@rahaf.rihawi: مين قال إنك إذا عاملة دايت لازم تحرمي حالك من الأكلات اللي بتحبيها؟ السر بالكميات وطريقة التحضير 👌 المقادير لـ 4 حصص: 🥩 1 كيلو لحم بقري شقف صافي — الوزن قبل السلق 🍚 200 غ رز بسمتي — الوزن قبل الطبخ 🧅 بصلتين متوسطات 🥕 جزرتين متوسطات 🧄 4 فصوص ثوم 🫒 15 غ زيت زيتون — ملعقة كبيرة 🍇 25 غ زبيب 🥜 25 غ مكسرات محمصة بدون زيت البهارات: ملح، فلفل أسود، سبع بهارات، كمون، كزبرة ناشفة، قرفة وهال مطحون. الطريقة: سلقت اللحمة أول شي، وبعد ما استوت شلت كل الدهن الظاهر منها. قليت البصل بملعقة زيت زيتون، وبعدها أضفت الثوم والجزر، ثم أضفت اللحمة المسلوقة والبهارات وقلّبتهم مع بعض حتى تتشرب اللحمة النكهات. أضفت الرز المغسول وسقيته من مرقة سلق اللحمة، وتركته على نار هادية حتى استوى. وبالأخير أضفت الزبيب والمكسرات المحمصة 😍 الحسابات التقريبية للطبخة كاملة: 🔥 حوالي 2500 كالوري 💪 حوالي 235–240 غ بروتين قسمتها على 4 حصص، يعني الحصة الواحدة تقريبًا: 🔥 620–630 كالوري 💪 58–60 غ بروتين وبالحساب الأساسي كل حصة فيها تقريبًا: 🥩 250 غ لحم — الوزن قبل السلق 🍚 50 غ رز — الوزن قبل الطبخ واليوم أنا زودت المكسرات والزبيب شوي لأنه كان يوم عطلة ودلعنا حالنا 😄❤️، لذلك الحصة اللي أكلناها اليوم سعراتها أعلى شوي من الحساب الأساسي المكتوب. قدمت الطبخة كلها بجاط كبير على السفرة، ونحنا أربع أشخاص وكل واحد أخذ حصته بصحنه. وهيك كلنا أكلنا نفس الأكلة الصحية والطيبة سوا ❤️ الأكل الصحي مو لازم يكون أكل خاص إلك لحالك… فيكي تعملي طبخة وحدة صحية ومحسوبة وتاكل منها العيلة كلها. القيم الغذائية تقريبية وبتختلف حسب نوع اللحم ونسبة الدهون والكميات الفعلية المستخدمة #يومياتي #تصويري #طبخاتي
