നബിദിനത്തോടനുബന്ധിച്ച് പള്ളിയിൽ ഉണ്ടായ തല്ലും പിടി വിശ്വാസികളെ സംബന്ധിച്ച് ഏറെ വേദനയുണ്ടാക്കുന്ന ഒന്നാണ് . ഞാനൊരു മദ്രസ അധ്യാപകന്റെ മകളാണ് . അതുകൊണ്ടുതന്നെ എനിക്ക് ഇവിടെ കുറച്ചു കാര്യങ്ങൾ പറയാനുണ്ട് . ഇസ്ലാം മതം ഏകദൈവ വിശ്വാസമാണ് മുന്നോട്ട് വയ്ക്കുന്നത് . വിട്ടുവീഴ്ച ചെയ്യുന്നവന്റെ കൂടെയാണ് പടച്ച റബ്ബ് ഉണ്ടാവുക എന്ന് മതം പറയുന്നു . ക്ഷമ ഈമാന്റെ പകുതിയാണെന്ന് റസൂൽ നമ്മളെ പഠിപ്പിച്ചിട്ടുണ്ട് . അയൽക്കാരൻ പട്ടിണി കിടക്കുമ്പോൾ മതം നോക്കാതെ സഹായിക്കണമെന്ന , മനോഹരമായ ആദർശം മുന്നോട്ടുവച്ച മതത്തെ നാണം കെടുത്തുന്നത് കുറേ സംഘടനകൾ ചേർന്നാണ് . ഒരു പണ്ഡിതനെ സംബന്ധിച്ച് , മദ്രസ അധ്യാപകനെ സംബന്ധിച്ച് അയാൾ ചെയ്യുന്നത് കേവലം ഒരു സേവനം മാത്രമല്ല അദ്ദേഹത്തിൻ്റെ കുടുംബത്തിന്റെ ഉപജീവനമാർഗം കൂടിയാണ് . സ്വന്തം കുടുംബത്തിൻറെ ആവശ്യങ്ങൾ നിറവേറ്റാൻ വേണ്ടി ജോലിക്ക് ഇറങ്ങിത്തിരിക്കുന്ന ഈ ഉസ്താദുമാരെ കാത്തു നിൽക്കുന്നത് മഹല്ല് കമ്മിറ്റിക്ക് ഉള്ളിലുള്ള പല വിഭാഗക്കാരാണ് . എൻറെ ഉപ്പ ജോലി ചെയ്തിരുന്ന മദ്രസയിലും ഇതുപോലെയുള്ള പ്രശ്നങ്ങൾ ഉണ്ടായിട്ടുണ്ട് . ഒരു വിഭാഗം ഉപ്പയ്ക്ക് ഒപ്പം നിലനിന്നു മറ്റൊരു വിഭാഗം ഉപ്പ അവിടെനിന്ന് പോയേ പറ്റൂ എന്ന് വാശിപിടിച്ചു . എൻറെ ഉപ്പാനെ പോലെ നിലപാടുകളിൽ ഉറച്ചു നിൽക്കുന്ന ഒരാൾക്ക് സംഘടനകൾ തമ്മിൽ യുദ്ധം ചെയ്യുമ്പോൾ അവിടെ പിടിച്ചുനിൽക്കാൻ കഴിയില്ല . സ്വമേധയാ ഉപ്പ രാജി എഴുതിക്കൊടുത്തു ഇറങ്ങിപ്പോന്നു . അന്ന് എൻറെ അനിയൻ ജോലിയിൽ പ്രവേശിച്ചിട്ടില്ല . കടുത്ത സാമ്പത്തിക പ്രതിസന്ധി വീട്ടിൽ ഉണ്ടായി . സ്ത്രീധനം കിട്ടിയ സ്വർണം വിറ്റ് കുടുംബ സ്വത്തായി കിട്ടിയ സ്ഥലത്ത് വീട് വച്ച ആളല്ല എൻറെ ഉപ്പ . മതം പറഞ്ഞ പ്രകാരം ഒരു രൂപ പോലും സ്ത്രീധനം വാങ്ങാതെയാണ് ഉപ്പ ഉമ്മാനെ നിക്കാഹ് ചെയ്തത് . അദ്ദേഹം കുഞ്ഞായിരിക്കുമ്പോൾ അദ്ദേഹത്തിൻറെ പിതാവ് മരണപ്പെട്ടു . യത്തീം ആയിട്ടാണ് അദ്ദേഹം വളർന്നത് . ഔദാര്യം കൈപ്പറ്റി ജീവിക്കുന്നവർക്ക് അടിമത്വത്തിന്റെ വേദന അനുഭവിക്കേണ്ടി വരും എന്ന് അദ്ദേഹം കുഞ്ഞുനാളിൽ തന്നെ മനസ്സിലാക്കിയിട്ടുണ്ട് . അതുകൊണ്ടായിരിക്കാം മറ്റുള്ളവരുടെ മുന്നിലേക്ക് കൈ നീട്ടാൻ മക്കളെ പറഞ്ഞയക്കാതിരുന്നത് . അധ്വാനിച്ചാണ് വീടുണ്ടാക്കിയതും പെൺമക്കളെ കെട്ടിച്ചു വിട്ടതും മക്കളെ പഠിപ്പിച്ചതും എല്ലാം . ആരോടും ഒരു ഔദാര്യവും ഈ കാലം വരെയും കൈപ്പറ്റിയിട്ടില്ല . എൻറെയും അനിയത്തിയുടെയും