ዛሬ የቀድሞ የአማራ ክልል ፕሬዘዳንት አቶ ገዱ አንዳርጋቸው በአሜሪካን ሃገር ፓርኪንግ እየሰሩ የሚያሳይ አንድ ቪዲዮ ተለቆ በየቦታው መነጋገሪያ ሆኗል ወዳጄ፣ ፖለቲካውን ለጊዜው እንተወውና እንደ ሰው እናስበው። በአንድ ወቅት የክልል ርዕሰ መስተዳድር፣ ሚኒስትር ወይም ሌላ ከፍተኛ ኃላፊ ሆነህ ከሠራህ በኋላ ከሥልጣን ስትወርድ፣ ባለፈ ክብርና ባለፈ ማዕረግ ላይ ተንጠልጥለህ ከመኖር ይልቅ ሥራን በሥራነቱ አክብረህ፣ ዝቅ ብለህ ሠርተህ ቤተሰብህን ማስተዳደር የአስተዋይነት፣ የጽናት፣ የትልቅነትና የራስ መተማመን መገለጫ ነው። ሥራ አያሳፍርም። ሰውን የሚያሳፍረው ሳይሠራ መኖር፣ የሕዝብን ሀብት መዝረፍና በሌሎች ላብ ላይ ተንጠልጥሎ መኖር ነው። በንጹሕ ላብ ሠርቶ፣ ጥሮ ግሮ ማደር የሚሰጠው ውስጣዊ ሰላም ከማዕረግና ከወንበር የሚበልጥ ነው። በዚህ ረገድ እኔ አቶ ገዱ አንዳርጋቸውን ሳላደንቅ አላልፍም። በግሌ ከአቶ ገዱ ጋር በፖለቲካ ላንስማማ እንችላለን፤ አንዳንድ አቋማቸውም ላይመቸኝ ይችላል። ይህ ግን ሰው እንደ ሰው የሚያሳየውን ጽናትና ቆራጥነት እንዳላከብር አያደርገኝም። ይህ ለአሁን በሥልጣን ላይ ላሉ ሚኒስትሮችና ከፍተኛ ኃላፊዎችም ትልቅ ትምህርት ነው። ሥልጣን ዘላለማዊ አይደለም፤ ወንበርም የማንም ቋሚ ንብረት አይደለም። ዛሬ ሚኒስትር የሆነ ነገ ተራ ዜጋ ይሆናል። ስለዚህ ሥልጣን ላይ ሳላችሁ ለነገ የሚቀርላችሁ የሰበሰባችሁት ሀብት ሳይሆን በንጹሕ እጅ ሕዝብን ያገለገላችሁበት ታሪክና ክብር ነው። ከሥልጣን በኋላ በገዛ ላብህ የምትበላበትን ሥራ መሥራት አያሳፍርም፤ የሚያሳፍረው ከሥልጣን ከወረድክ በኋላ ሳትሠራ እንድትኖር የደሃውን ሕዝብ ሀብት ቀድመህ መዝረፍ ነው። ሥራ ክብር ነው። ወንበር ያልፋል፣ ማዕረግ ያልፋል፣ ሥልጣንም ያልፋል፤ ሰውን ተከትሎ የሚቀረው ግን ሥራው፣ ስሙና ሕሊናው ነው። ሰላም ለሀገራችን ይሁን። - @yebichuu