@20112025thae: လူတိုင်းရဲ့ ဘဝနဲ့ လူတိုင်းရဲ့ စိတ်သဘောကို ဘုရားရှင်က အထင်အရှား ပြခဲ့တဲ့ အမှန်တရားတွေပါလားလို့ တဖြည်းဖြည်း နားလည်လာခဲ့တယ်။ ​သစ္စာ (၄) ပါးဆိုတာ ​(၁) ဒုက္ခသစ္စာ (၂) သမုဒယသစ္စာ (၃) နိရောဓသစ္စာ (၄) မဂ္ဂသစ္စာ ​🪷 (၁) ဒုက္ခသစ္စာ ​ဒုက္ခဆိုတာ — ဆင်းရဲခြင်း။ သစ္စာဆိုတာ — အမှန်တရား။ ​ဒါကြောင့် ဒုက္ခသစ္စာဆိုတာ ဒုက္ခဟာ အမှန်တကယ် ရှိနေတဲ့ အမှန်တရားပါပဲ။ ​ဒီနေရာမှာ လူအများစု နားလည်မှုလွဲတတ်တာ တစ်ခုရှိတယ်။ ​ဒုက္ခဆိုတာ ငိုနေရမှ၊ ဆင်းရဲနေရမှ၊ အခက်အခဲကြီး ကြုံနေရမှလို့ ထင်တတ်ကြတယ်။ ​တကယ်တော့ — ​လိုချင်တာ မရရင်လည်း ဒုက္ခပဲ။ ​ရထားတာ ပျောက်သွားမှာ ကြောက်နေရရင်လည်း ဒုက္ခပဲ။ ​ချစ်တဲ့သူနဲ့ ခွဲရရင်လည်း ဒုက္ခပဲ။ ​မလိုချင်တဲ့အရာတွေနဲ့ ကြုံရရင်လည်း ဒုက္ခပဲ။ ​လိုချင်တဲ့အရာတွေ ရနေပေမယ့် အမြဲတမ်း မတည်မြဲနိုင်ဘူးဆိုတဲ့ သဘောကို မသိနားမလည်နိုင်ရင်လည်း ဒုက္ခဖြစ်ရတတ်တယ်။ ​ဘဝမှာ အရာရာ အဆင်ပြေနေတဲ့သူတစ်ယောက်တောင် ရင်ထဲမှာ မပြည့်စုံသလို၊ မလုံခြုံသလို ခံစားနေရတာမျိုး ရှိတတ်တယ်။ ​ဒါတွေဟာ ဘဝမှာ မလွဲမသွေ ကြုံတွေ့ရတဲ့ အမှန်တရားတွေပါ။ ​အဲဒါကိုပဲ ဘုရားရှင်က ဒုက္ခသစ္စာလို့ ဟောခဲ့တာပါ။ ​🪷 (၂) သမုဒယသစ္စာ ​ဒါပေမယ့် ဘုရားရှင်က ဒုက္ခရှိတယ်လို့ပဲ မပြောခဲ့ဘူး။ ဒုက္ခဖြစ်ရတဲ့ အကြောင်းရင်းကိုပါ ပြခဲ့တယ်။ ​အဲဒါက... သမုဒယသစ္စာပါ။ ​သမုဒယဆိုတာ ဒုက္ခဖြစ်စေတဲ့ အကြောင်းရင်းပါ။ ​ဘုရားရှင်က ဒုက္ခရဲ့ အရင်းခံအကြောင်းကို တဏှာလို့ ဟောခဲ့တယ်။ ​တဏှာဆိုတာ — ​ရချင်တဲ့စိတ် ​ဖြစ်ချင်တဲ့စိတ် ​မဖြစ်ချင်တဲ့စိတ် ​တပ်မက်တွယ်တာတဲ့ စိတ်သဘောတွေပါ။ ​တချို့အချိန်တွေမှာ ကိုယ်စိတ်ဆင်းရဲရတာ သူများကြောင့်လို့ ထင်တယ်။ အခြေအနေတွေကြောင့်လို့ ထင်တယ်။ ​ဒါပေမဲ့... တကယ်ပြန်ကြည့်လိုက်ရင် ဒုက္ခကို ဖြစ်စေတာဟာ အပြင်ဘက်ကလာတဲ့ အကြောင်းတရားတွေကြောင့်ပဲ မဟုတ်ပါဘူး။ ​အဲဒီအပေါ်မှာ ကိုယ့်စိတ်က ဘယ်လောက် စွဲလမ်းနေသလဲ၊ ဘယ်လောက် လိုချင်နေသလဲ ဆိုတာကလည်း အရေးကြီးပါတယ်။ ​ဥပမာ... ​ကိုယ်က "ဒီလိုပဲ ဖြစ်ရမယ်" ဆိုပြီး စွဲထားတယ်။ မဖြစ်လာတဲ့အခါ စိတ်ဆင်းရဲတယ်။ ​လူတစ်ယောက်က "ငါ့ကို ဒီလိုပဲ ဆက်ဆံရမယ်" လို့ မျှော်လင့်ထားတယ်။ သူ မလုပ်ပေးတဲ့အခါ စိတ်ထိခိုက်တယ်။ ​ပြန်ကြည့်လိုက်ရင် ဒုက္ခကို ဖြစ်စေတာ အဖြစ်အပျက်တစ်ခုတည်း မဟုတ်ဘဲ၊ အဲဒီအပေါ်မှာ ကိုယ့်စိတ်က စွဲလမ်းထားတဲ့ သဘောလည်း ပါဝင်နေတာကို တွေ့ရတယ်။ ​🪷 (၃) နိရောဓသစ္စာ ​ဒါပေမဲ့... ဒီဒုက္ခတွေဟာ အမြဲတမ်း ရှိနေမယ့်အရာတွေတော့ မဟုတ်ပါဘူး။ ​ချုပ်ငြိမ်းနိုင်တယ်လို့ ဘုရားရှင်က ဟောခဲ့တယ်။ အဲဒါကို နိရောဓသစ္စာလို့ ခေါ်ပါတယ်။ ​နိရောဓဆိုတာ ချုပ်ငြိမ်းခြင်းပါ။ တဏှာ အကြွင်းမဲ့ ချုပ်ငြိမ်းသွားတဲ့အခါ ဒုက္ခလည်း အကြွင်းမဲ့ ချုပ်ငြိမ်းသွားတယ်။ ​ကျမ အရင်က... ​ဘဝအဆင်ပြေမှ စိတ်ချမ်းသာမယ်လို့ ထင်ခဲ့တယ်။ ​လူတွေ ပြောင်းလဲပေးမှ စိတ်အေးမယ်လို့ ထင်ခဲ့တယ်။ ​နောက်ပိုင်းမှ... တဖြည်းဖြည်း နားလည်လာတယ်။ စိတ်အေးချမ်းမှုဆိုတာ အပြင်ကအရာတွေ ပြောင်းလဲသွားလို့ မဟုတ်ဘူး။ ​ကိုယ့်စိတ်ထဲက စွဲလမ်းမှုတွေ လျှော့လာတဲ့အခါ၊ လက်ခံနိုင်စွမ်းတွေ များလာတဲ့အခါ စိတ်ကလည်း တဖြည်းဖြည်း ပိုအေးချမ်းလာတယ်။ ​ဒါဟာ နိရောဓရဲ့ အရသာကို ဘဝထဲမှာ အနည်းငယ် နားလည်လာရသလို ကျမ ခံစားမိပါတယ်။ ​🪷 (၄) မဂ္ဂသစ္စာ ​ဒုက္ခချုပ်ငြိမ်းဖို့ လျှောက်ရမယ့် လမ်းရှိတယ်။ ​အဲဒါက မဂ္ဂသစ္စာပါ။ မဂ္ဂဆိုတာ — လမ်းကြောင်းပါ။ ​ဒုက္ခချုပ်ငြိမ်းရာကို ရောက်စေတဲ့ လမ်းကြောင်းကို မဂ္ဂသစ္စာလို့ ခေါ်ပါတယ်။ ​အဲဒီလမ်းကို