@sajalli: شنو يعني توكل؟ وشنو يعني "فَهُوَ حَسْبُهُ" ؟ ‎تعال نفكك الكلمة بحنان رب العالمين التوكل هو تشيل حملك الثكيل وتذبه بحضن رب العالمين وتنام وأنت مطمن تخيل أنت هسة عندك مشكلة تعبت قلبك وتفكيرك والأبواب كلها انسدت بوجهك تروح لرب العالمين تفرش سجادتك وتنزل دموعك وتگول "يا رب، أنا تعبت وما بيدي شي عفت الموضوع كله الك وتوكلت عليك".. هنا تبدي المعجزة! ‎رب العالمين يباوع على كلبك المنكسر وبكل حنية وعظمة يكولك {وَمَن يَتَوَكَّلْ عَلَى اللَّهِ فَهُوَ حَسْبُهُ} ‎تدري شنو يعني "حَسْبُهُ" بهيچ موقف؟ ‎يعني رب العالمين يكولك "وعزتي وجلالي أنا كافيك وأنا مكفيك وأنا ضهرك وأنا سندك وأنا اللي راح أحلها الك من حيث لا تحتسب نام رغد ولا تفكر الموضوع صار يمي يروي الإمام الرضا (ع) عن الله سبحانه وتعالى إنو قال«أحسن الظن بالله، فإن الله عز وجل يقول: أنا عند ظن عبدي المؤمن بي، إن خيرا فخيرا وإن شرا فشرا» المصدر كتاب الكافي تخيل ملك الملوك عظيم العظماء خالق المجرات والكون كله بيده خزائن السماوات والأرض يلتفت إلك أنت العبد الفقير المكسور ويكولك يا عبدي أنت ليش شايل هم الدنيا؟ ليش كلبك يعصرك من الخوف؟ عوف ذني كلهن إلي توكل عليه وثق بيه وأحسن الظن بيه أنا أتكفل بكل تفاصيل حياته يعني رب العالمين يكولك أنت شتتوقع مني؟ تتوقع أرحمك وأخلصك وأنجحك؟ وعزتي وجلالي راح أسوي اللي ببالك وأكثر بس إذا توقعت وظليت خايف وتكول الله ما راح يوفقني وسئت الظن بيا أنت اللي تختار هالطريق يعني بالمختصر انتوا تختارون وفي نفس الباب من كتاب الكافي يكول النبي ص "إن الله يستحيي أن يكون عبده المؤمن قد أحسن به الظن ثم يخلف ظنه ورجاءه" تخيل!الله الخالق العظيم يستحي يكسر خاطر العبد المأمل بيه خير ‎{فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ} (آل عمران159) بمجرد ما تقرر وتسوي اللي عليك وتتوكل تدخل بقائمة "أحباء الله".. {رَّبُّ الْمَشْرِقِ وَالْمَغْرِبِ لَا إِلَٰهَ إِلَّا هُوَ فَاتَّخِذْهُ وَكِيلًا} ‎شوف رب العالمين شلون يوصف نفسه وشلون يريدنا نتعامل وياه الله يكولك أنا رب المشرق والمغرب كل الكون بيدي ما طول الأمر هيج {فَاتَّخِذْهُ وَكِيلًا} يعني حطني المحامي مالتك حطني الكفيل بيك وبأمورك تخيل رب العالمين يصير هو "الوكيل" المباشر عن قضيتك! أكو بعد خوف؟ مستحيل {أَلَيْسَ اللَّهُ بِكَافٍ عَبْدَهُ ۖوَيُخَوِّفُونَكَ بِالَّذِينَ مِن دُونِهِ} (الزمر36) هذي الآية الله يعاتبك بعتاب كله حب وحنان يكولك معقولة تخاف من البشر؟ معقولة تخاف من المستقبل ومن المرض ومن الرزق وأنا الله موجود؟ أليس الله بكافٍ عبده؟..بلى يا رب، كافينا ومكفينا قصة نبي الله أيوب (ع) تخيل وياي بمشاعر قلبك إنسان جان عنده كلشي بالدنيا فلوس وأراضي وبساتين وأولاد وبنات ماليين عليه البيت والضحكة ما تفارقهم بلحظات وبأمر الله علمود يمرره باختبار الصبر واليقين خسر كل أمواله وماتوا أولاده وبناته كلهم جرة وحدة وفوق هذا كله حلت بجسمه علّة ومرض شديد لدرجة اللحم بدأ يتساقط من جسمه وظل طريح الفراش لسنوات طويلة (أكثر من 18 سنة) لدرجة الناس كلها عافته وتبرت منه وطلعت ريحته وخافوا من المرض وما بقت وياه بس زوجته الصابرة الوفية تخدمه وتشتغل ببيوت الناس علمود تجيب لقمة ياكلوها لو أي بشر بمكانه وبالمقاييس مالتنا جان يئس وجان انكسر وكال "خلصت حياتي بعد شكو عايش؟" بس أيوب (ع) جان عنده"يقين مرعب وحسن ظن يذوب الصخر برحمة الله" ورا هالسنوات الطويلة من الوجع والفقر وفقد الأولاد التفت لرب العالمين وبكل حنان وأدب ما طلب حتى الشفاء بشكل مباشر بل وصف حاله ووصف ربه بآية تبچي من كثر العاطفة {وَأَيُّوبَ إِذْ نَادَىٰ رَبَّهُ أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ} (الأنبياء)
 شوف الأدب الشديد ما گال "يا رب شافيني ليش هيج سويت بيا؟" لا گال "يا رب الوجع والمرض والفقر أخذ مني مأخذه بس أنا أدري ومتيقن ومتأكد إنك أنت أرحم الراحمين بيا وأرحم بيا من نفسي وأنا عايف حملي وتدبيري كله الك ومسلم لقرارك" الحنان الإلهي والرد السريع بمجرد ما فوض أمره وعاف حمله لله بصدق شوف الفرج شلون إجى سريع وبحرف الفاء اللي يفيد السرعة بالقرآن {فَاسْتَجَبْنَا لَهُ فَكَشَفْنَا مَا بِهِ مِن ضُرٍّ ۖ وَآتَيْنَاهُ أَهْلَهُ وَمِثْلَهُم مَّعَهُمْ رَحْمَةً مِّنْ عِندِنَا وَذِكْرَىٰ لِلْعَابِدِينَ} (الأنبياء) الله سبحانه وتعالى أصدر أمره الفوري لأيوب كاله اضرب برجلك الأرض فانفجر عين ماي بارد غسل بيه وتشافى جسمه بالكامل ورجع شاب أحسن وأجمل من قبل ورجعتله الفلوس والبساتين والزوجة جابتله أولاد وبنات وبعدد اللي ماتوا مرتين! كل هذا لأن القلب چان مليان بيقين إنو الله هو أرحم الراحمين وما يضيع عبده لو طال البلاء نكمل بالبوست القادم ان شاءالله أسألكم الدُعاء #oops_alhamdulelah #fyp

سَجى عَلي

Open In TikTok:

Region: IQ

Tuesday 25 August 2026 09:30:24 GMT