حيث كتب المعلم : الفريق البرهان، رئيس مجلس السيادة وأعضاء المجلس الدكتور كامل إدريس، رئيس مجلس الوزراء وأعضاء المجلس ولاة الولايات وأعضاء حكوماتهم أنا معلم في الدرجة السابعة، مرتبي 87 ألف جنيه فقط لا غير. شغال في الريف، والدرجة السابعة معناها جدول حصص «فُل» وما فيهو أي نفس… يعني ببساطة: ما عندي مصدر دخل غير المرتب ده. أها، شايفين كم حبة الطماطم وكم ليمونة ديل؟ ديل بي 10 ألف جنيه. والشطة دي مجان والله! قلنا نغيّر للشفع شوية من العدس والسخينة والفول، ونعمل ليهم سلطة دكوة… وجك ليمون. بعد دا عايز عيش بـ 4 آلاف جنيه. يعني وجبة الفطور بس بـ14 ألف جنيه. وبعد المغرب، وجبة فتة فول بـ7 أو 8 آلاف. يعني وجبتين وجك ليمون ممكن يصلوا حوالي 20 ألف جنيه في اليوم. لاحظوا: مرتبي 87 ألف جنيه. يعني لو أكلنا سلطة دكوة كل يوم، محتاج تقريباً 600 ألف جنيه في الشهر للأكل فقط. ولو أكلنا وجبات عادية: فول، عدس أو سخينة، محتاج حوالي 450 ألف جنيه في الشهر. وبرضو: مرتبي 87 ألف جنيه. والعلاج؟ والتعليم؟ والسكن؟ والمواصلات؟ والملابس؟ والاحتياجات اليومية؟ دي كلها لسه ما حسبناها. وهاكم زيادة خير، عشان تعرفوا إنتو وصّلتوا الشعب ده لي ياتو هاوية: كيلو السكر: 6 آلاف رطل الزيت: 10 آلاف كيلو العدس: 7 آلاف كيلو الرز: 10 آلاف كيلو اللبن البدرة: 40 ألف جنيه أها بالله عليكم… في معلم قادر يشتري الحاجات دي كلها بمرتب 87 ألف جنيه؟ ده معلم. زول قضى سنوات في التعليم، وواقف قدام الشفع كل يوم، وبيعلّم أجيال السودان. وكمان وزير المالية مستكثر علينا القريشات الختيتوها في المرتب من شهر أغسطس، مع إنها أصلاً لا تغني ولا تسمن من جوع. وسعادتو جبريل قال إن توجيهات رئيس الوزراء حتتطبق السنة الجاية، مع إن توجيهات رئيس الوزراء كانت واضحة إنها تُطبّق من الشهر ده. يا جبريل… المعلم ما طالب رفاهية. المعلم طالب يعيش. كيف تطلب من زول يعلّم أبناء السودان، ويربي الأجيال، ويؤدي رسالته، وهو عاجز حتى عن توفير وجبتين في اليوم بمرتبه؟ يا أيها البرهان، وكامل، وشركاؤهم في الحكومة والمصير… ذكرنا ليكم الكلام ده عشان تعرفوا رعيتكم من المعلمين عايشة كيف. وبعدين، لما ربنا يسألكم، ما تقولوا: «والله نحن ما كنا عارفين.» أها… هسي عرفتوا. فجهّزوا إجاباتكم من هسي. لأن حكاية الحرب، والحصار الاقتصادي، وغلاء البترول، ومضيق هرمز وغيرها من الظروف، ممكن تكون مبررات نتناقش بيها هنا في الدنيا. لكن السؤال الأكبر: ماذا ستقولون أمام الله عن الناس الذين كانوا تحت مسؤوليتكم؟ أيها المعلمون الشرفاء… الناس المسؤولين عنكم اليوم كبار في السن، وأصغرهم تقريباً في الستين. والإنسان مهما طال عمره، نهايته الموت. والمسؤولية ما بتنتهي بانتهاء المنصب. في حساب. وفي بعث. وفي وقوف بين يدي الله. فبالله عليكم… كيف سيقابل المسؤول ربنا بدعوات المظلومين والمطحونين الذين كانوا يدعونه ليل نهار؟ إذا ما بتخافوا على سمعتكم، وإذا ما بتخافوا على تاريخكم، وإذا ما بتخافوا على سمعة عوائلكم وأولادكم من بعدكم… خافوا الله. خافوا الله الذي خلقكم، والذي ستموتون أمامه، والذي سيحاسب كل واحد منكم عن الأمانة التي حملها. قال رسول الله ﷺ: «من شق على أمتي، اللهم فاشقق عليه.» يا مسؤولين السودان… المعلم ما داير المستحيل. داير مرتب يخليه يعيش بكرامة. #المعلم_السوداني #مرتبات_المعلمين #السودان #غلاء_المعيشة #حق_المعلم - @sudaneenx