میرے بعد تم پوری دنیا آزما لینا، ہر چہرے میں میری کمی ڈھونڈتے جانا، کسی کی ہنسی میں سکون ملے تو ٹھہر جانا، مگر دل اگر اداس ہو، تو مجھے یاد کر لینا۔ تمہیں لوگ بہت ملیں گے، کوئی تمہیں چاہنے کا دعویٰ کرے گا، کوئی تمہارے قدموں میں دنیا رکھ دے گا، کوئی تمہاری خاموشی بھی پڑھنے کا وعدہ کرے گا، مگر میری طرح تمہاری آنکھوں کا درد شاید کوئی نہ سمجھ سکے گا۔ میں مانتا ہوں، مجھ سے بھی غلطیاں ہوئی ہوں گی، کبھی لفظ کم پڑے ہوں گے، کبھی محبت جتانے میں دیر ہوئی ہوگی، مگر جو دل تمہارے نام کیا تھا، وہ آج بھی کسی اور کا نہیں۔ میرے بعد تم بہاروں میں خوشی تلاش کرنا، بارشوں میں کسی کا ساتھ مانگنا، تنہائی میں کسی کا ہاتھ تھام لینا، مگر جب رات بہت خاموش ہو جائے، اور دل بےسبب کسی کو پکارے، تو سمجھ لینا، وہ آواز میری یاد کی ہوگی۔ تمہیں ملیں گے لوگ جو تمہیں خوبصورت کہیں گے، جو تمہاری ہر ادا پہ مرنے کا دعویٰ کریں گے، مگر وفا صرف لفظوں سے نہیں ہوتی، کبھی کبھی ایک شخص اپنی پوری زندگی خاموشی سے دوسرے کے نام کر دیتا ہے۔ بس ایک دن ایسا ضرور آئے گا، جب تمہیں میری کمی محسوس ہوگی، اور تمہارا دل خود کہے گا اس کی وفا میں بات ہی کچھ الگ تھی، وہ شخص شاید مکمل نہیں تھا، مگر اس کی محبت میں ملاوٹ نہیں تھی۔ پھر مجھے ڈھونڈنے کی کوشش مت کرنا، کیونکہ شاید میں بہت دور جا چکا ہوں، مگر میری دعا ہمیشہ تمہارے ساتھ ہوگی؛ تم خوش رہو، آباد رہو، اور کبھی کسی سے محبت کرو تو اسے کھونے سے پہلے اپنی محبت کا یقین دلا دینا۔ - @gondal_214