@mimmo3528: شوفوا أوروبا… وتعلموا منهم. 🇱🇾🇪🇺 أوروبا خاضت حربين عالميتين، ومات فيها عشرات الملايين، ومدن كاملة اتهدمت، وشعوب كانت تكره بعضها وتحارب بعضها. لكن بعد الحرب قالوا: كفاية. ما قالوش لازم ننتقموا من بعض، وما قالوش لازم واحد يقتل الثاني باش يحكم. تصالحوا، تعاونوا، وبنوا بلادهم من جديد. واليوم شوف بعينك… من لوكسمبورغ تدخل بلجيكا، ما تلقاش حدود. من بلجيكا تدخل فرنسا، ما تلقاش حواجز. ومن فرنسا تمشي لألمانيا… نفس الشيء. تمشي من دولة لدولة وكأنك تمشي من مدينة لمدينة. هذم كانوا يحاربوا بعضهم، واليوم عايشين في سلام. ونحن؟ 🇱🇾 ليبيا سكانها حوالي 7 ملايين، وكلنا تقريبًا نعرفوا بعضنا، وكلنا مسلمين، وكلنا تجمعنا أرض وحدة ولغة وحدة وتاريخ واحد. ومع هذا، قاعدين نقتلوا في بعضنا ونتقاتلوا على السلطة والمناصب والنفوذ. شنو اللي استفدناه؟ بلادنا تدمرت، شبابنا هاجر، عائلات تفرقت، ومستقبل أولادنا ضاع. واللي ماسكين السلطة؟ هو وعيلته يقدروا يعيشوا برا، ويدرسوا أولادهم برا، ويديروا فلوسهم برا، ويضمنوا مستقبلهم… أما ولد ليبيا البسيط، يا يهاجر ويبدأ من الصفر، يا يقعد في بلاده يعاني. والله حاجة توجع القلب… أنا لا نبي شرق ولا غرب، لا نبي هذا ضد هذا، ولا نبي قبيلة ضد قبيلة. نبي ليبيا وبس. 🇱🇾 نبي دولة فيها قانون. نبي أمان. نبي شغل. نبي مستشفيات ومدارس محترمة. نبي جواز سفر يحترموه العالم. نبي أولادنا يكبروا في بلادهم وما يضطروش يركبوا البحر باش يلقوا حياة كريمة. إذا أوروبا قدرت تتجاوز حرب مات فيها عشرات الملايين، شن اللي يمنع ليبيا من إنها تتجاوز خلافاتها؟ المشكلة مش في الشعب الليبي… المشكلة في اللي خلّى الشعب يصدق إن أخوه عدوه. كفاية حرب. كفاية دم. كفاية ضياع. خلونا مرة وحدة نختلفوا على حاجة وحدة: كيف نبنوا ليبيا؟ 🇱🇾❤️
