پسند جي شادي ڪندڙ جوڙي جو تحفظ لاءِ اپيل، مائٽن کان جان جو خطرو هجڻ جو خدشو نوشهرو فيروز: رپورٽ ـ صدام عباسي ڪنڊيارو واسي صاحب پنڃارو ۽ ناري فضا غوري نوشهرو فيروز جي عدالت ۾ پسند جي شادي ڪرڻ بعد تحفظ لاءِ ميڊيا آڏو اپيل ڪئي آهي. ناري فضا غوري ميڊيا سان ڳالهائيندي چيو ته هوءَ پنهنجي مرضي ۽ خوشي سان گهران نڪتي آهي ۽ کيس ڪنهن به شخص ورغلايو ناهي. سندس چوڻ هو ته کيس پنهنجي مائٽن مان مبينا طور جان جو خطرو آهي، تنهن ڪري کيس ۽ سندس مڙس کي تحفظ فراهم ڪيو وڃي. فضا غوري الزام لڳائيندي چيو ته سندس ڀائر فراز غوري، سرفراز غوري ۽ فرحان غوري، جڏهن ته والد اقبال کان کيس جان جو خطرو آهي. هن دعويٰ ڪئي ته سندس مڙس کي پڻ مبينا طور ڌمڪيون ڏنيون پيون وڃن. ٻئي طرف صاحب پنڃارو جو چوڻ هو ته ٻنهي جي رضامندي سان شادي ٿي آهي ۽ هو پنهنجي گهرواري سان گڏ پرامن زندگي گذارڻ چاهي ٿو، پر کيس سندس گهرواري جي مائٽن ۽ ٻين ماڻهن پاران مبينا ڌمڪيون ملي رهيون آهن. صاحب پنڃارو مير سميجھو، ساجد سميجھو، اعجاز ڪلھوڙو ۽ لياقت ملاح جا نالا وٺندي خدشو ظاهر ڪيو ته کيس ۽ سندس گهرواري کي نقصان پهچڻ جو خطرو آهي. هن چيو ته جيڪڏهن کيس، سندس گهرواري يا خاندان جي ڪنهن فرد سان ڪو اڻوڻندڙ واقعو پيش اچي ٿو ته ان جي ذميواري مٿين ڄاڻايل ماڻهن تي هوندي. پسند جي شادي ڪندڙ جوڙي آءِ جي سنڌ، ڊي آءِ جي شهيد بينظير آباد، ايس ايس پي نوشهرو فيروز مير روحل خان کوسو ۽ ٻين اعليٰ اختيارين کي اپيل ڪئي آهي ته کين تحفظ فراهم ڪيو وڃي، جيئن هو بنا ڪنهن خوف ۽ خطري جي پنهنجي زندگي گذاري سگهن. - @nashahro.feroze110