መስከረም የብርሃንና የተስፋ መባቻ ነው። ረጅም ወራትን የሸፈነው የክረምት ደመና፣ የዝናብ አውሎ ነፋስና የጭቃ መንገድ አልፎ ሰማዩ ጥራት ብሎ ሲታይ፣ የምድር ገጽ በቢጫ አደይ አበባ አምራ ስትደመቅ የአዲስ ዘመን ማዕበል ልብን በደስታ ይሞላል። አበቦች በነፃነት የሚያብቡበት፣ ወፎች በሚያምር ዜማቸው የሚዘምሩበት፣ እና የተፈጥሮ ህይወት እንደ አዲስ የሚታደስበት ይህ ወቅት የሰው ልጅንም መንፈስ ያድሳል። አሮጌውን ዓመት ከነክፉና ደስ የማይል ገጠመኞቹ አሸኝተን፣ ለአዲሱ ዓመት አዳዲስ ሕልሞችን፣ እቅዶችንና ተስፋዎችን የምንሰንቅበት ልዩ የምህረትና የፍቅር ወቅት ነው። መስከረም ሲጠባ ከተፈጥሮ ውበት ባሻገር የፍቅርና የእንደገና መገናኘት ማበሰሪያ ነው። በሩቅ ያሉ ወዳጅ ዘመዶች የሚሰበሰቡበት፣ የተጣሉ የሚታረቁበት፣ አረጋውያን ወላጆች በልጆቻቸው ተከበበው የሚባርኩበትና ቤቶች በእንቁጣጣሽ ደስታ የሚደምቁበት ጊዜ ነው። ሳሩ፣ አደዩ፣ የቄጠማው ጠረንና የብሩህ ሰማዩ ሁኔታ ለሰው ልጅ አዲስ የህይወት ምዕራፍ ለመጀመር ብርታት ይሰጣል። በመሆኑም መስከረም ሲጠባ ተፈጥሮ ብቻ ሳትሆን የሰው ልጅ ልብም በአዲስ ተስፋ፣ ፍቅርና አንድነት ያበራል። - @musiqa8484