ڪرن شيخ بابت الزامن جو معاملو: پوليس اهلڪار کان پهرين گهرواري تائين، سنگين دعوائن جاچ طلب ميرپورماٿيلو: ليڊي پوليس اهلڪار ۽ ٽڪ ٽاڪر ڪرن شيخ بابت مختلف وقتن تي سامهون ايندڙ الزامن هڪ نئون سوال اٿاري ڇڏيو آهي. ذريعن ۽ متاثر ڌرين پاران ڪيل دعوائن موجب، ڪرن شيخ تي اڳ هڪ پوليس اهلڪار کي حراسان ڪرڻ جو الزام لڳايو ويو، جنهن کانپوءِ ڄاڻايل اهلڪار خلاف کاتي واري ڪارروائي، معطلي ۽ جيل وڃڻ جو معاملو سامهون آيو هو. هاڻي ٻي طرف ڪرن شيخ جي پنوعاقل واسي وحيد چاچڙ سان شادي کانپوءِ سندس پهرين گهرواري غلام فاطمه پاران سنگين الزام سامهون آيا آهن. غلام فاطمه جو الزام آهي ته مڙس کيس تشدد جو نشانو بڻايو، جان کان مارڻ جون ڌمڪيون ڏنيون ۽ کيس ”ڪاري“ قرار ڏئي گهر مان ڪڍڻ جي ڪوشش ڪئي وئي. متاثر عورت جو چوڻ آهي ته هوءَ ٻن ٻارن جي ماءُ آهي ۽ هن وقت حمل سان پڻ آهي. معاملي جو سڀ کان اهم پاسو اهو آهي ته هڪ عورت جي دعويٰ موجب کيس سندس ئي گهر مان ڪڍڻ لاءِ ڪاري ڪاري جو الزام استعمال ڪيو پيو وڃي، جڏهن ته ٻئي طرف ڪرن شيخ پاڻ هڪ پوليس اهلڪار خلاف حراسان ڪرڻ جو الزام لڳائڻ واري معاملي ۾ اڳ ۾ به خبرن جو حصو رهي چڪي آهي. هي معاملو هاڻي صرف ٻن خاندانن جو ذاتي تڪرار نه رهيو آهي، پر پوليس کاتي جي اهلڪار سان لاڳاپيل هجڻ سبب شفاف جاچ ۽ قانوني ڪارروائي جو سوال پڻ پيدا ڪري ٿو. متاثر غلام فاطمه ايس ايس پي گهوٽڪي ۽ اعليٰ پوليس اختيارين کان مطالبو ڪيو آهي ته کيس تحفظ فراهم ڪيو وڃي، مبينا تشدد ۽ ڌمڪين جي جاچ ڪرائي وڃي ۽ جيڪڏهن الزام درست ثابت ٿين ته ذميوارن خلاف قانون موجب ڪارروائي ڪئي وڃي. - @yaseendharejo2