*Леңгірде әйелді бірнеше сағат бойы ұрып-соққан: қоғам белсендісі полицияға үндеу жасады* *Түркістан облысының Леңгір қаласында тұрғын үйге бірнеше адамның басып кіріп, әйелді бірнеше сағат бойы ұрып-соққаны туралы ақпарат тарады. Оқиғаға қоғам белсендісі Айгүл Орынбек назар аударды, деп хабарлайды Qaz365.kz* Белсендінің әлеуметтік желідегі жазбасына сәйкес, оқиға түнгі сағат 02:00 шамасында болған. Оның айтуынша, бірнеше адам бетперде киіп келіп, әйелді байлап, таңғы сағат 05:00-ге дейін ұрып-соққан. Айгүл Орынбек жариялаған видеода зардап шеккен әйелдің беті қан-жоса болып, ауыр соққы алғаны көрінеді. Кадрлардан әйелдің бет-әлпеті қатты ісініп, жарақаттанғаны байқалады. Видео оқиғаның салдарын ғана көрсетеді. Белсендінің айтуынша, күдіктілер әйелді үйдің ішінде бірнеше сағат ұстап, кейін оқиға орнынан кеткен. Қазір олардың ұсталғаны туралы ақпарат жоқ. «Кеше түнгі сағат екі шамасында Леңгір қаласында болған жағдай — жай ғана қылмыс емес, бұл қоғам қауіпсіздігіне төнген дабыл. Бірнеше адам маска киіп келіп, азаматшаны байлап, таңғы сағат беске дейін ұрып-соққан», -дейді Айгүл Орынбек. Қоғам белсендісі бұл оқиғаның артында нақты кімдер тұрғанын анықтау қажет екенін айтып, Түркістан облысының полициясына үндеу жасады. «Құрметті Ержан Саденов мырза, Түркістан облысының полициясына назар аударуыңызды сұраймын. Халықтың қауіпсіздігі — есеп үшін жасалатын жұмыс емес. Әрбір қылмыс дер кезінде зерттеліп, әрбір күдікті заң алдында жауап беруі керек», - дейді ол. Айгүл Орынбек сондай-ақ соңғы уақытта ұрылардың үйлерге ашық кіріп, тұрғындардың өміріне қауіп төндіретін деңгейге жеткенін атап өтті. «Ұрылар енді түн жамылып қана жүрмейді. Үйге ашық кіріп, адамның өміріне қауіп төндіретін деңгейге жетті. Бұл — өте қауіпті белгі. Бүгін біреудің үйіне кірді. Ертең кімнің есігін қағады?», - дей келе Леңгірдегі оқиғаны толық әрі ашық тексеріп, кінәлілердің барлығын анықтауды талап етті. Әзірге аталған жайт бойынша Түркістан облысының полиция департаментінен ресми ақпарат түскен жоқ. Оқиғаның нақты мән-жайы мен қылмысқа қатысы бар адамдардың кім екені полицияның ресми тексеруінен кейін белгілі болады. - @qaz365kz