Marar bay fogaysay, kama uu quusan. Marar kale ayay tidhi dib ha ii soo wacin, markay yara fiicnaato ayuu dib ula soo hadli jiray. Inaan kuu warramo ma rabo ayay odhan jirtay, albaabka gurigooda ayuu ku sugi jiray intay ay go'aansanayso inay ku nefisto oo soo raadiso. Mar ayay tidhi: hadyad danbe oo dhankaaga ah ha ii keenin ma rabee. Laba hadyadood ayuu uga soo dhigay! Mararka qaar ayay si qallafsan ula hadli jirtay, codkiisa ma uu dallaci jirin mana maagi jirin, wuxu odhan jiray adiga maaha waa dhaawacyadaada gudeed waxan sidan kaa dhigay. Markasta waxa uu ogaa inaanay qof xun, qof qallafsan iyo qof kibir badan toona ahayn, se ay tahay qof dhibbane u ah noloshan kadeedkaa.. Ugu danbayn cabsidii hore ammaan ayuu ugu beddelay. Waxbay akhriday, waxbay wada akhriyeen. Difaacii ayay ka baxday, isna kalsooni difaaca lagaga bixi karo wuu siiyay. Xilliyada ay ooyayso, illinta ayuu ka tirtiray, illinteeda dareeraysa ayuu dhunkaday. Kalsoonidii dadka ayaa u soo laabatay, isaguna wuxu ku dedaalay inaan dhankiisa kalsooni darradu uga iman. Way bogsatay, way ifaysaa. Nolosha way jeclaatay, iyadii ayaa isa sii jeclaatay. Isna nolosha iyo iyadaba wuu jecel yahay. Hadafyo nololeed ayay dejisatay, isna wuu ku taageeray. Wax akhriska ayay joogtaysay, isna wuu ku bogaadiyay. Markasta oo buug ay sii dhammaynayso mid cusub ayuu habeenkii u keeni jiray. Laba qof oo si kasta oo u kala duwan ayay ahaayeen. Iyadu qof kale ayay ahayd. Haddana si weyn ayay u soo qaateen. Waxay si dhab ah u aragtay in jacaylka caafimaadka qabaa inuu wax dawayn karo, dib kuu noolayn karo, noloshana ku jeclaysiin karo. Inta ay gacantiisa qabsatay iyagoo is agfadhiya, ayay indhahiisa soo eegtay ayay tidhi: gacaliye waad i daawaysay adiga oo aan i xukmin, waad i noolaysay adiga oo aan i wacdin, waad i jeclaatay adiga oo aan ila yaabin, nabadna waad i siisay adiga oo aan i culaysin. Dunidu adiga oo kale ayay u baahan tahay, waan ku jeclahay, nin caafimaadqabaana, dunidan la wada buko, wuu mudan yahay in la jeclaado #creatorsearchinsights #createsightinsight - @.9.5.42