Waxaan ku nool nahay xilli ay adag tahay in la kala saaro geesiga iyo kan iska dhigaya geesi. Wajiyada waa badan yihiin, balse qalbiyada runta ahi way yar yihiin. Dadku way kuu dhoola-caddeeyaan, laakiin mararka qaar dhoolla-caddayntaas gadaasheeda waxaa ku qarsoon dano aan adiga waxba kuu ahayn. Qof walba wuxuu la nool yahay dhaawac uusan dadka tusin. Xanuunku ma laha midab lagu garto, mana laha cod dadka oo dhan maqlaan. Sidaas oo kale, bogsashaduna ma aha wax qof walba indhihiisa ka muuqda. Dad badan waxay ku socdaan nolosha iyagoo qalbiyadoodu daalan yihiin, haddana wejigooda waxaa ka muuqda dhoolla-caddayn ay ku qarinayaan jabkii ay soo mareen. Waxa ugu murugada badan ma aha cadawga muuqda, balse waa saaxiibka isu ekaysiiya walaalka. Waa kuwa kula jooga inta ay dantoodu ka dhammaanayso, dabadeedna kaa taga marka aad u baahato garab. Waxay ku siiyaan ballanqaadyo qurux badan, laakiin marka waqtigu yimaado, waxaad ogaataa in erayadoodu ahaayeen hawo aan sal lahayn. Noloshu waxay i bartay inaanan qof walba rumaysan. Waxay i bartay in wejiyada qaar ay xiran yihiin maaskaro, runtooduna qarsoon tahay. Waxa keliya ee aan ka bartay waa in ficilku ka weyn yahay hadal kasta, daacadnimaduna ay ka qiimo badan tahay kun ballanqaad. Mararka qaarkood waxaan fadhiistaa xeebta badda anigoo koob qaxwo ah gacanta ku haya. Waxaan eegaa hirarka soo noqnoqda, waxaanan xusuustaa riyooyinkii aan lahaa—riyadii qaar hirarku ay la tageen, qaarna waqtigu iga qaatay. Halkaas ayaan ku gartay in qofku mararka qaar ku khasbanaado inuu wejigiisa ku dhaqo biyihii ay riyooyinkiisu ku hafteen, si uu u barto inuu mar kale nolosha wajaho. Waxaan weli aamminsanahay in wanaaggu jiro, inkastoo khiyaanadu badan tahay. Waxaan rumaysanahay in daacadnimadu weli leedahay qiime, inkastoo beentu mararka qaar u muuqato inay guulaysato. Qofka runta ku taagan wuxuu lumin karaa dad badan, laakiin waligiis lumin maayo naftiisa. Ugu dambayn, noloshu waxay ina bartaa casharro aan buugaag lagu qorin. Waxay ina tusaysaa cidda dhab ahaan kuu taagan iyo cidda magac uun kula joogta. Marka boodhku dego, waxaa haraya oo keliya kuwa qalbigoodu run yahay. Inta kale waa xusuus ay dabayshu la tagto. Mararka qaar, aamuskaygu ma aha inaan waxba hayo; waa calaamad muujinaysa inaan wax badan bartay. - @hooyokoris40