@megdadahmed22: مرات الزعل ما بكون من موقف كبير، ولا من كلمة كسرت الخاطر قدّام الناس… مرات الزعل الحقيقي بجي من حاجات صغيرة، حاجات نحنا كنا فاكرنها ما بتتغير. حتى العيش والملح البينّا وبين الناس، بقينا ما قادرين نضمنو. في ناس أكلنا معاهم من صحن واحد، وقسمنا اللقمة بالنص، وضحكنا في نفس القعدة، وحكينا ليهم حاجات ما حكيناها لزول تاني. كنا فاكرين إنو العِشرة دي بتعمل أمان، وإنو العيش والملح البينّا ما بخلي زول يهون على التاني. لكن الزمن بوريك إنو الناس ما كلها بتشبه بعضها. في زول ممكن ياكل معاك العيش والملح، وبعدها بأيام يتعامل معاك كأنك ما كنت يوم من الأيام جزء من حياتو. والوجع ما في إنو الزول مشى… الوجع في إنك بتقعد تسأل نفسك: "يا ربي أنا قصّرت؟ أنا عملت شنو؟ ولا العِشرة عندو كانت سهلة للدرجة دي؟" لكن خلاص… الواحد بتعلم. بتتعلم إنو العيش والملح ما بس أكل، العيش والملح موقف، عشرة، ستر، حفظ للجميل، ووقفة وقت الشدة. وعشان كدا، لو لقيت زول حافظ ليك العِشرة، ماسك فيك وقت الضيق قبل الفرح، وما بنسى الأيام الكنتو فيها سوا… أمسك فيهو كويس. لأنو في الزمن دا، حتى العيش والملح بقو محتاجين زول يعرف قيمتهم. مقــ⁷ــداد #خواطر_مقداد #خواطر #الشعب_السوداني_العظيم🇸🇩❤️ #الشعب_السوداني_ماله_حل🤣🤣 #جخو،الشغل،دا،يا،عالم،➕_❤_📝

المقداد // Megdad

Open In TikTok:

Region: SD

Tuesday 25 August 2026 18:27:20 GMT