Universitetlərdə bəzi ixtisaslar üzrə plan yerlərinin boş qalması yenidən təhsil və əmək bazarının uyğunluğu məsələsini gündəmə gətirib. Ekspertlər hesab edir ki, abituriyentlərin ixtisas seçimində əsas meyarlardan biri artıq həmin sahənin gələcəkdə iş və karyera imkanlarıdır. Təhsil eksperti Əmrah Həsənli Serhedaz.az-a açıqlamasında bildirib ki, boş qalan plan yerlərini yalnız həmin ixtisaslara marağın azalması ilə izah etmək düzgün deyil. Onun sözlərinə görə, abituriyentlər seçim edərkən əmək bazarındakı real perspektivləri, məzun olduqdan sonra iş tapmaq, gəlir əldə etmək və karyera qurmaq imkanlarını nəzərə alırlar. Ekspert qeyd edib ki, əmək bazarında tələbatı və gəlir perspektivi zəif görünən ixtisaslar təbii olaraq daha az seçilir. Eyni zamanda bəzi ixtisasların məzunlarının hansı sahələrdə işləyə biləcəyi barədə abituriyentlərə kifayət qədər məlumat verilmir. Əmrah Həsənlinin fikrincə, əmək bazarı sürətlə dəyişdiyindən plan yerləri müəyyənləşdirilərkən yalnız əvvəlki illərin qəbul statistikasına deyil, növbəti 5-10 il üzrə əmək bazarı proqnozlarına da diqqət yetirilməlidir. “Boş qalan plan yerləri ali təhsil sistemimiz üçün ciddi siqnal olmalıdır. Bu il ali təhsil müəssisələrinə qəbul faizi 97 faizdən yuxarı olub. Boş qalan yerlər üzrə yenidən ixtisas seçimi də keçiriləcək və bu göstəricinin artması mümkündür. Buna görə plan yerlərinin formalaşdırılması istiqamətində yenidən iş aparılmalıdır”, – deyə ekspert vurğulayıb. Zəhra Ağayeva - @serhed.az