ပြည်ပရောက် မြန်မာများက KBZ-Pay၊ Wave Money ၊ AYA Pay၊ CB Pay၊ Mobile Banking အသုံးပြု၍ ငွေလွှဲ၊ ငွေယူမှုများကို ဩဂုတ် ၂၈ ရက်နေ့ နောက်ဆုံးထား ပိတ်ပင်ရန် စစ်တပ်ဗဟိုဘဏ် ညွှန်ကြား ရန်ကုန်၊ ဩဂုတ် ၂၇ ပြည်ပနိုင်ငံများတွင် ရောက်ရှိနေသည့် မြန်မာနိုင်ငံသားများအနေဖြင့် K-Pay၊ Wave၊ AYA Pay၊ CB Pay၊ Mobile Banking အပါအဝင် ပြည်တွင်းပုဂ္ဂလိကဘဏ်များ၏ ဒစ်ဂျစ်တယ်ငွေပေးချေမှုစနစ်များကို အသုံးပြု၍ ငွေလွှဲခြင်း၊ ငွေလက်ခံခြင်းနှင့် ငွေကြေးဝန်ဆောင်မှုများ ရယူနေမှုများကို ဩဂုတ်လ ၂၈ ရက်နေ့ နောက်ဆုံးထား ကန့်သတ်ပိတ်ပင်ရန် စစ်ကောင်စီလက်အောက်ခံ ဗဟိုဘဏ်က ပြည်တွင်းပုဂ္ဂလိကဘဏ်များထံ အရေးပေါ်ညွှန်ကြားထားကြောင်း သိရသည်။ စစ်ကောင်စီလက်အောက်ခံ ဗဟိုဘဏ်၏ ညွှန်ကြားချက်တွင် ပြည်တွင်း၌ အသုံးပြုလျက်ရှိသော ဒစ်ဂျစ်တယ်ငွေပေးချေမှုစနစ်များကို ပြည်ပနိုင်ငံများမှ ဝင်ရောက်အသုံးပြု၍ မရရှိနိုင်စေရေးအတွက် Geo-blocking၊ Location-based Restriction နှင့် IP-based Restriction များအပါအဝင် နည်းပညာနှင့် လုံခြုံရေးဆိုင်ရာ အစီအမံများကို စနစ်တကျ အကောင်အထည်ဖော်ရန် ပြည်တွင်းပုဂ္ဂလိကဘဏ်များအားလုံးကို ညွှန်ကြားထားခြင်းဖြစ်သည်။ ပုဂ္ဂလိကဘဏ်များအနေဖြင့် ပြည်ပမှ အသုံးပြုဆောင်ရွက်မှုများကို ကန့်သတ်ပိတ်ပင်ပြီးစီးသည့် အခြေအနေကို ဩဂုတ်လ ၂၈ ရက်နေ့ထက် နောက်မကျဘဲ ဗဟိုဘဏ်ထံ ပြန်လည်တင်ပြရန်လည်း ညွှန်ကြားထားကြောင်း သိရသည်။ ထို့အပြင် လက်ရှိတွင် ပြည်ပနိုင်ငံများမှ အသုံးပြုသူများက အဆိုပါ ဒစ်ဂျစ်တယ်ငွေပေး ချေမှုစနစ်များကို ဝင်ရောက်အသုံးပြုနေခြင်း ရှိ၊ မရှိကို စနစ်တကျ စိစစ်စောင့်ကြည့်ရန်၊ အသုံးပြုမှုပုံစံများနှင့် တွေ့ရှိချက်များကို မှတ်တမ်းတင်ရန်နှင့် တွေ့ရှိပါက အရေးယူဆောင်ရွက်ထားမှုများကိုပါ အစီရင်ခံစာဖြင့် ပူးတွဲတင်ပြရန် ဗဟိုဘဏ်က ဆက်လက်ညွှန်ကြားထားသည်။ ထို့ကြောင့် ပြည်တွင်းပုဂ္ဂလိကဘဏ်များ၊ မိုဘိုင်းငွေရေးကြေးရေးဝန်ဆောင်မှုလုပ်ငန်းများနှင့် ရောင်းချသူများကိုယ်စား ငွေကောက်ခံရှင်းလင်းပေးသည့် ဝန်ဆောင်မှုလုပ်ငန်းများအနေဖြင့် ဗဟိုဘဏ်က ချမှတ်ထားသည့် ဥပဒေ၊ စည်းမျဉ်း၊ အမိန့်နှင့် ညွှန်ကြားချက်များအတိုင်း တိကျစွာလိုက်နာဆောင်ရွက်ရန်လည်း ညွှန်ကြားထားသည်။ ယခုညွှန်ကြားချက်ကြောင့် ပြည်ပရောက်မြန်မာများအနေဖြင့် မိသားစုများထံ ငွေလွှဲပေးခြင်း၊ ပြည်တွင်းရှိ ကိုယ်ပိုင်ဘဏ်အကောင့်များကို ပြည်ပမှ Mobile Banking ဖြင့် စီမံခန့်ခွဲခြင်း၊ Payment Account များမှတစ်ဆင့် ငွေပေးချေခြင်းများတွင် အခက်အခဲများ ဖြစ်ပေါ်လာနိုင်ကြောင်း ပြည်ပရောက်မြန်မာများအကြား စိုးရိမ်မှုများ မြင့်တက်နေသည်။ အထူးသဖြင့် ပြည်ပတွင် အလုပ်လုပ်ကိုင်နေသည့် မြန်မာများ၊ သင်္ဘောသားများနှင့် နိုင်ငံခြားရောက်နေသူများအနေဖြင့် ပြည်တွင်းရှိ မိသားစုဝင်များထံ ငွေကြေးပို့ဆောင်ရာတွင် ပြည်တွင်း Payment System များကို အသုံးပြုနေကြသဖြင့် ယင်းဝန်ဆောင်မှုများကို ပြည်ပမှ အသုံးပြု၍မရတော့ပါက ငွေလွှဲပို့မှုများအပေါ် တိုက်ရိုက်သက်ရောက်နိုင်သည်။ ယခင်ကလည်း ပြည်ပရောက်မြန်မာများသည် နိုင်ငံခြားမှ AYA Pay၊ KBZ Pay၊ CB Pay၊ Wave Money နှင့် Mobile Banking စနစ်များကို အသုံးပြု၍ ပြည်တွင်းမိသားစုများထံ ငွေလွှဲပို့ခြင်းများ ပြုလုပ်ခဲ့ကြသည်။ ပြည်ပရောက်မြန်မာအသိုင်းအဝိုင်းများအကြားတွင်လည်း “ဒီနေ့ကစပြီး ပြည်ပကနေ Banking သုံးခွင့် လုံးဝပိတ်လိုက်ပြီ” ဆိုသည့် သတင်းစကားများကို မျှဝေနေကြပြီး လက် ရှိညွှန်ကြားချက်အရ တစ်ကြိမ်တည်း အပြီးပိတ်ပင်ခြင်းထက် ပြည်ပမှ အသုံးပြု၍မရစေရန် နည်းပညာပိုင်းဆိုင်ရာ အဆင့်ဆင့် ကန့်သတ်လာနိုင်သည့် အခြေအနေဖြစ်သည်ဟု သုံးသပ်မှုများရှိနေသည်။ ပထမအဆင့်အနေဖြင့် IP Address အခြေပြု ကန့်သတ်မှု ပြုလုပ်နိုင်ပြီး မြန်မာနိုင်ငံပြင်ပ IP Address များဖြင့် ဝင်ရောက်အသုံးပြုပါက “Network Error”၊ “Connection Failed” စသည့် အမှားပြစာများ ပြသခြင်းမျိုး ဖြစ်လာနိုင်ကြောင်း နည်းပညာကျွမ်းကျင်သူများကပြောဆိုသည်။ ထို့နောက် VPN ဖြင့် မြန်မာနိုင်ငံ၏ IP Address အဖြစ် ပြောင်းလဲအသုံးပြုရန် ကြိုးစားပါက လူသုံးများသည့် VPN ဝန်ဆောင်မှုများနှင့် IP Address များကို ထပ်မံပိတ်ပင်ခြင်းမျိုးလည်း ဖြစ်လာနိုင်ကြောင်း သတိပေးသည်။ အခြားတစ်ဖက်တွင် OTP Code သည်လည်း အရေးကြီးသည့် အချက်တစ်ခုဖြစ်ပြီး ပြည်ပရောက်မြန်မာများအသုံးပြုသည့် SIM Card များထံ OTP Code မရောက်ရှိအောင် ကန့် သတ်ခြင်း သို့မဟုတ် OTP အတည်ပြုမှုကို ပြည်တွင်းဖုန်းနံပါတ်များနှင့်သာ ချိတ်ဆက်ခြင်းများ ပြုလုပ်လာပါက ပြည်ပမှ Banking Application များ ဆက်လက်အသုံးပြုရန် အခက်အခဲများ ဖြစ်လာနိုင်သည်ဟု ဆိုကြသည်။ ထို့အပြင် လက်ရှိအသုံးပြုနေသည့် ဖုန်း၊ Tablet နှင့် အခြား Device များကို Security အကြောင်းပြချက်ဖြင့် ပြန်လည်အတည်ပြုခိုင်းခြင်း၊ Device အသစ်များမှ ဝင်ရောက်အသုံးပြုမှုကို ကန့်သတ်ခြင်းများ ပြုလုပ်လာပါကလည်း ပြည်ပရောက်သူများအနေဖြင့် Banking Account များကို ဆက် လက်အသုံးပြုရန် ပိုမိုခက်ခဲလာနိုင်ကြော - @zayartbz7news