#koya نامەیەک بۆ ئەو کەسەی لەگەڵ هەموو هەنگاوێکیدا بەرەو دوورکەوتنەوە، پارچەیەک لە گیانی منی لەگەڵ خۆی برد و لە دوای خۆی تەنیا وێرانەیەک لە یادگاری و ئازارێکی نەبڕاوەی جێهێشت، ئەمڕۆ کە ئەم دێڕانە بێ‌دەنگ و بە چاوی پڕ لە ئەسرینەوە بۆ دەنووسم، هەست دەکەم سییەکانم شوێنی تەواوی هەوای ئەم دونیایەیان تێدا نابێتەوە، دڵم ئەوەندە تەنگ و پەست بووە خەریکە لە لێدان دەکەوێت و لە ناخەوە بە ڕەقترین شێوە دەسوتێت. هەواڵی مارەبڕینت وەک بروسکەیەکی کوشندە بوو لە ساردترین شەوی ژیانمدا، ڕێک لەو کاتەی هێشتا بە ئومێدی گەڕانەوەت و دووبارە بینینەوەت هەناسەم دەدا، هەموو ئەو خەون و هیوایانەی تەنیا لەسەر تۆ و داهاتووی تۆ بنیاد نابوو لە ساتێکدا کردییە خۆڵەمێش و بەسەر ئاسمانی تەنیاییمدا بڵاوی کردەوە. نامەوێت تەنیا لەبەر ئەوەی چارەنووس بێ‌بەزەییانە بەشی یەکتری نەبەخشین، سۆز و خۆشەویستیت لە ناخمدا کەم ببێتەوە، چونکە تۆ تەنیا کەسێک نیت کە بە جەستە ڕۆشتبێت، تۆ ئەو بەشە بەنرخەی ژیانم بوویت کە تێیدا فێری بڕواپێکردن، خەونبینین و ئارامی ببووم، بەڵام ئێستا کە گوێبیستی ئەوە دەبم ناوێک لە پەنای ناوەکەتدا دانراوە کە ناوی من نیست، ڕەنگە تەنیا خودا بزانێت چ ئازارێکی قووڵ، بێ‌پەیام و بێ‌دەنگ دەچێژم و چەندە بە ئەستەم لە سنگی خۆمدا هەناسە دەدەم. دەزانم ڕێگاکانمان بە تەواوی جیا بوونەوە و ئەو ئەڵقەیەی کە هەموو تەمەنم بە حسرەتەوە خەونم پێوە دەبینی ببێتە نیشانەی گەیشتنمان بە یەکتر، ئێستا بوو بە نیشانەی کۆتایی هاتنی چێژبەخشترین و پڕئازارترین چیرۆکی ژیانم، من هیچ توانایەکم نییە بەربەستەکانی چاخی نەهات بگۆڕم و داوای مانەوەت لێ بکەم، بەڵام ئەم دڵە پارچەپارچە بووەم هیچ کات ناتوانێت ئەو هەموو یادگارییەی چاوەکانت، زەردەخەنەکانت، و ئەو بەڵێنانەی بە بێ‌دەنگی لە کاتی ڕوانینەکانماندا بە یەکتریمان دەدان لەبیر بکات. لەم شوێنەی من وەستاوم هەموو شتێک ڕەنگی ڕەش و سپیی گرتووە، شەقامەکان، تێپەڕینی کاتژمێرەکان، گۆرانییەکان و هەموو کۆڵانەکانی ئەم شارە سیمای تۆیان تێدا ڕەنگی داوەتەوە و وەک خەنجەرێک وایە کە ڕۆژانە برینەکانم بەسوێت تر دەکەنەوە، تێنەگەیشتم چۆن تەمەنێک وابەستەیی و خۆشەویستی پاک لەپڕێکدا دەبنە بەشێک لە ڕابردوو و ئیمزایەک لەسەر پەڕەیەک دەبێتە هۆی دابڕانی هەتاهەتاییمان لە یەکتر. هەموو شەوێک بە تاڵییەوە بەئاگام کە ئیتر تۆ هی کەسێکی تریت و دەستەکانت دەستێکی تر گەرم دەکەنەوە، ئەم بیرکردنەوەیە وەک چەقۆیەک وایە کە بێ بەزەییانە لە ناخ و گیانم دەدرێت و ڕوحم هەڵدەپڕوکێنێت، من چۆن ڕامبێنم بەوەی ئیتر لەگەڵ هەموو ڕۆژهەڵاتنێکدا تۆ هی من نیت و مافی ئەوەشم نییە حەسرەتی دەنگت بکەم، چۆن ڕامبێنم بەوەی کە خەندەکانت ئیتر بەشێک نین لە ژیانی من و لەمەوبەدوا تەنیا سێبەرێکی دوور دەبیت لە ناو یادگارییەکاندا. تەنانەت هەموو کۆڵانێک و هەموو پیادەڕوویەک کە پێکەوە پێمان تێنابوو، ئێستا گەواهیدەری ئەو شکستە گەورەیەن کە ڕوحی منی داپۆشیوە، تەواوی هەوای شارەکە بێ تۆ بۆ من بووەتە خنکێنەرتر لە تەم و مژێکی تاریک. ئێستا دەزانم دابڕان تەنیا دوورکەوتنەوەی جەستەکان نییە، بەڵکو مردنی هێواشی ئەو بەشەی ڕۆحە کە تەنیا لە هەبوونی کەسێکی تردا زیندوانە دەژیا، لەمەوبەدوا من دەبێت لەگەڵ سێبەری خەونە بەدی‌نەهاتووەکانمدا دەستەوئیەخە ببم و بەرگەی تاڵی ئەو بێ‌دەنگییە بگرم کە لە دوای تۆ بەجێماوە، بەڵام لەگەڵ ئەوەشدا ئەگەرچی سنگم پڕە لە ژانی جودایی و دڵم خەریکە لەژێر قورسی ئەم ئازارەدا دەشکێت، هەرگیز ناتوانم خراپەت بۆ بخوازم یان بۆ یەک چڕکەش کینەی تۆم لە دڵدا بێت. ئاواتەخوازم لەو ژیانە نوێیەدا بێبەش نەبیت لە ئارامی و بەختیاری، حەز دەکەم ئەو ماڵەی تێیدا دەژیت پڕ بێت لە خەندە و ئاسودەیی کە من نەبوومە بەشێک لێی، چونکە من هێشتا بەقەد هەموو ڕووبەرەکانی ئەم دوورییە نەبڕاوەیە بەپاکی و بێگەردی خۆشم دەوێیت و تا دواهەمین هەناسەی ژیانم ئازاری لەدەستدانت لە سێبەرمدا دەمێنێتەوە، هەتا دەمرم تۆ پیرۆزترین نەهاتن لە ژیانمدا دەمێنێتەوە و هیچ کەسێک ناتوانێت شوێنەکەت لە ناخمدا بگرێتەوە، ماڵئاوا ئەی گەورەترین، جوانترین، پیرۆزترین و بەئازارترین خەونی بەدی‌نەهاتووی تەمەنم.🙇🏻💔 - @cherok67