@yassmin_el_masr: 🌿 نور والكوتشينج فاكرين نور؟ المرة اللي فاتت كانت بترجع آخر اليوم مرهقة، ولما ما لقتش التقدير اللي مستنياه... كانت بتغضب، وتتخانق، وبعد ما تهدى تلوم نفسها. الموقف اتكرر أكتر من مرة... لحد ما قالت: "أنا مش عارفة أخرج من الدائرة دي لوحدي." فقررت تتكلم مع كوتش. 🌿 داخل الجلسة دخلت نور وهي متضايقة جدًا: "أنا بعمل كل حاجة... وبشيل البيت والشغل والأولاد... وفي الآخر محدش مقدرني." كان ممكن الجلسة تتحول لسؤال: مين غلطان؟ ومين مقصر؟ لكن دور الكوتش مش إنه يحكم على الناس اللي في حياتها. بعد ما أخذت نور مساحتها، بدأ يسألها: "إيه أكتر حاجة مضايقاكي في كل اللي حصل؟" قالت: "إني مش حاسة إن حد شايفني." فسألها: "لما تقولي محدش شايفني... إيه اللي معناها عندك؟" سكتت شوية... "يعني تعبي مش فارق." "ولما تعبك ما يكونش فارق... ده بيخليكي تحسي بإيه؟" "إني لوحدي... وإني لازم أفضل شايلة كل حاجة." هنا بدأت نور تسمع نفسها بشكل مختلف. مش بس: "هم مش مقدريني." لكن: "أنا عندي إحساس إني لو ما عملتش كل حاجة بنفسي... محدش هيعملها." فسألها: "هل دي أول مرة تحسي كده؟" فكرت... "لا... دي بتحصل معايا من زمان." وهنا بدأت تشوف إن الموقف الحالي ممكن يكون جزءًا من دائرة أقدم. لكن الكوتش ما وقفش عند الفهم. قال لها: "المرة الجاية لما تهدي، هاتي ورقة وقلم واكتبي." مش: "أنا غير مقدَّرة." لكن: "عندي فكرة إني غير مقدَّرة." مش: "أنا غضبانة." لكن: "أنا أشعر بالغضب." لأن فيه فرق بين إن الفكرة أو الشعور يبقوا أنا... وبين إني أقدر أشوفهم وأفهمهم وأختار علاقتي بيهم. وبعدين سألها: "لو الموقف اتكرر وإنتِ هادية... إيه التصرف اللي نفسك تتعلميه بدل رد الفعل القديم؟" فكرت نور وقالت: "يمكن بدل ما أنفجر... أقول إني محتاجة أرتاح." "طيب، إيه أول خطوة ممكن تعمليها علشان ده يحصل؟" وهنا بدأت نور تختار طريقة تناسبها هي. مش جملة محفوظة... ولا رد مثالي. لكن بديل تقدر تتدرب عليه. 🌿 خرجت نور من الجلسة مش ومعاها حل سحري... لكن ومعاها طريقة جديدة تشوف بها نفسها. تتنفس. تسترجع الموقف. تكتب. تسأل. وتشوف أكتر من احتمال. لأن التغيير مش: "المرة الجاية ما تغضبيش." التغيير إننا وإحنا هاديين... نبدأ نعلّم عقلنا إن فيه طريقة تانية ممكن تحصل. يمكن نور تغضب تاني. لكن الفرق إنها بدأت: تلاحظ... وتفهم... وتتدرب. اتألمت... فتعلمت... فبدأت تتغير. وده واحد من الأدوار المهمة للكوتشينج. الكوتش مش بيختار لك حياتك، ولا بيديك وصفة واحدة. لكنه يساعدك ترتب اللي جواك، وتشوف أنماطك، وتجرب طريقة مختلفة... لحد ما تبدأ أنت تتعلم تمشي بخطواتك. 🌿 الإجابة ليست المهمة... الملاحظة هي البداية. [dryasminelmasry.com] #فتّش_جواك #من_الداخل_إلى_العلاقة #المودة_والرحمة_تبدأ_من_الداخل #دكتور_ياسمين_المصري
