. خلونا نحكو على بكري وقت النية كيما نقولوا...الناس في ذاك الوقت كانوا يفضلو الماعز على البقر والغنم؛ خاطر المعزة صبورة، جلدها قاسي على المرض، تولد بالزوج وتسلك راسها من والو. الخروف يعاف، والبقرة تشرّط وتخيّر في العلف، أما المعزة والحمار منشار طالع واكل، هابط واكل. الشوك، الديس، السدرة، الحلفاء، وحتى القشور اليابسة ما يخليو منها حبة. كان الصيف كي يدخل بحموه ورياح الشهيلي، يلقى الديار وضواحي الغابة نقية، كأنما جازت عليها مكنسة سحرية. الحمار والمعزة ياكلو كل ما هو يابس وخفيف، هذاك الحشيش اللي ما فيهش قطرة ماء ويشعل من شرارة. ما يلقاش النار واش تاكل، وتبقى الغابة خضراء والبيوت في أمان. لكن كي هجر الناس لبلاد وتبدلت المعيشة، غاب صوت الحافر من المسالك، وفرغت الزرائب. كبر الديس، وطال الحشيش اليابس حتى وصل لعتبات البيوت، ورجعت الغابة عبارة عن برميل بارود يستنى غير شعلة خفيفة اليوم، بعد ما حرقت النيران الأخضر واليابس في حوض البحر الأبيض المتوسط، فاقت دول كيما إسبانيا، إيطاليا وتركيا لسر الأجداد، وبداو يرجعوا قطعان الماعز للغابات كحراس طبيعيين للبيئة. وحتى في ميريكان، خاصة في ولاية كاليفورنيا اللي تاكلها حرائق الغابات كل عام، ولات هذي استراتيجية رسمية يسموها "الرعي المستهدف" (Targeted Grazing). دايرين شركات خاصة تكري آلاف الرؤوس تاع الماعز للمدن وأصحاب المزارع الكبيرة. يطلقوهم في الوديان وتحت خيوط التريسيتي العالية وفي حواشي الطرقات باش يحفروا "خطوط دفاع" طبيعية تمنع النار تنتقل للديار. الماعز في كاليفورنيا ما ياكلش برك الحشيش، بل يقدر يتسلق المنحدرات الوعرة اللي ما تقدر تلحق ليها لا آلة حش ولا فرقة إطفاء، وياكل حتى النباتات السامة وأغصان الأشجار العالية اللي لو كان تبقى ترجع نيران تاجية (Crown Fires) تحرق الغابة كاملة. رجع العالم كامل للحل البسيط اللي كان عندنا في الدوار: المعزة والحمار مكانش غير وسيلة عيش، كانوا هوما أول وأنجح فرقة حماية مدنية عرفتها القرى. #الماعز #حماية_الغابات #الجزائر - @shadow_dz_213