Madaxweyne CMC ayaa si adag uga hadlay hoggaamintii jabhadihii nabad-diidka ahaa iyo dhibaatadii ay shacabka Soomaaliyeed soo gaadhsiyeen xilliyadii ay hubka iyo colaadda gacanta ku hayeen. Madaxweyne CMC ayaa tilmaamay farqiga weyn ee u dhexeeyay nolosha hoggaamiyeyaashii colaadda hurin jiray iyo noloshii dhalinyaradii Soomaaliyeed ee ay dagaallada iyo duruufaha adagi saameeyeen. Wuxuu sheegay in carruurtii madaxda iyo hoggaamiyeyaashii jabhadaha ay helayeen fursado waxbarasho, nolol wanaagsan iyo mustaqbal loo diyaariyo, halka wiilashii Soomaaliyeed ee ay iyagu hoggaaminayeen lagu riixi jiray dagaal iyo dhibaato. Hadalku wuxuu ahaa mid xanuun badan oo xusuusinaya waqtiyo ay dhalinyaro badan waayeen fursaddii ay wax ku baran lahaayeen, qaarna ay ku naf waayeen dagaallo aan dhammaad lahayn. Halkii wiilka Soomaaliyeed laga dhigi lahaa arday berri dhakhtar, injineer, macallin ama aqoonyahan noqon kara, waxaa lagu khasbi jiray xaalado adag oo noloshiisa iyo mustaqbalkiisa halis gelinaya. Madaxweyne CMC wuxuu si gaar ah u muujiyey su’aasha mudan in jiil kasta uu is weydiiyo: Haddii hoggaamiyayaashu carruurtooda u diraan iskuullo iyo jaamacado, maxay dhalinyarada Soomaaliyeed ugu diri waayeen iskuullada halkii ay dagaal ugu diri lahaayeen? Waa su’aal culus oo xambaarsan cashar taariikhi ah.Dhallinyaradu waa hantida ugu weyn ee ummad leedahay. Haddii dhalinyarada la baro aqoon, xirfad iyo waddaniyad, waxay dhisayaan waddooyin, isbitaallo, iskuullo, ceelal iyo magaalooyin. Haddii se dhalinyarada lagu barbaariyo colaado iyo nacayb, waxaa lumiya ummaddu jiilal badan oo mustaqbalka wax ka beddeli lahaa nolosheeda. Taariikhdu waxay ina baraysaa in hubku uusan ahayn mustaqbalka ummad, colaadduna aysan ahayn wax lagu dhiso bulsho. Waxa lagu dhiso bulsho waa aqoon, nabad, cadaalad, horumar iyo midnimo. Hadalkii Madaxweyne CMC wuxuu sidoo kale xambaarsanaa fariin ku socota waalidiinta, dhalinyarada iyo hoggaamiyeyaasha Soomaaliyeed: carruurta ha laga ilaaliyo colaadaha, ha loo furo albaabada waxbarashada, xirfadaha iyo horumarka. Waxaa la joogaa waqtigii wiilka Soomaaliyeed loo oggolaan lahaa inuu buug qaato halkii hub loo dhiibi lahaa; inuu fasal galo halkii goob dagaal loo diri lahaa; inuu mustaqbal dhisto halkii lagu khasbi lahaa inuu naftiisa iyo tan dadka kale khatar geliyo. Hoggaamiyaha dhabta ahi ma aha kan dhalinyarada dagaal u dira, balse waa kan dhalinyarada u abuura fursad ay ku helaan waxbarasho, shaqo, caafimaad iyo nolol sharaf leh. Jiilkii hore casharro badan ayuu soo maray. Jiilka maanta jooga waxaa looga baahan yahay inuu casharradaas ka faa’iidaysto oo uu mustaqbalka ka dhigo mid ka wanaagsan wixii hore. Madaxweyne CMC hadalkiisa wuxuu ku celiyey muhiimadda ay leedahay in shacabka iyo gaar ahaan dhalinyarada loo sameeyo waddo horumarineed oo ka fog colaadaha iyo burburka. Waa fariin mudan in la xasuusto, gaar ahaan marka laga hadlayo mustaqbalka jiilka Soomaaliyeed. Wiilka Soomaaliyeed wuxuu mudan yahay buug iyo qalin, dugsi iyo jaamacad, shaqo iyo nolol sharaf leh ma aha in mustaqbalkiisa lagu beddelo colaado iyo burbur. Taariikhdu way qori doontaa wixii dhacay, jiilasha dambena way xukumi doonaan cidii dhalinyarada dhistay iyo cidii burburisay. Nabaddu waa dhaxalka ugu wanaagsan ee jiilba jiil loo gudbin karo. Aqoonteeduna waa hubka ugu xooggan ee ummaddu leedahay. Mohamed Tayyip Shidane - @mohamed.shidane555