@xususi_tv: Avropa İttifaqı (Aİ) “Deliblat qumları” təbiət qoruğunun 3500 hektardan çox ərazisini əhatə edən meşə yanğınları ilə mübarizə aparmaq üçün Serbiyaya dörd helikopter və yerüstü yanğınsöndürmə briqadaları göndərib. Bu barədə “Report”un Avropa bürosu Avropa Komissiyasına istinadən xəbər verir. Serbiya üç gün əvvəl Aİ-nin Mülki Müdafiə Mexanizmini aktivləşdirib. Komissiyadan bildiriblər ki, buna cavab olaraq Çexiya, Rumıniya və Slovakiyada yerləşən “rescEU” strateji ehtiyatından helikopterlər, eləcə də Almaniya və Rumıniyadan yanğınsöndürmə briqadaları səfərbər edilib. Yanğınlar iki həftədən çoxdur davam edir və güclü külək, çətin relyefli ərazi və yüksək temperatur səbəbindən vəziyyət mürəkkəbləşir. Aİ zərər çəkmiş rayonların “Copernicus” xidməti çərçivəsində peyk vasitəsilə xəritələndirilməsinə başlayıb.