ဘုရားရှင်က အရိယမဂ္ဂင် (၈) ပါးလို့ ဟောခဲ့ပါတယ်။ ​တကယ်တော့ ဘုရားရှင်က ဒုက္ခရှိတယ်လို့ပဲ မပြောခဲ့ပါဘူး။ ဒုက္ခဖြစ်ရတဲ့ အကြောင်းကို ပြခဲ့တယ်။ အဲဒီအကြောင်းကို ပယ်ရှားနိုင်တယ်လို့လည်း ပြခဲ့တယ်။ ​တကယ်တော့... ဘုရားရှင်က ဒုက္ခရှိတယ်လို့ပဲ မပြောခဲ့ပါဘူး။ ဒုက္ခဖြစ်ရတဲ့ အကြောင်းကို ပြခဲ့တယ်။ အဲဒီအကြောင်းကို ပယ်ရှားနိုင်တယ်လို့လည်း ပြခဲ့တယ်။ ​ပြီးတော့... ဒုက္ခချုပ်ငြိမ်းရာကို ရောက်ဖို့ လျှောက်ရမယ့် လမ်းကိုပါ ပြခဲ့တယ်။ ​ဒါကြောင့် သစ္စာလေးပါးကို အနှစ်ချုပ်လိုက်ရင် ​ဒုက္ခရှိတယ်။ ​ဒုက္ခဖြစ်ရတဲ့ အကြောင်းရှိတယ်။ ​ဒုက္ခချုပ်ငြိမ်းနိုင်သည်။ ​ချုပ်ငြိမ်းဖို့ လျှောက်ရမယ့် လမ်းရှိတယ်။ ​ဒီလေးချက်ပါပဲ။ ​ကျွန်မ နားလည်လာတာကတော့ သစ္စာလေးပါးဆိုတာ ဘာသာရေးအကြောင်းကို သိထားရုံအတွက် မဟုတ်ပါဘူး။ ​ကိုယ့်စိတ်ကို ပြန်ကြည့်ဖို့၊ ကိုယ့်ဘဝကို နားလည်ဖို့ ဘုရားရှင် ပေးထားတဲ့ မှန်တစ်ချပ်လိုပါပဲ။ ​ဒုက္ခဖြစ်တိုင်း "ဒီဒုက္ခရဲ့ အကြောင်းက ဘာလဲ" "ဒီစိတ်က ဘာကို စွဲလမ်းနေတာလဲ" "ဒီစိတ်ကို ဘယ်လို လျှော့ချနိုင်မလဲ" ဆိုပြီး... ကိုယ့်စိတ်ကို ပြန်ကြည့်တတ်လာတဲ့အခါ ​ဘဝက ချက်ချင်း ပြောင်းလဲသွားတာမျိုးတော့ မဟုတ်ပေမယ့် ​ဒုက္ခကို ကြည့်တဲ့ အမြင်က တဖြည်းဖြည်း ပြောင်းလဲလာတယ်။ အဲဒီအမြင် ပြောင်းလဲလာတာနဲ့အမျှ ​စိတ်ကလည်း တဖြည်းဖြည်း ပိုပေါ့လာတယ်၊ ပိုငြိမ်းချမ်းလာတယ်၊ ပိုလက်ခံနိုင်လာတယ်။ ​ဒါကတော့ ကျွန်မ သစ္စာလေးပါးကို နားလည်မိသလောက်၊ ဘဝထဲမှာ ကြုံတွေ့ခံစားရသလောက် စာအဖြစ် ချရေးလိုက်တာပါ။ #သင်တို့၏အိပ်ယာထခြင်းသည်ကမ္ဘာမြေအားထိပ်လန့်ခြင်းမဖြစ်ပါစေသတည်း။ #ဓမ္မဒါနမျှဝေ

🫧🪷lotus🪷🫧

Open In TikTok:

Region: US

Tuesday 25 August 2026 17:06:16 GMT