കല്യാണത്തിന് സാമ്പത്തികമായി സമ്മാനങ്ങൾ തന്നവർക്ക് അതിൻറെ ഇരട്ടി തിരിച്ചു കൊടുത്തിട്ടുമുണ്ട് . ഞങ്ങളുടെ നാട്ടിൽ അതിന് ലെക്കോട്ട് ഇടപാട് എന്ന് പറയും . അങ്ങനെയൊരു കുടുംബത്തിൻറെ ഗൃഹനാഥൻ പുതിയൊരു ജോലി ശരിയാകുന്നതുവരെ വീട്ടിൽ ഇരുന്നാൽ ഉള്ള അവസ്ഥ എന്താണെന്ന് ചിന്തിച്ചു നോക്കൂ . ചില പള്ളി കമ്മിറ്റിക്കാർക്ക് ഒരു ധാരണയുണ്ട് . അവരുടെ വീട്ടിലെ തേങ്ങ വിറ്റ പണം കൊണ്ടാണ് ഉസ്താദുമാർക്ക് ശമ്പളം കൊടുക്കുന്നതെന്ന് അവർ തെറ്റിദ്ധരിച്ചിട്ടുണ്ട് . ആരുടെയും ഔദാര്യമല്ല ഈ പണ്ഡിതന്മാർ കൈപ്പറ്റുന്നത് . ജോലി ചെയ്ത പൈസയാണ് അവർക്ക് കിട്ടുന്നത് . പക്ഷേ അത് നൽകുന്നതോ ഈ കമ്മിറ്റിക്കാരുടെ വീട്ടിൽ നിന്ന് എടുത്തിട്ടുമല്ല . ഓരോ വീട്ടിൽ നിന്നും കൃത്യമായി അതിന് മാന്യമായ രീതിയിൽ പിരിവും നടത്തുന്നുണ്ട് . മദ്രസ കുട്ടികളുടെ ഫീസ് അടക്കം അതിൽ ഉൾപ്പെടുന്നു . പിന്നെ ഈ കമ്മറ്റിക്കാർ എന്താണ് ധരിച്ചു വെച്ചിരിക്കുന്നത് . അറിയില്ല . സ്വർഗ്ഗത്തിന്റെയും നരകത്തിന്റെയും താക്കോൽ അവരുടെ കയ്യിലാണെന്ന് അവർ സ്വയം വിചാരിക്കുന്നു . ഇനി ഈ കമ്മിറ്റിക്കാരുടെ മറ്റൊരു പ്രശ്നം പറയാം . പാവപ്പെട്ട വീട്ടിലെ കുട്ടികൾ തലയിൽ തട്ടമിടാതെ അങ്ങാടിയിലൂടെ നടന്നാൽ ആ മഹലിൽ വച്ച് ആ കുട്ടികളുടെ വിവാഹബന്ധം നടക്കാൻ കുറച്ചു കഷ്ടപ്പെടേണ്ടി വരും . എന്നാലോ , പള്ളിയെ സാമ്പത്തികമായി സഹായിക്കുന്ന ഒരു കോടീശ്വരന്റെ മകൾക്ക് / മകന് ദീനിനെ ധിക്കരിച്ച് എന്ത് പേക്കൂത്തും നടത്താം . അത് ചോദ്യം ചെയ്യാൻ ഇവന്മാർക്ക് ധൈര്യം ഇല്ല . പൊതുവേ കണ്ടുവരുന്ന ഒരു കാര്യമാണ് ഇവിടെ അവതരിപ്പിക്കുന്നത് . ഇസ്ലാം ഏക ദൈവമതമാണ് . പക്ഷേ ഇതിനകത്ത് ജനങ്ങൾ ഉണ്ടാക്കി തീർത്ത നല്ലൊരു ശതമാനം ജാതീയതയുണ്ട് . എ പി , ഇ കെ , സുന്നി മുജാഹിദ് , ജമാഅത്ത് , ഒസാന്മാർ തങ്ങൾമാർ അങ്ങനെ നീളുന്നു അത് . തമാശ എന്തെന്നാൽ ഈ ആശയങ്ങളൊന്നും മതം മുന്നോട്ടു വച്ചിട്ടില്ല എന്നാണ് . ദീന് പഠിപ്പിക്കുന്നതും ദീനിൽ നിന്ന് പഠിച്ചതും അല്ല സംഘടനക്കാർ മുന്നോട്ടുവയ്ക്കുന്ന ആശയങ്ങൾ . അവർക്ക് അവരുടെ സംഘടനകളുടെ കെട്ടുറപ്പ് മാത്രമാണ് വലുത് . ആ സംഘടനകളുടെ നേതാക്കന്മാരെ ഇവർ ആരാധിക്കുന്നില്ലേ എന്ന് പോലും സംശയം തോന്നും വിധത്തിലാണ് കാര്യങ്ങൾ മുന്നോട്ടുപോകുന്നത് . മദ്രസ അധ്യാപകന്മാരെ യാതൊരു കാരണങ്ങളും കൂടാതെ , എന്നാലോ ആർക്കും ബോധ്യപ്പെടാത്ത കാരണങ്ങൾ നികത്തി കൊണ്ട് പെട്ടെന്ന് പുറത്താക്കുന്ന രീതി ഈ സംഘടനകളുടെ പോരായ്മയാണ് . - @kuningarathabdulla1