ရန်ကုန်ရောက် ကျားဖြန့်တရုတ်များက ၁၂/ မြန်မာနိုင်ငံသားမှတ်ပုံတင်များကို ငွေကျပ် သိန်းရာထောင်ချီပေး၍ ပြောင်းလဲကိုင်ဆောင်ပြီး ဟိုတယ်နှင့် လောင်းကစားဝိုင်းများကို အမည်ခံနေရာအနှံ့ ဖွင့်လှစ်လာ ရန်ကုန်၊ ဩဂုတ် ၂၉ ရန်ကုန်ရောက် ကျားဖြန့်တရုတ်များက ၁၂/ မြန်မာနိုင်ငံသားမှတ်ပုံတင်များကို ငွေကျပ် သိန်းရာထောင်ချီပေး၍ ပြောင်းလဲကိုင်ဆောင်ပြီး ဟိုတယ်နှင့် လောင်း ကစားဝိုင်းများကို အမည်ခံနေရာအနှံ့ ဖွင့်လှစ်လာကြောင်း ရန်ကုန်ခေတ်သစ်သတင်းဌာနက စုံစမ်းသိရှိရသည်။ မြဝတီနှင့် ရှမ်းပြည်နယ်မြောက်ပိုင်းဒေသများမှ ရန်ကုန်မြို့သို့ ပြောင်းရွှေ့ရောက် ရှိလာသော အွန်လိုင်းငွေလိမ်လည်မှုလုပ်ငန်း လုပ်ကိုင်သည့် တရုတ်နိုင်ငံသားများက ရန်ကုန်တိုင်းအခြေပြု ၁၂/ မြန်မာနိုင်ငံသားမှတ်ပုံတင်များကို ငွေကျပ် သိန်းရာနှင့်ချီမှ သိန်းထောင်နှင့်ချီအထိ ငွေကြေးပေး၍ ပြောင်းလဲရယူကိုင်ဆောင်လာကြပြီး ဟိုတယ်၊ သင်တန်းကျောင်းနှင့် တရားဝင်စီးပွားရေးလုပ်ငန်းများကို အမည်ခံဖွင့်လှစ်ကာ အွန်လိုင်းငွေလိမ်လည်မှုနှင့် လောင်း ကစားလုပ်ငန်းများကို ရန်ကုန်မြို့နေရာအနှံ့အပြားတွင် ဆက်လက်လုပ်ကိုင်လာနေကြောင်း တပ်သတင်းရင်းမြစ်များနှင့် စီးပွားရေးအသိုင်းအဝိုင်းထံမှ သိရှိရသည်။ ၂၀၂၄ ခုနှစ် နှစ်ကုန်ပိုင်းနှင့် ၂၀၂၅ ခုနှစ် နှစ်ဆန်းပိုင်းမှစတင်၍ ကရင်ပြည်နယ်၊ မြဝတီမြို့နှင့် ရှမ်းပြည်နယ်မြောက်ပိုင်းဒေသများတွင် အွန်လိုင်းငွေလိမ်လည်မှုလုပ်ငန်းများ လုပ်ကိုင်ခဲ့သည့် တရုတ်နိုင်ငံသားများသည် နည်းလမ်းမျိုးစုံဖြင့် ရန်ကုန်မြို့သို့ ရောက်ရှိလာခဲ့ကြောင်း သိရှိရသည်။ ယင်းတရုတ်နိုင်ငံသားများသည် ယခင်က ကရင်ပြည်နယ်အခြေပြု ၃/ မှတ်ပုံ တင်နှင့် ရှမ်းပြည်နယ်အခြေပြု ၁၃/ မှတ်ပုံတင်များ ကိုင်ဆောင်ထားခဲ့ကြသော်လည်း ယခုနောက် ပိုင်းတွင် ရန်ကုန်တိုင်းအခြေပြု ၁၂/ နိုင်ငံသားမှတ်ပုံတင်များနှင့် သန်းခေါင်စာရင်းများကို ငွေကြေးအမြောက်အမြားပေး၍ ပြောင်းလဲရယူကိုင်ဆောင်လာကြကြောင်း ရန်ကုန်အခြေစိုက် စီးပွားရေးအသိုင်းအဝိုင်းက ပြောသည်။ “မြန်မာစကားတောင် မတတ်တဲ့ တရုတ်တွေပါ။ အဓိကပြောချင်တာက ကျားဖြန့်လုပ်ငန်းလုပ်ကိုင်နေတဲ့ တရုတ်တွေဟာ ထန်းတပင်၊ ရွှေပြည်သာ၊ လှိုင်သာယာ၊ ဒဂုံမြို့သစ်လို ရန်ကုန်ဆင်ခြေဖုံးဒေသတွေကနေ ၁၂/ မှတ်ပုံတင်နဲ့ သန်းခေါင်စာရင်းတွေ ရယူကိုင်ဆောင်လာကြတယ်။ အရင်တုန်းကတော့ ၃/ နဲ့ ၁၃/ မှတ်ပုံတင်တွေ ကိုင်ထားကြတာ။ အခုတော့ ၁၂/ မှတ်ပုံတင်တွေနဲ့ ဟို တယ်ပိုင်ရှင်တွေ၊ စီးပွားရေးလုပ်ငန်းရှင်တွေဆိုပြီး မှတ်ပုံတင်လာကြတယ်” ဟု