب سليمانية مَـاريا ::: أنتِ مسيحية ؟ أرجوان ::: لا حَـبيبتي مَـاريا ::: عاجبني أستشيع وأصير مُسلمة خالة كُلش فرحت وصارت كُل يوم تسولفلي عَن الأسلام وأهل البيت لحَد ما أستشيعت وهيَ فرحانة وبكُل لحظة ويايَ وبعُمر الـ ١١ سَنة أتحجبت ، وبابا ؟ ما لگينة منة أي أثر وخَبر . ما چنت مهتمة أله لأن خالة معوضتني چنت أباوع كارتون وچانت عُطلة مدرسية وماعندي شيء چان تصدمني خالة و ألگاها تلم بالملابس وتگول – : گومي گومي راح نروح لبغداد ! أنصدمت ! وبنفس الوقت فُرحت ، عاجبني أشوف بَغداد وناسها گُمت أساعدها ومِن سألتها ليش جاوبتني بـ : – حَنيت لبَغداد أتذكرت مدرستي وگلتلها : – خالة ومدرستي ؟ أرجوان ::: بطلي منها فتحت عيوني بصدمة – : لا خالة شنو ابطل احب دراستي ماقبلت وهددتني يا أما أبطل لو تعوفني وحدي وتروح هيَ ، ما چان بأيدي حَل ووافقت أرجوان ::: يجي أقاربي ياخذنا ما أعترضت عَلىٰ الفكرة وأجىٰ شَخص أقاربها سلم علينه ورُكبنا ويا وأخذنة طول الطريق نايمة لأن الطريق طويل ومُتعب ومِن گعدتني خالة كُلش فرحت گعدت وأباوع عَلىٰ بَغداد وأماكنها وناسها والفرحة مسايعتني أشترينا شُقة وگعدنا بيها وبَعد كَم يوم صدمتني خالة بخبر زواجها ! ونفسة الشخص أقاربها ألي وصلنا لبَغداد ضجت وگلت خاف تتغير عليَّ خاف تكرهني وألف فكرة أجت براسي عقدوا وصار عرس بسيط بين الأهل واتزوجوا وأنا ؟ عافوني بنفس الشُقة وَحدي وخالة صدمتني بكلامها أرجوان ::: آسفة بَعد ماگدر أتحمل مسؤوليتچ أنتِ كبرتي وأني اتزوجت وزوجي ميقبل تعيشين ويانا شوية سكتت وگالت ::: هاي الشقه ماريدها تگدرين تعيشين بيها وحدچ . چانن كلامات كافيات عَلىٰ خُذلاني وكَسرتي ، بَعد ما أتعلقت بيها وأعتبرتها أُمي عافتني وراحت ؟ چانت واعدتني متعوفني ليش عافتني زين أريد أهلي أريد أندل وين مدفونين ما أندل بالضبط وين أبوية ليش عافني ؟ ليش ما أعرف أي خَبر عنه ليش هلگد حياتي غامضة وبيها هواي أشياء أنا ماعرفها ؟ ليش من اسأل ماكو جواب لسؤالي ؟ بمرور الأيام خلص الأكل وما عندي فلوس وكُلشيء خلصت ! طلعت أتمشيت وگعدت عَلىٰ رصيف وحطيت أيدي عَلىٰ خَدي الناس تمُر من يمي مستغربة وتروح ، رفعت عيوني وشفت شخص من بعيد يباوعلي مِن شافني أنتبهتله دار نفسة وراح ، أستغربت منو هٰذا ؟ ما أنتبهت عَلىٰ ملامحة وما ركزت عَلية ما أهتميت لموضوعة وبقيت صافنة وجوعانة حايرة شسوي خالة عافتني وراحت وبابا عافني وأُمي وأخوية اتوفوا وعافوني مَحد بُقالي أتمنىٰ قبل لا نجي لبغداد اروح لبيتنا آخذ صور أُمي وأخوية وأحتفظ بيهن چنت أحبهم ويحبوني وما مقصرين بشيء وياية ويعقوب ؟ يموت عليَّ لحد هَسة أتذكر أشياء صغيرة منهم وأتذكر باللحظة السمعت بيها عياط وبچي ما زايرتهُم أبدًا بَس مرة وحدة وأتمنىٰ أرجع أزورهم بَس ما أندل مكانهم بالضبط . ضليت طول اليوم بدون أكل بالليل رجعت للشقة تمددت عَلىٰ الفراش ، وبطني توجعني من الجوع نمت وأنا جوعانة .. #قصتي #خواطر - @m.arii9