@ashinbuddha32: ##လူစော်နံတဲ့ရဟန်းဆိုတာ _____________________________ "ကဲ-ဒကာကြီး... ကျောင်းလာတာ ဘာကိစ္စရှိလို့လဲဗျ" "အရှင်ဘုရား... ကျောင်းလာတာ ကိစ္စရှိမှ လာရမှာလားဘုရား... အဲဒါတွေ ခက်တာပဲ။ ကိုယ်က ကြီးမှဝတ်တဲ့ တောထွက်ရဟန်းလုပ်နေပြီး လူ့လောကအကြောင်း နားလည်ရဲ့သားနဲ့ ဖော်ဖော်ရွေရွေကလဲမရှိ လူမှုရေးကလည်း နဲလိုက်တာ။ ဒကာ-ဒကာမတွေနဲ့ အလိုက်အထိုက်လေးတော့ ရောရောနှောနှော နေဦးမှပေါ့ဘုရား" "ဒကာကြီး... လူမှုရေးလုပ်ချင်ရင် လူဝတ်နဲ့ပဲ နေမှာပေါ့ဗျာ။ အခု အဲဒါတွေ မလုပ်ချင်တော့လို့ သင်္ကန်းဝတ်နဲ့ နေနေတာပေါ့" "ဒီလိုလည်း ဘယ်ဟုတ်သေးမှာလည်းဘုရား လူတွေနဲ့ အေးအတူ ပူအမျှ အရောတဝင်လေးနေမှ သူတို့ကလည်း အရှင်ဘုရားကို လှူချင်တန်းချင် ခေါ်ချင်ပြောချင်ကြမှာပေါ့။ ခုတော့ အရှင်ဘုရားကြည့်ရတာ ကျောင်းသား မရှိ ကိုရင် မရှိ၊ ကပ္ပိယ မရှိ၊ စကားပြောမယ့်သူ မရှိ အလုပ်ကျွေးပြုမယ့် အခြွေအရံကလည်း မရှိနဲ့ တစ်ကောင်ကြွက် ဆန်လိုက်တာဘုရား" "ဒကာကြီး... တစ်ကောင်ကြွက်ဆိုတာ ခင်ဗျားတို့ဘက်က မြင်တာပါ။ ဦးဇင်းဘက်က ကြည့်ရင် တစ်ယောက်ထဲ နားအေးပါးအေးနဲ့ တရားလေး နှလုံးသွင်းပြီး လောကစိတ်တွေ ကြိုးစားဖျောက်နေရတာမို့ ဒကာကြီးအမြင်နဲ့တော့ တူမှာ မဟုတ်ဘူးဗျ။ လူတွေနဲ့ရောတော့ လူစော်နံတာပေါ့ဗျာ" "မြတ်စွာဘုရားကလည်း ရဟန်းနဲ့လူ ဆင်းရဲအတူ ချမ်းသာမကွဲ တစ်တွဲတွဲဖြင့် သဟသောနီ,သဟနန္ဒီ အရောဝင်ခြင်းမျိုးကို လိုလားတော် မမူဘူးတဲ့။ အဲဒီလို ရဟန်းမျိုးကို ကုလူပက-အိမ်ကပ်ရဟန်း, လူစော်နံသောရဟန်းလို့ ခေါ်တယ်တဲ့" "လူစော်နံတဲ့ရဟန်း...ဟုတ်လား။ တပည့်တော်တော့ ခုမှပဲ ကြားဖူးတော့တယ်" "ဒါဆိုလဲ မှတ်ထားဗျာ လူစော်နံတဲ့ရဟန်းဆိုတာ ငါးမျိုးတောင်ရှိတယ်" "ပထမတစ်မျိုးက အိမ်သူ အိမ်သား ဒကာ ဒကာမတွေနဲ့ ဆွေမျိုးမတော် အရင်းအချာ မဟုတ်ပါဘဲလျက် အရောတဝင် ရင်းနှီးဟန် ဆက်ဆံသောရဟန်းတဲ့" "မှန်ပါဘုရား" "ဒုတိယ တစ်မျိုးက... ကိုယ်နဲ့ မသက်ဆိုင် မပိုင်စိုးဘဲ ပိုင်စိုးပိုင်နင်း စီမံ ခန့်ခွဲသော ရဟန်းတဲ့" ဒါမျိုးက တောင်ပြန် တောထွက်တွေမှာ အများဆုံး တွေ့ရတတ်တယ်။ လူ့ဘဝတုန်းက အရာရှိ အရာခံဖြစ်ခဲ့ဘူးတဲ့သူတွေ ပစ္စည်းဥစ္စာ ပြည့်ပြည့်စုံစုံနဲ့ နေခဲ့ဘူးတဲ့သူတွေ ရပ်ထဲရွာထဲမှာ ဆွေကြီးမျိုးကြီးနဲ့ နေခဲ့ဘူးတဲ့သူတွေ အဲလိုလူတွေ ရဟန်းဘောင် ရောက်လာရင် လူဘဝတုန်းက အပေါ်စီးက နေခဲ့ ပြောခဲ့တဲ့ စိတ်ကလည်း မဖျောက်နိုင်... ငါ လူကြီးပဲဆိုတဲ့ မာနကလည်း မချ... ရဟန်းကျင့်ဝတ်လည်း သိအောင် မလေ့လာ... သင်္ကန်းအရှိန်နဲ့ ထင်ရာတွေလုပ် ထင်ရာတွေပြော... ပြောရဆိုရတာ အတော်ခက်တယ်" "မှန်ပါဘုရား" "နောက်... ကျန်တဲ့ သုံးမျိုးက- ကွဲပြားသူတို့ကို စေ့စပ်ရေးလုပ်ရန် သွားသော ရဟန်း။ နား-ကပ်၍ တိုးတိုးပြောလေ့ရှိသော ရဟန်း။ အတောင်းအရမ်းထူသော ရဟန်း....ဆိုပြီး ငါးမျိုးတောင် ရှိတယ်ဗျာ" "မှန်ပါဘုရား... အရှင်ဘုရားက ခုလိုပြောပြတော့လည်း သိရတာပေါ့။ မှတ်သားထားပါ့မယ်ဘုရား။ တပည့်တော် ပြောမှားဆိုမှားအတွက် ဝန်ချတောင်းပန်ပါတယ်ဘုရား" "သာဓု သာဓု သာဓု" ဦးဓမ္မသာရ(ဆေးသဲ့တောင်) credit-

သမ္မာပညာ

Open In TikTok:

Region: MM

Friday 28 August 2026 11:49:50 GMT