ရန်ကုန်အခြေစိုက် စီးပွားရေးအသိုင်းအဝိုင်းမှ သတင်းရင်းမြစ်တစ်ဦးက ပြောဆိုသည်။ မြဝတီမြို့နယ်အတွင်းရှိ အွန်လိုင်းငွေလိမ်လည်မှုလုပ်ငန်းများကို စစ်တပ်က နှိမ်နင်းမှုများပြုလုပ်ပြီးနောက် ယင်းလုပ်ငန်းများနှင့် ဆက်နွှယ်သည့် တရုတ်နိုင်ငံသားအများအပြားသည် ရန်ကုန်မြို့သို့ ပြောင်းရွှေ့ရောက်ရှိလာခဲ့ကြောင်း၊ အထူးသဖြင့် လှိုင်သာယာမြို့နယ်တွင် မြဝတီဘက်မှ ရောက်ရှိလာသူများ ပြန်လည်အခြေစိုက်နေထိုင်လာကြောင်း သိရှိရသည်။ ၎င်းတို့သည် ရန်ကုန်မြို့အတွင်း နေရာများခွဲဝေ၍ အခြေစိုက်ကာ ဟိုတယ်၊ KTV၊ ဘား၊ ဘာသာစကားသင်တန်းကျောင်းနှင့် ကွန်ပျူတာသင်တန်းကျောင်းများကို အမည်ခံဖွင့်လှစ်ပြီး အတွင်းပိုင်းတွင် အွန်လိုင်းငွေလိမ်လည်မှုလုပ်ငန်းများကို ဆက်လက်လုပ်ကိုင်နေကြောင်း ရန်ကုန်မြို့ရှိ ယင်းလုပ်ငန်းများတွင် အလုပ်လုပ်ကိုင်ခဲ့ပြီးနောက် လုပ်ငန်းခွင်မှ ထွက်ခွာလာသူများက ပြောသည်။ လက်ရှိ ရန်ကုန်တိုင်း၊ လှိုင်သာယာမြို့နယ်အတွင်းရှိ တရုတ်နိုင်ငံသားများပိုင် ဆိုင်သည်ဟုဆိုသော Mandarin Hotel၊ လှိုင်သာယာဟိုတယ်နှင့် L.C Hotel တို့သည် ဟိုတယ်လုပ်ငန်းလိုင်စင်ဖြင့် ဖွင့်လှစ်ထားသော်လည်း ပုံမှန်လာရောက် တည်းခိုသည့် ဧည့်သည်များ အလွန်နည်းပါးကြောင်း၊ ဟိုတယ်အတွင်းတွင် အွန်လိုင်းငွေလိမ်လည်မှုလုပ်ငန်းများကို ဆက် လက်လုပ်ကိုင်နေကြောင်း သတင်းရင်းမြစ်များထံမှ သိရှိရသည်။ “လှိုင်သာယာမှာ ဟိုတယ်တွေ၊ တည်းခိုခန်းတွေ၊ ဘားတွေကို တရုတ်တွေကပဲ ဖွင့်ထားတာတွေရှိတယ်။ အပြင်ကကြည့်ရင် ဧည့်သည်မရှိသလောက်ပဲ။ သူတို့လူတွေပဲ အတွင်းမှာနေကြတယ်။ အပြင်လူတွေကိုလည်း လွယ်လွယ်နဲ့ ဝင်ခွင့်မပေးဘူး။ တံခါးပိတ်ပြီး သူတို့အချင်းချင်းပဲ အလုပ်လုပ်ကြတာ။ ဟိုတယ်၊ တည်းခိုခန်းလိုင်စင်ယူထားပြီး အတွင်းမှာ အွန်လိုင်းငွေလိမ်လည်မှုလုပ်ငန်းတွေ လုပ်နေကြတာပါ။ သက်ဆိုင်ရာ စစ်တပ်၊ ရဲနဲ့ အုပ်ချုပ်ရေးအဖွဲ့အစည်းတွေကလည်း မသိဘဲမနေပါဘူး။ လိုင်းကြေးပေးပြီး လုပ်ကိုင်နေကြတာလို့ သိရတယ်” ဟု အခြေအနေကို သိရှိထားသည့် သတင်းရင်းမြစ်တစ်ဦးက ရှင်းပြသည်။ ကရင်ပြည်နယ်နှင့် ရှမ်းပြည်နယ်မှ ထွက်ခွာလာသော ယင်းတရုတ်နိုင်ငံသားများသည် ငွေကြေး အမြောက်အမြား အသုံးပြုကာ ရန်ကုန်မြို့ရှိ အဆင့်မြင့်အိမ်ရာများတွင် အခြေချနေထိုင်လာကြောင်းလည်း သိရှိရသည်။ FMI အိမ်ရာ၊ အောင်ဇေယျအိမ်ရာ၊ နဝဒေးအိမ်ရာ၊ ကျန်စစ်မင်းအိမ်ရာနှင့် ထီးလှိုင်ရှင်အိမ်ရာတို့တွင် နေအိမ်နှင့် မြေကွက်များကို စျေးနှုန်းမြင့်မားစွာပေး၍ ဝယ်ယူခြင်း သို့မ ဟုတ် ငှား - @zayartbz7news